Read Ignaciano Gálatas 6 Bible Online

Gálatas 6 - Ignaciano bible

Gálatas 6

¹Nuparapenaveana, te natiari'ipuka íma'a téjekapawana'i ena vichamuriana, échejikayare eti ímatiekene'aripa maicha ema Machanewa Viya, táurisera eta échejirisiraina. Ekauneuchawa eti apanawa, machu iákipaikawa taye'e eta mákipaisiawa'i ema echamuri.

²Ímikatakaka eta ekatiuchirawaina eta jákani íchararakawana'i, ene taka'e'i eta ítauchira'i eta mawanairipi ema Viákenu Jesucristo, étaipa eta vémunasirakakayare'i.

³Taicha narari'i ena tímijachawana'i wa'i tiákipaikawanaima'i taye'e eta pekatuana, wa'i ekuwayuakawa, wa'i takaemuñawakare'ini, taicha eta juka wa'i tanekapakare.

⁴Wá'isera tákaemuñawakare wáka'e'ipukaini, nuti wá'ichu nusipekatura, núripana naye'e ena apamurirana, te viúri'ipuka, vimatinairayarechucha, víti véchinawa'i eta viúriwa'i eta vítaresira'i.

⁵Véchakenewapachupa víti eta vítaresiraya maye'e ema Viya.

⁶Nutuparaka'e eta apana, ekajiyare eta íma'akeneana mákani tímituka'e eta máechejiriruwa ema Viya, taicha eye'eyare'i eta máimiturapiana eta tiúricha'eyare'i.

⁷Wa'i ekuwayuakawa eti: taicha najina tirata'aina tiwayuakina ema Viya. Taicha mákaini ticha eta tamaurikene etaichuware tijararekayare eta maitaresira.

⁸Te icha eta tájiparakana tawara'akeneana'i eta iáke'eana, étaichu'i tikamitiekene'a'eyare eta ítaresirana, tímikuñaka'eyarewa, té'esera icha eta táurikeneana mawara'akeneana'i ema Machanewa Viya, yátupina táurina eta ítaresira. Íma'ayarewa eta iúchukuiraya, máichekuarakirenapa eta iúrikakarewaya.

⁹Eta taka'e, wa'i vikukainajiruwa eta víchira'i eta táurikeneana, wá'isera vikuyakujiekene'awa eta vikuchapira'i eta víkuchi'i maye'e ema Viya te táitekapapa eta jena sacheyare máijarasira'aviyare.

¹⁰Táitusiawa, te tatiari'inapuka eta vikamunukarewana naye'e ena achaneana, te víma'a'ipuka eta nakamunuirawa'i, vítijiwayare víchayare eta táurikeneana naye'e. Tavetijipa te éna'ipuka tipaucha'aviana'i ena vichamuriana'i taye'e eta juka vé'iru'i, vikajiyare'i ena.

¹¹¡Íma'a, ichapewakanecha eta juka nuletrana, nuwa'urupajipa nuti eta juka nukajureira'e'i eti!

¹²Ena nujaneanana israelítana, tétavikawa'i eta nasemanewa'i viye'e viti vikametarairu'i eta viúchukuiraya táichavene'i eta máepenira'i ema Cristo te crusu. Tási'a, ena nani tikamesajirika'eana'i nawara'a enakayare eta taikutiara eta iake'eana, ena nawara'a témemunakawanayare naye'e ena nujaneanana, apaesa waipa nakupanajirikawaka, nawara'a na'apapikayare'i eta nasemanewa.

¹³Nawara'a'iware tikunachawanayare eta nakamesaira'e'i enaka eta ikutiara eta te iáke'e, énayapasika wa'i náitaucha'ini támutu'ini eta wanairipiana.

¹⁴Nútisera, eta nítaresira'i, nuwapinawa'i ichape maicha ema Jesucristo, máepeninanu'i te crusu níchavene'i nuti. Taka'e, nuti apana nínajikaipa eta né'isiraini'i eta taye'erepiana eta apake'e, waipa nútiparakaina taye'e, taicha eta máepenira'i níchavene'i nuti.

¹⁵Tajinapa taichakenerepina eta vinakapuka wa'ipuka eta vikutiarana eta te viake'eana. Étasera eta tiuripana veperajikaya, étara eta táepanirawa'i arairu eta vítaresira.

¹⁶Eti, te esuapa eta juka nímiturapiana'i eye'e, nuwara'a máijaraka'e eta iuriwaina ema Viya, máijaraka'e'ini táuriwaina eta epanereruana taicha eti yátupikene'i machanera'e'i ema Viya.

¹⁷Tiuri puiti, németeaka nuti tájina táeñamawakare'ini eta esuapajiraiwa'i eta nuye'e, wá'iware ísapawa'ini ena nákani tikamesajirika'eana'ipuka é'ika eta naye'erepiana, eta juka nujarana'i te náke'e, eta tímereuchanu'i eta yátupikenera'i eta nukaemataneasira'i ema Jesucristo.

¹⁸Nuparapenaveana, nuyaseucha'eparaka emutu eti me Viákenu Jesucristo, táetaviucha'ini eta iúrikakarewaya máicha.