Read Ignaciano Gálatas 5 Bible Online

Gálatas 5 - Ignaciano bible

Gálatas 5

¹Puiti nuwara'a yátupina ákaikutiara eta makatiuchira'e'i ema Cristo. Eta waipa étaparakainayare ítaucha eta wanairipiana, étumechawapa, wáipaware ekuisapawa ákuti ena musuana taichavenena eta wanairipi.

²Esamanucha'a. Nuti Pablo nutupiruwa numetaka'e, te ísapawapuka naikutiaracha'e, tímikutijirikawa'i tépurukare'i eye'e ema Cristo, tímikutijirika'iware wa'i márata'a tikuchuku'a'e eti.

³Énerichuware numetaka'e, namutu nákani ajairana tísapawanayare nanaka eta naikutiara, takamunu'i náitauchayare tamutu eta wanairipiana, tájina ánichichaima'i náejeki'aima'i eta.

⁴Eti enerejiruwana é'ika eta wanairipiana, ímijachaipapuka ejákapakareipa maye'e ema Viya, émepururekaipasera eta máemunasira'e'i ema Viakenu Jesucristo. Émepurureka'iware eta máimikatasira'e'i ema Viya.

⁵Vítisera viti vikasiñana'i ema Jesucristo vikunewaipa eta majakapira'aviya ema Viya máichavene'i ema Machanewa Viya eta máwa'asira'avi'i.

⁶Eta máwa'asira'avi ema Jesucristo, wa'i étaparakaima'i eta vinaka'ini eta vikutiarana te viake'e. Takarichu tikamunukare'i eta vikasiñairayare yátupina ema, eta vikasiñawaira'i me Viya vémunakainapa namutu.

⁷Eti, iúrinipa'i eta é'isira'i ema Jesús. ¿Tája'aserapuka takayema'i eta ewaraira'i ekainajiruwa Ísapawayarepa tiyuruka'eana, tíminajika'eanayarepaini eta yátupikeneana'i?

⁸Watupiruwa wa'i émainaichu'i ema Viya ema tichu'a'e'i eta esuapirayare'i.

⁹Échapawaicha “naye'e ena tiyurura'iana, machu napareaka'e”,

¹⁰nútisera nukasiñawa'i eta me Viákenu eta mamaisapira'eyare ínajikawa. Németeaka'i wa'i ínajikaima'i eta nímiturapiana'i, émasera ema Viya técha'i eta juka náikuñayare nákani tiwara'ana'i ti'apapika'eana.

¹¹Nuparapenaveana, te etainaicha'a'ini nukametarairu eta enasiraya eta ikutiarana, nemeteaka ena tikatichanuana'i waipa nakupanajirikanu'ini, taka'e te nukametarairupa eta maechejiriruwa eta taye'e eta maepenira te crusu ema Viakenu Jesucristo, waipa takuimiyusemaka'ini.

¹²Ena nani tipamika'eana'i enakaya eta ikutiarana, ¡náechatikawaicha'a énajiwaina Nuwara'asa yátupinapa'ini náechati'ikawaini!

¹³Taicha eti nuparapenaveana, wa'i étaina tímichu'a'e'i maye'e ema Viya eta é'ikayare eta mawanairipiana ema Moiséini, wá'iwaresera étijirikawaima'i íchayare'i eta ewara'akeneana'i tamaurikeneana, ema Viya tíchu'a'e'i, mawaraira'i étijiwaya ítatijirikakayare'i taicha eta émunasirakakaina'i.

¹⁴Tamutu eta wanairipiana etanaichu eta tawanairipi: “Pémunaka ema piparaepiya takuti eta pémunasirawa'i píti.”

¹⁵Wa'i táurika ekatichajirikaka'ini, wá'isera táurika ekatianajirikaka'ini, machu étijiwaina ekamitiekene'akaka.

¹⁶Esamanucha'a: Ema Machanewa Viya mawara'a tímikataka'avi eta wa'i vikusuapa eta tajamurachakeneana'i eta viake'eana.

¹⁷Étasera eta viáke'e wa'i táisapa eta víchiraina eta táurikeneana, étachucha tawara'a vicha eta tajamurachakeneana'i, eta taka'e, ichapemuri'i eta takanaraira'i ema Machanewa Viya, taka'e, ema Machanewa Viya makanara'iware eta wa'i vikukicha eta tamaurikeneana. Eta taka'e puiti eti waipa étijiwaima'i ícha'ini eta ewara'akeneana.

¹⁸Eta taka'e, eti, te émainapuka ema Machanewa Viya tímituka'e, máeje'a eta íchiraina eta táurikeneana, wa'i étaparakaima'i eta episira eta íkuñayarepuka, táichavene'i eta jákani éjekapirawanapuka taye'e eta wanairipiana.

¹⁹Tímatikareana'i eta tamaurikene'i eta náichakeneana ena tisuapana'i eta tawara'akene'i eta náke'e: Nave'apa esu apana esena, ésupa esu esena suve'apa ema apana achane, narari'i ena tive'akakana'i ena nakutikeneana ajairana, tawayuasirawaka'i eta najamuraraiwana'i,

²⁰natanuka'i eta nasiñarajiyare, nakarawa'u'i eta iápemarekáre. Tikatianarekana'i tisemakakana'i, téteajirikakana'i. Apaesaichu nakamunu tisemanaipaware, énachucha nawara'a títukawana, nakachuriarakapa mákani achane, típutsimuriawanapa naye'e nákani apamuriana, waipa nawara'a tipauchakakana.

²¹Tikapinarukakanapa, tikapa'ianapa. Tikawa'arasianaware, piéstamareana, tamutuchucha naicha eta tájiparakana, puiti numetaka'eware nápechawa, takuti'i eta numetasira'e'i kape juka viásinekene'i, wa'i títujikawanaima'i tisiapana te máwasa ema Viya ena tíchana'i eta juka tamaurikeneana'i.

²²Emasera ema Machanewa Viya eta maematane, tíjaraka'avi'i eta vémunaraiwaya, viúrisamurerekawayare, tinarakainapa eta vipanereruana máicha, tíjaraka'avi eta vikamichiraya, vijapanura'iya máicha, vikajiraiwayarewa máicha, vétaviuchaya eta viúriwayare,

²³Eta viuriwaina vitijiwa vikaratawa. Je'eware puiti tajina wanairipina tarata'aima'i takanara tamutu eta juka.

²⁴Taka'e, viti vé'ikanaipa ema Jesucristo, waipa víchaima'i eta tamaurikeneana'i tajamurachakeneana'i eta viáke'e taicha tamutuipa'i vikapaka.

²⁵Eta mawa'asira'avipa ema Machanewa Viya, vísapawaya wámutu eta mawara'akeneana máichayare eta viáke'e.

²⁶Waipa táurika'ini ekasiñawawaika'ini ekapinarujirikaka'ipukaini, wá'isera etanukaima'i eta semanere maye'e mákani echamuri.