Read Ignaciano 2 Corintios 2 Bible Online

2 Corintios 2 - Ignaciano bible

2 Corintios 2

¹Eta taka'e, wicha'a nítekaima'i. Taicha wa'i náwara'a'ini nápechawa'ini némekatajiwacha'e'ini te esamureana eta néjiraira'eyare.

²Taicha te ekatisamurewa nícha, tímatikareipa'i nájina tikurisamurechanuima'i nuti. Ekarichuyare'i eti ekurisamurechanuyare'i.

³Taka'e, eta táitsiwa'i eta néjirapanaira'e, nukajure'epa eta táinapuiru najure, nuwaraira'i ésamirikawayare, apaesa waipa nukatisamurewaima'i icha eti. Nuwara'a'isera núrisamure'ini ícha. Taka'e, németeaka étipa iúrisamure'iwareni ámutu eta nuye'e,

⁴jé'eware, jena sache, te nukajure'epa, ichapemuri'i eta nupanereresira'i, nukatisamurewa'iware. Níya'akawa'i ichape. Wá'isera étaparakaina'ini nuwara'a némekatajiwacha'e'ini te esamureana. Nuti nuwara'a'i ímati'ini eta táichapewa'i eta némunasira'e'i.

⁵Tiuri puiti, mákani téjekapawa'i máicha'i eta pekatu, tétavikawa'i eta ekatisamurewa'i máicha. Nuti apanaware nukatisamurewa'iware.

⁶Wá'isera táurika viwayuchawa eta vémecharesira ema. Puiti, tarata'aipa eta ekuchusira'i te emuri eti.

⁷Puiti táurikapa ejapanu eta máichawakenewa'i. Ekurisamurechainapa ema, apaesa wa'i makuwayuchawa eta makatisamurewa'i, máinajikawapuka.

⁸Nuwara'a puiti iápechawa'ini ímereka eta émunasira'i ema. Ejakapaware te emuri.

⁹Eta taka'e, nukajure'i kape juka, nuwaraira'iware nukaikutiara'e te esuapayarepuka eta nuwanairipiana'i.

¹⁰Nuti apanaware nujapanu'iware ema maka achane te máijare ema Cristo. Táurikapa ejapanukaka, ekutiranuyare eta nujapanuira'e'i.

¹¹Taicha te wá'ipuka vijapanukaka'i, tíñe'ikare'i makamapurawa ema Wínaraji, taicha tímatikare'i eta mawaraira'i tímiakipaika'aviyare.

¹²Nuti te nítekapapa te awasare Tróde, nepanawainapa eta nukametarairuyare'i eta Arairu maechejiriruwa ema Cristo, enewanesera tijachapanuana'i eta nukaemataneasirayare'i ema Tata.

¹³Nímijacha'i nuchimapa'ini ema nuparape Tito. Tétavikawa eta néñamirawa'i, nuwaraira'i néchayare'i tája'apuka eta íchararakawa'i eti. Eta taka'e nukametawapa naye'e ena, nuyanapa ánaki te awasare tikaijare Macedonia.

¹⁴Puiti, ichape eta nu'asulupayachira'i ema Viya eta majaneasira'aviparaka, tíjaraka'avi'iware eta máitupajijiasirawa eta virata'aira'i vikanara tamutu, táichavene'i eta máwa'asira'avi'i ema Jesucristo. Tituparaka'aviware vikametarairuyare'i eta máimiturapiana, mawaraira'i tiúriyare'i eta nasamiraya namutu ena achaneana takuti eta najiusira jákani táijiyekeneana.

¹⁵Taicha eta vikametarairuira'i tímikutijirikawa'i eta táijiyewa eta incienso, eta máijarasira'i ema Cristo te mamira'u ema Maiya. Takapusisiaka'i namutu ena tisama'aviana, tisuapanaya, enapa ena masuapajiraira'ana, náemitiaruanayare taicha namawaraira'i nasuapa'ini.

¹⁶Tijeche'i eta najiusira takuti'i eta máke'e mákani máepenakene'i. Natiari'iware ena tisuapanapa'i náuchukureanayare'i; tikuti'ine'i najiuka'ini eta táijiyekene. ¿Tétavikawa'i eta néñamirawa'i eta vikatupara'aira'i?

¹⁷Virata'asera vítaucha eta vitupara'a'i, taicha víti, eta vikametarairuira, tájina wa'i vikawacharapi eta máechejiriruwa ema Viya, vétupiripikapa'ipukaini, viwarairaina'ini tajamurachakare'ini, tákuti'ini eta náichira ena apamuriana tímijachawana'i yátupikeneana mawaneruana ema Viya. Vítisera yatupikene'avi'i mawanara'avi'i ema Viya; vitupiruwa'i eta vikametarairuira eta máimiturapi ema Cristo.