Read Ignaciano Gálatas 4 Bible Online

Gálatas 4 - Ignaciano bible

Gálatas 4

¹Nuwara'a nímikutiarachiná'eyare: Te matiari'ipuka ema achane kamuri'i eta máima'akeneana te mapena, te matiari'ipuka ema machicha, té'esera te amuyaicha'a ema, natiari'iyare'i ena téchapajirikanayare, énapa ena tímitukanayarewa, tayanapane émaina makaye'e tamutu eta tima'akareana.

²Natiari'ii' ena achaneana techapajirikana, wa'i náisapaima'i mamápachichijikaima'i eta máima'akeneana'i ema maiya, tiámainukawasera te máima'apa ema maiya eta máechemaraiwa'i ema machicha, máisapainapa eta máemamaka eta máima'akeneana'i.

³Ene vika'e'i víti kape juka viásinekene: te wicha'a vímati'ini ema Cristo, vikutini'i ena amaperuana, tipamika'avi'i vé'ika eta tamaurikeneana ena tiavi'ana te juka apake'e ena ereanana.

⁴Émasera ema Viya, te máima'a tiuri eta táitauchirawayarepa eta mapanereru'i, máewatakapa ema Machicha te juka apake'e. Ema Jesús, tiáchanechawapa te suju'e esu maena. Eta máuchusira'i, viwasima'i eta vikake'era'i viti achaneana, eta majurusira'i, tikarawa'upa eta viye'erepiana viti israelítana,

⁵eta tímiteka'i ema, mawara'a'i tikuchuku'a'aviyare viti achaneana, mawara'a'iware vimutu vijakapakareyarepa me Viya, machicha'aviyarepa.

⁶Puiti, eta machichaira'eripa ema Viya, tíjaraka'eipa ema Machanewa Viya tiáwa'aka'eripa te esamureana. Émapa témecha'e'i maye'e ema Viya, tímituka'epa eta eyujarauchirawaya: “¡Tátachicha! ¡Vikaiyakene!”

⁷Taka'e'ira puiti waipa ákuti'ini ena musuana, puiti machicha'epa ema Viya; eta machichaira'e'i asulupaya ema Viya puiti vijachapainapa eta iúchukuirayare.

⁸Kape juka iásinekene'i eti, wicha'a ímati'ini ema Viya, wá'iware epikaucha'ini ema, énachucha epikauchawaka'i ena esiñarajiana, wa'ineni viyanaina'ini.

⁹Puítisera, ímatipa ema yátupikene'i Viya, tási'a, éneichuware ema Viya tímati'ewakapa eti, ¿tája'a takayema ewara'awarepa echáwayare eta ekasiñayare eta nasiñarajiana, naiturereana paureana, nawara'aipaware kamusura'eanayare?

¹⁰Tája'a takayema enasi'ichu'i epikaucha eta piéstamu'uana, sacheana étapa eta aracherumu'uana kaje añuana

¹¹¡Ichape eta néñamirawa'i eye'e tájurikati támapurujipa'i eta juka nímitusira'e'i!

¹²Esamanucha'a, nuparapenaveana, nuwara'a ákutinu'ini nuti taicha nuti nuchawaipa'i nukuti'eipa eti. Wa'ineni etaina'ini taichanu eta taja'apuka icharakanu'ini.

¹³Eti etupiruwa'i ejákapanu kape te nítekainapa eta ara eye'e, écharichu'i eta nukajumairapa'i te nítekapaucha'epa, etupiruwa'isera esuapa eta numetarairu'i eta eye'e.

¹⁴Wa'i ekaeka'inu'ini eta nukajumairapa'i, wá'isera épurunu'ini, tiúri'i eta ejakapiranu'i tímikutijirikawaine'i ángelenuina'ini maye'e ema Viya, ¡takutipa émakenena'ini ema Cristo Jesús!

¹⁵¿Tavi'apa eta iúrisamurewa'i te jena sácheana eta návi'aira'i eye'e? Nímati'i tétavikawa'i eta émunasiranu'i, te nukamunuwa'i, ewara'a'i íjarakanu eta ekaye'ekeneana, tájina éñama'ini, ichape eta nukunachira'e'i, taka'e, máeje'a néchejisi'a'e eta émunasiranu'i.

¹⁶¿Eti ímijachaipapuka nukatichira'e'i eta numetasira'e'i puiti eta juka yátupikeneana?

¹⁷Ena nani téchapajirika'eana'i, wá'isera tátupiruwa'ini eta náemunasira'e'i, nawarairachucha típichasika'eanayare apaesa wa'i ekusuapanu nuti, eta waipa ekue'ikanu'i, nawara'a'iware é'ikayare eta naye'erepiana apaesa énainapa échapajirikayare'i.

