Read Ignaciano 2 Corintios 5 Bible Online

2 Corintios 5 - Ignaciano bible

2 Corintios 5

¹Viti vikuti'i eta peti tiavi'a te juka apake'e, taicha eta, wa'i murakaina'ini eta takaepiyakasiwa'i. Jarari'isera eta vipenayare'i te anuma víkuchi'i maye'e ema Viya. Eta, nájinapa tirata'aima'i tiákipaika, taicha wa'i náepiyaruina'ini ena achaneana.

²Puiti, tétavikawa'i eta takatajiwaira'i eta viáke'e, tamutu'i tasama. Eta taka'e, viwara'aine'i táija'uchawa'ini takaitsiwa'ini eta viáke'eyare te anuma;

³Taicha vikamunuine'i eta arairu viáke'e, apaesa wa'i vitsiri'aima'i eta vikachanerayare ema Viákenu, taicha vikutiyare ema.

⁴Puiti eta juka vítaresiraicha'a, tamutu'i tasama eta viáke'e, ichapemuri'i eta táimipanereresira'avi'i, wá'isera étaina'ini eta viwarairaina'ini vépenawane, étasera viwaraira'i takaitsiwa'ini eta viáke'e arairuina'ini.

⁵Taka'e, ema Viya tamutu'i máikucha eta táichararakawayare te apana vítaresira. Puiti tíjaraka'avi'iware ema Machanewa Viya. Émapa títametaka'aviparaka eta vijakapirayare eta víkuchiana'i.

⁶Eta taka'e, viurisamureparaka'i. Taicha vecha'i eta vinasiraicha'a te juka apake'e, viyere'icha'a'i vikachaneraina'ini ema Tata Viákenu.

⁷Puitisera tayanapaneni wa'i vima'a ema Viya, vikasiñawasera eta maye'e ema.

⁸Nuwara'aine'isera táija'uchawa'ini takaitsiwa'ini eta juka náke'e, nuyanasarepaini nukachane'ini ema Viákenu.

⁹Eta taka'e, viwara'a ichapemuri'i eta vikurisamurechira'i eta vikaemataneasira ema Viákenu puiti juka vítaresiraicha'a, tási'a ema, tiúrisamureyare eta viye'e te vímerekawainapa te mamira'u.

¹⁰Taicha vimutu vímerekawayare te mamira'u ema Cristo te máwakureyare, ánaki tímatikareyare tamutu eta víchakeneanapachu'i puiti juka vítaresiraicha'a, te vícha'ipuka eta táurikeneana, te éta'ipuka eta tamaurikeneana, te vícha'ipuka eta táurikeneana, vijakapainapa eta víkuchianapa'i.

¹¹Vitisera, ichape eta vipikauchira'i ema Viya, eta taka'e, vímiyanawa vikametarairu naye'e ena achaneana eta maye'e, taicha viwara'a'i námutu'ini napikaucha'iwareni ema. Émasera, tétavikawa'i eta máimatira'avi'i táuriwa'i eta vipanereruana eta vikaemataneasira'i ema. Puiti viwara'a écha'iwareni eti apanawa eta táuriwa'i eta vipanereruana.

¹²Taka'e, eta juka véchejisi'akene'i, wa'i vitina'ini vikunachawa'ini, viwara'a'isera vikunachakare'ini eta eye'e, apaesa árata'a'ini ekamatinaka ena tímijachawana'i náimatiekene'a. Wá'isera yátupina'ini náituruekene'a'ini te nasamureana.

¹³Ena, tépiyeikene'a'aviana'i, máurishi'avi'iji náicha, taicha ichape eta viwapinairawa'i eta vikaemataneasira'i ema Viya. Te tiúripuka eta vichuti, étavene'i eta viwaraira'i ichapena'ini eta iúrikakarewaina eti.

¹⁴Eta maemunasira'avi ema Viya tichuruka'avi eta vitaresira, taicha vecha'i eta maepenina'avi'i viti achaneana eta taka'e vimutu'iware vepena'i.

¹⁵Ema Cristo, máepenina'avi'i te crusu. Eta taka'e, tatuparaka vítsirijikawa vikaemataneaka ema. Tási'a puiti, viti machanera'avipa. Waipa vítijirikawaima'i. Émapa técha'i eta vítaresira, taicha eta machavira'i títareka.

¹⁶Eta taka'e, viti vé'ikanaipa ema Cristo, étainapa vipanerechayare eta vítsiwachiraipa eta vítaresira. Waipa vé'ikaima'i eta apana panereruka taye'eana'i te juka apake'e. Étaipa kape juka viásinekene'i wá'ichu visuapapajika'ini ema Cristo, vímijachaichucha ema vikuti'i viti achaneana. Puítisera visuapa'i émaira'i Machichakene'i ema Viya.

¹⁷Puíti'ipa viti viúrujiakana'i ema Cristo, apana'avipa. Vínajikaipa eta viye'erepini'i tamaurikeneana. Tamutupa arairu'i puiti eta viye'erepiana.

¹⁸Ema Viya, tétavikawa'i eta máuriwa'i eta viye'e. Ema, mawara'a'i vipauchayare'i ema. Mawara'a'iware makaepa'ayare'ini eta vipikakarasirawa'i eta víkuñayare táichavene'i eta vipekaturana.

¹⁹Tási'a, ema Viya mawaneka ema Machicha Jesucristo, apaesa makaepa'ayare'i eta vipekaturana vimutu viti vikasiñawana eta maye'e. Tási'a, tájina eta vipikakarasirawaima'i eta víkuñaina'ini.

²⁰Taka'e, víti mawaneru'avi'i ema Cristo víchu'awakayare'i namutu. Tímikutijirikawaipa émakenena'ini máechejikawaka'ini ema Viya. Puiti viyaseakawaka'i namutu nakasiñawa maye'e ema Jesucristo; wáipaware tipikakarakawanaima'i eta náikuñaya'ini.

²¹Ema Cristo, tájina mapekaturaina'ini. Étasera mawaraira'i ema Viya viúchuku'ayare víti, émapa ema Cristo tamuriaka'i eta vipekaturana. Puiti, tájinasarepa víchirawaima'i, tájinawarepa viviurewaina te mamira'u ema Viya vimutu viti viúrujiaruana'i ema Cristo.