Read Ignaciano Efesios 1 Bible Online

Efesios 1 - Ignaciano bible

Efesios 1

¹Nuti Pablo, maye'enu'i apústule ema Jesucristo, taicha manerejirunuichu'i ema Tata Vikaiyakene, nawaraira'i nímitukaya ena achaneana eta máechejiriruwana, tási'a puiti, nukajure'e eta juka carta eye'e eti nuchamuriana ekawasana'i taye'e eta awasare Éfeso, taicha eti machanera'eipa ema Viya, táurikene'i eta é'isira'i ema Jesucristo.

²Nuwara'a makatajika'e'ini ichape ema Tata Vikaiyakene, emapa ema Viákenu Jesucristo, náijaraka'e'ini eta táuriwaina eta epanereruana.

³Nuti nukunachaparaka ema Viya, ema Makaiyakene ema Viákenu Jesucristo taicha ichape eta máimikatasira'avi'i táichavene'i eta viúrujiasira'i ema Cristo. Puiti tachicha'avi'ipa eta anuma, ichape eta viúrikakarewa'i maicha ema Machanewa Viya.

⁴Akane, te tamira'u eta táepanirawapa eta apake'e, ema Viya tinerejika'avipa maye'e ema Machicha Jesucristo apaesa vitinapa machaneranayare ema, eta taka'e tajinainapa eta vipekaturaina,

⁵te mapanerechapa maewatakapa ema machicha Jesucristo eta majakapira'aviyare'i vimutu viti vikasiñana'i, yátupikeneyarepa machicha'avi, eta juka mapanereru'i ánakiapaipa'i te taepaninewacha'a eta apake'e.

⁶Taicha mawara'a'i vijirauchayare ema, vítsirijikawayare'i eta táetaviuchirawa eta máemunasira'avi'i, mawara'a'iware ichape eta viúrikakarewana táichavene'i eta viúrujiasiraya ema máemunarukene Machicha.

⁷Ema Viakenu Jesucristo máepusaika'i eta maitine te crusu maepenine'i, mawaraira'i tikatucha'aviyare'i, makaepa'apa eta vipekaturana, taichavene eta maemunasira'avira majapanuira'avi'i.

⁸Taichavene eta makajaraisira eta viye'e viti, eta maitukakene etapa eta maitupajijiasirawa,

⁹Taka'e timimaticha'avipa eta mapanereru'i maunaru'i te vuicha'a maitaucha'ini, taka'e mawanekapa ema machicha Jesucristo mawaraira'i maitauchayare'i eta mawara'akene maicha.

¹⁰Tamutu eta juka mapanereruana'i títauchawayarepa'i, jákani tatuparakipa'i. Te jena sácheyare manerejikaripa, ema Viya manakainapa ema Machicha Jesucristo akenukakeneyare'i, téchayare'i tamutu eta táichararakawana, nasuapayare'iwa namutu ena tiávi'ana'i te anuma, énapa ena tiávi'ana'i te juka apake'e.

¹¹Eta maye'e ema machicha Jesucristo ema Viya tinerejika'avipa tatiwa'i apaesa vijachapa eta maikure'avi'i, eta taka'e eta maitauchirayare'i ema Viya eta mapanereru'i.

¹²Viti vínapuikana'i vé'ika ema Cristo, mawara'a'i tiúriyare eta vítaresiraya, apaesa nakunachayare ema Viya ena apamuriana achaneana eta máimikatasira'avi ichape.

¹³Takutikene eti, te tínapukainapa esama eta máechejiriruwa ema Viya, asulupaya ema viákenu Jesucristo, eta taka'e machanera'avipa ema Viya, tási'a, vijachapapa ema Machanewa Viya ema maikure'avi'i.

¹⁴Eta máwa'asira'avi'i ema, títametaka'aviparaka eta vijakapiraya eta víkuchiana'i maye'e ema Viya te táitekapapa eta viúchukuiraya viti machichanaveana'i, tási'a, tétavikawainapa eta vikunachirayare ema Viya taicha ichapekene eta máimikatasira'avi'i.

¹⁵Taicha nusamairikapa eta yátupira'i ekasiñawa maye'e ema Viákenu Jesucristo étapa eta émunajirisirakaka'i emutu eti machanerana'i ema Viya,

¹⁶Tamutu'i sacheana nuyaseucha'e'i nu'asulupayacha'i ema Viya eta ekasiñawaira'i me Viya.

¹⁷Ema, makaiyakene'i ema Viákenu Jesucristo, máetaviure'i eta majaraiwa te mávi'a'i te anuma, nuyaseaka'i máijaraka'e'ini eta échemaraiwaina'ini maicha ema Machanewa Viya, apaesa ímatiekene'a'ini yátupina eta emétakasiwanaya eta mapanereruana'i ema Viya, nuwara'a ímatipaipaichaini ema.

¹⁸Nuyaseaka'iware ema yátupina eta ekaikutiarairaya, eti máichu'akeneana'i ema, eta táetaviuchirayare'i eta viúrikakarewayare te jena sácheyare vikuchapakene'i, nuyaseaka'iware ekaikutiaraya eta táetaviuchirayare'i eta táurikakarewayare eta viávi'aya te anuma, víkuchi'i viti machanerana ema Viya.

¹⁹Nuwara'a ekaikutiaraware eta táetaviuchira'i eta máitupajijiasirawa'i ema Viya, wá'ikene tivitaima'i ema. Makaemataneaka'i eta vítaresira, mawaraira'i viúripanayare viti vikasiñawana'i maye'e,

²⁰Ema Viya máimereka'i eta máitupajijiasirawa ichape te makaechepukapa ema Cristo te máekari, makaejakapa ema te mawaure taye'e eta anuma mávi'a'i puiti,

²¹ema Cristo, émaipa ichapekene'i akenuka naye'e ena ángeleana, tétavikawa'i eta masuapakarewa'i naye'e, énerichuware ena éreanana, mapamikawaka eta nasuapiraina, ema, tétavikawa eta makapika'uira'i, nájina nákuti'ini ema, nájinaware tikachurikaima'i, apajara'iyare'i eta akenukaira ema.

²²Ema Viya makaejaka'i ema técha'i tamutu eta tatiari'ikeneana, émaipa Vikaiyakene'i vimutu viti machanerana.

²³Víti, eta viúrujiasira'i ema, tímikutijirikawaipa'i máke'e'avi'i te juka apake'e, vikaemataneaka'i eta táurikeneana tímikutijirikawa'i émaina'ini makaematane'ini, taicha tamutu eta víchakeneana'i, ema técha'avi'i, tétumecha'avi'iware.