Read Ignaciano 2 Corintios 3 Bible Online

2 Corintios 3 - Ignaciano bible

2 Corintios 3

¹Wa'i nuwara'a ímijacha'avi eta vikunachirawaina'ini puiti. Wá'isera wákuti'ini ena nákani apamuriana tímitura'iana, tipairirikana tiámana'i eta ajureka, táechejisi'a'i eta nakunachakarewa'i. Tájinaware vímatiya'ini viyaseaka'e'ini víti eta ajureka vímerakinapa'ini táechejisi'a'ini eta ekunachira'avina'i.

²Étisera, tájina véñamirawaima'i eye'e. Taicha tímatikare'i te awasareana eta táuriwa'i eta ítaresirana eti, táichavene'i eta vinakasamurechira'e'i eta máechejiriruwa ema Viya. Eti, ekuti'i eta ajureka vímerakianapa'i.

³Émakene ema Cristo, ema tiájucha'i, taicha tíjaraka'e'i ema Machanewa Viya máitsiwacha'eyare'i eta ítaresirana tiuriyare'i eta esamureana. Puiti juka eta ítaresira'i, tájinapa étaparakaina esuapa'ini eta wanairipiana takajukene'i akane te márime tabla.

⁴Nétumechawa ichape, taicha nusiñawa'i eta manerejiru'avi'i ema Cristo, máijarasira'avi'iware ema Viya eta maitupajijiasirawana.

⁵Taicha víti wa'i vítijiwaina'ini víjarakawa eta vítupajijiasirawa'i. Émakene'i ema Viya tíjaraka'avi'i eta vitumewana'i eta vikaemataneasira'i ema,

⁶Émakene'i tituparaka'avi vikametarairuyare'i eta arairu matratune. Wa'i étaina'ini nupamika'eyare eta esuapirayare'i eta wanairipiana. Taicha makaejakapa eta arairu maechejiriruwa ema Viya, tíjaraka'e'i emutu ema Machanewa Viya, máitsiwachina'eyare eta ítaresirana, arairuinapa. Étasera eta wanairipi takarichu táimiwanereka'i eta náepeniraya ena téjekapawana.

⁷Taka'e ema Moisés, mámapa'i eta wanairipiana takajukene'i te márime tabla. Ena achaneana, waipa nárata'a'ini náimararaka eta mamira. Ichape'inéni eta tapikauchakarewa'i eta wanairipiana, taicha tétavikawa'i eta tarapepesirapa'i eta mamira ema tiámapa'i. Étasera eta mayerewapa, timutsera'awapaipa'i témitiaka eta tarapepesira'i. Eta wanaipiana, takarichu'i táimikapaka'i nákani téjekapawana'i.

⁸¡Eta makaejasira'i eta Arairu maechejiriruwa ema Machanewa Viya, eta nukametarairukene'i puiti, tétavikawa'i eta tápajusirawa'i eta tasuapakarewa'i!

⁹Yátupi'i eta tasuapakarewa'i eta wanairipiana, tiápajukawa'isera eta tasuapakarewapana'i eta máichuarapi ema Viya, vijakapakare'i maye'e táichavene'i eta.

¹⁰Yátupi tirapepeka'i eta mamira ema tiámapa'i eta wanairipiana, wá'isera étaparakaina'ini táuricha'avi'ini.

¹¹Eta tarapepesira'i eta mamira ema Moisés, timutsera'awapaipa'i témitiaka. Eta juka táikutiara'i eta ánipichu'i eta tasuapakarewayare'i eta mawanairipiana. Étasera eta juka máichu'aira'avi ema Viya, tiápajukawa'i eta tasuapakarewa'i taicha máichekuarakireyare'i eta viúriwaya táicha.

¹²Étavene'i eta vikasiñawaira'i víma'ayare eta juka sache vikuchapakene'i, viti matupararuana vétumechawa'i eta vikametarairuirana.

¹³Wá'i wákuti'ini ema Moisés, tépakamira'awa'i te páñume, tiúriyarepa eta náimararasirayare'i ena machamuriana. Wáipasare nanekapa'ini te timutsera'awapa eta táema'airapa'i eta tarapepesira'i eta mamira, táikutiara'i eta táepa'airaya eta tapamisira'avini eta wanairipiana eta vítauchirayare'i.

¹⁴Puíticha ena nujaneanana israelítana wa'i nákaikutiara'ini eta juka. Taka'e, te naechejiku'a eta ichasikene matratune ema Viya takajukene'i eta te libro májure'i ema Moisés, wicha'a nákaikutiara'ini. Tímikutijirikawaichucha táepakucha'i eta máepakamira'i ema Moisés, tikajeraichucha eta nakaikutiarairayare'i.

¹⁵Puiticha, te naechejiku'a eta libro majure ema Moisés, wicha'a nakaikutiara'ini eta napanereru timikutijirikawa'i takaepaku'a'ini te pañu.

¹⁶Mákanisera achane, esenapuka, tíjarakawapa eta máe'isirayare'i ema Viákenu, ichapenapa eta makaikutiarairayare, tájinapa táepakakiña'aima'i.

¹⁷Jé'esare, ema Viákenu tíjaraka'avisarepa ema Machanewa Viya. Tási'a, waipa vipikakarakawa'ini eta vipauchiraya ema. Yátupina eta viwapinairawa'i maicha ema Machanewa Viya.

¹⁸Taka'e, vimutu viti vé'ikana'i ema Viákenu vikuti'ipa eta espejo eta tarapepesira'i eta tajaraiwa'i eta sache, víti, yátupi'i vímereka'i eta máuriwa'i ema Viákenu, waipa vikaepakamira'ini, eta taka'e, víti puiti tiápajukawainapaipa eta vikutirayare ema Viákenu taicha tiápajukawa'i eta majaraiwa'i te visamureana. Étavene'iware eta máwa'asira'avi'i ema Machanewa Viya máijararu'i ema Viákenu.