¹⁸Tiuri, nuti wa'i nukaticha eta ítatiraina ena apamuriana achaneana, táurisera eta náemunasira'ena tákuti eta némunasira'e'i nuti, eti apanaware ewapinawayare tákutirichu te nutiari'i'i eye'e.

¹⁹Nuchichanavechichana, tétavikawapa takatiwa nusama taicha eta ímipanereresiranu'i, tikuti'ine'i súkani esena tikatiru'apa, taicha tikati'i susama eta amuya, ene nuka'e'i nuti eta nukatisamurerawa'i, néñamirawa'i icha eti, nuwara'a ákutini ema Cristo eta máuriwa'i, tiámainukawa te níma'a'epa ekutinasipa ema eta máuriwa'i, núrisamurenapa ícha.

²⁰¡Eta taka'e, nuwara'anecha níja'uchawa'ini nítekapaucha'e, nútijakaruwainapaini néchejirikawa'ini eta eye'e eta nímitusira'ena'ini, ichapemuri'i eta ímipanererésiranu'i!

²¹Nuwara'asera emétakanu eti ewara'ana é'ika eta wanairipiana: ¿Wa'ipuka esama'ini eta taechejiriruwa eta Takapika'ukene Ajureka maye'e ema Abraham?

²²Táechejisi'a'i ema Abraham, apinanaira'i ena machichanaveana ajairana: Ema máinapure'i machicha tikaijare'i Ismael, esu maena tikaijaru Agar suwanara'i esu Sara, ema máekenereru'i machicha tikaijare'i Isaac. Esu Sara, mayenakene'i ema Abraham.

²³Esu Agar, te sukachichainapa ema Ismael vikutinasichu'isera viti. Ésusera esu Sara máijarakapa ema suchicha'i Isaac, taicha ema Viya, maitauchayare'i eta maechejiriruwa maye'e ema Abraham.

²⁴Puiti, nuwara'a nímikutiarachina'eya naye'e ena nani apinana esenana. Esu Sara, tájina suímatiya'ini eta wanarakakare, nájina na'apapirika'ini esu, ene vika'e'i víti eta vé'isira'i ema Cristo, nájina ti'apapirika'avima'i, wa'i suákuti'ini esu Agar, tapamika'i eta suématanerepi taicha sirvienta'i esu, ene naka'e'i ena israelítana napamikasiwa'i naicha taye'e eta naye'erepianaini.

²⁵Taka'e esu Agar esupa tiama'i tejena te mávi'aipa'i eta te anuke'e mari tikaijare'i Sinaí, táupa'iwa eta provincia Arabia, náwasa'i ena suámariekeneanaini esu Agar. Puíticha ena nujaneanana tachichanaveana'i eta Jerusalén nanasi'ichu'i eta tapamisirawaka'i eta wanairipiana.

²⁶Jarari'isera eta apana'iware awasare tikaijare Jerusalén, tiávi'a'i te anuma, víti tachichanaveana'i, waipa vítiparakaina'ini tapamika'avi'ini eta wanairipianaini.

²⁷Ema Viya máechejisi'a'i eta te Takapika'ukene Ajureka eta juka ani taka'e'i: “Piti esena macheruvini'i, Piti tajina pimatiya'ini pikachicha'ini eta pítaresira'i; pipiárarekapa eta piurisamurewaina piti tájina pimatiya'ini eta takatiwa eta amuya te tinakana.”

²⁸Nuparapenaveana, eti ekuti'i ema Isaac: machicha'e'i ema Viya taicha etupara'aichu'i.

²⁹Taka'e, ema Ismael, suchicha esu Agar, makatianakapa ema amuya Isaac, ema suchicha esu Sara máijararu'i ema Machanewa Viya, puíticha, tanasi'ichu'i eta nakatianasira'avi'i ena té'ikana'i eta wanairipiana vimutu viti máwa'aruana'i ema Machanewa Viya.

³⁰Tási'asera ¿taja'a takayema eta Takapika'ukene Ajureka? Ani taka'e: “Piwaneka esu Agar émapa ema suchicha, nayana náuchuka eta piye'e. Taicha wa'i táurika'ini mave'a'ini eta píma'akeneana te táitekapapa eta pépeniraina, makarichuyare ema pichicha suye'e esu piyenakene tive'ayare tamutu.”

³¹Nuparapenaveana, ene vika'e'i viti, wa'i wakuti'ini ema suchicha esu wanaraka, vikuti'i víti ema Isaac eta tamajinaira'i eta vipamikasiwaina'ini eta vítauchiraya eta wanairipiana, maicha ema Jesús.