Read Ignaciano 2 Corintios 4 Bible Online

2 Corintios 4 - Ignaciano bible

2 Corintios 4

¹Eta taka'e, wá'ikene viyakujiekene'awaima'i eta vikametarairuira, taicha ema Viya tímecha'avi'i eta máemunaraiwa eta matuparasira'avi'i eta juka vikaemataneasirayare'i ema.

²Víti, tájina vímatiya'ini viyumurujirika'ini eta víchakeneana, wá'isera vícha'ini eta titsiri'akareana, wá'isera viútserurupina'ipukaini vi'apapika'ipukaini eta máimiturapiana ema Viya, taicha viwara'a vikurisamurechaya ema, tamutu'i véchejisi'a'i eta yátupikeneana. Jé'esare, viwara'a nakaikutiara'ini ena achaneana eta vímiturapiana'i tási'akeneana'i me Viya.

³Nakarichu nákaini wa'i narata'a nakaikutiaraima'i eta Arairu maechejiriruwa eta vimiturapi'i, énayare ena masuapajiraira'ana kaikuñanayare.

⁴Taicha ena wa'i nasuapa'ini eta maechejiriruwa ema Viya, émapasera ema tasiñaraji te juka apake'e, emapa tepaka'aukicha'i, waipasare nákaikutiara, waipaware nakuima'a eta tajaraiwa eta maechejiriruwa ema Viakenu Jesucristo.

⁵Te vikametarairu víti, wa'i vítina'ini vikunachawa'ini, viwara'a'ini é'ika'avi. Viwara'a'isera esuapa'ini ema Jesucristo, ekakenuyare'iware ema. Víti wanairuka'avichucha eta eye'e, taicha vikaemataneaka'i ema Jesús.

⁶Ema Viya, te máepiyakainapa eta juka apake'e, makawanairipipa tatiari'iyare'i eta tijara'i, témitiakayarepa eta timapikukenéni'i, ene maka'e'i eta viye'e, tímimaticha'avi'i eta majaraiwa ema Machicha. Tétavikawa'i eta tajaraiwa'i te visamureana, ema, tímimaticha'avipaipa'i eta máetaviuchakene'i máuriwa'i ema Viya.

⁷Eta juka vé'iru'i vímiturapiana'i, tétavikawa'i eta takunachakarewa'i, wa'i vítina'ini vikunachakare'ini, taicha viti páureanasami, vikutichucha eta muñeka náipune, émasera ema Viya máimereka'i eta máitupajijiasirawa'i, máijarasirapa eta tatumewayare'i eta viáke'e, wá'isera vítijiwaina'ini.

⁸Tayanapane titekapaucha'avi eta viatajiwana, wa'isera vikainajiruwa'ini, tatiari'iware jakani timipanerereka'avi, wa'iwasera veñamawa'ini taicha.

⁹Tipanajirika'aviana'i ena viánarana, wá'isera tijunijiaka'avima'i ema Viya eta majaneasira'avi'i, tayanapane nachururupaika'avi'ini, émasera ema Viya wa'i máisapaima'i tikapaka'aviana.

¹⁰Tamutu te jákani vikaiju'eanapa'i, natiari'i ena nawara'a tikapaka'aviana táichavene'i eta vé'isira'i ema Jesús, tamutu sácheana viámarairikapa'i te viake'e eta maepenira, ema Jesús, apaesa naima'a viye'e eta maitupajijiasirawa ema Viya.

¹¹Taicha viti eta vitaresira viamarairika'i eta vepenira, maichavene ema Jesús, apaesa naima'a te viake'e eta maitupajijasirawa eta makaechepusira'aviya.

¹²Eta taka'e víti viámarairika'i eta vépenira, táitsiwa'isera ejakapa'i eti eta tamaichekuarakireyare'i eta ítaresira.

¹³Eta Takapika'ukene Ajureka, ani taka'e'i: “Nuti nukasiñawa'i maye'e ema Viya, tási'a wa'i nupikakarakawa'ini eta néchejisirayare maye'e.” Éneichu'i vika'e'i víti puiti. Vikasiñawa'i maye'e eta makatiuchira'aviyare.

¹⁴Taicha vécha'i eta makaechepusira'aviyare'i ema Viya, vikutiyare'i eta makaechepusira'i ema Machicha Jesús te máekari. Tási'a, étamuri'avinapa, eti apanaware, eta vímeresirawayare te mamira'u ema.

¹⁵Tamutu eta juka víchawakenewana'i, táma'i eta iúriwayare'i. Taicha viwara'a'i eti esimutukeneana'i ejakapa'ini eta iúriwayare máijararu'e'i ema Viya, apaesa ámutu'iwareni eti esimutukeneana'i e'asulupayacha'ini ema, ekunacha'iwareni.

¹⁶Eta taka'e, wáipaine'i vikainajiruwaima'i. Tayanapanepuka tivitaji eta viáke'e, étasera eta viáchanewa tétavikawaichucha eta tatumewa tamutu sácheana.

¹⁷Taicha eta viátajiwana'i puiti juka vítaresiraicha'a, wa'i táunakakare, tékatikawanachucha. Éneichuware, jarari'i eta táitsiwa'i, taicha vijakapa'i eta táetaviuchirawaya eta viúrikakarewayare, máichekuarakirenapa.

¹⁸Eta taka'e, wa'i vipikakarakawaima'i eta viátajiwana'i, taicha wa'i táunakakare'ini. Vikasiñawa'isera maye'e ema Viya eta máimisiapira'aviya te máwasa anuma. Tási'a, máichekuarakirenapa eta viúrikakarewaya eta viávi'airaya taye'e.