Read Ignaciano Efesios 5 Bible Online

Efesios 5 - Ignaciano bible

Efesios 5

¹Puiti eti machicha'eipa'i ema Viya, máemunarukene'eipa, tási'a ákutipa ema eta máuriwa'i.

²Émunajirikakayare eta ítaresiraya. Ekutiyare ema Cristo eta máemunasira'avi'i. Ema, makurisamurechaipa ema Maiya eta máimijararesirawa'i víchavene'i víti, makuti'i eta uvesa nakaparu'i, eta námawa'u'i me Viya.

³Eta machanera'eraipa ema Viya: waipa táurika'ini ícha'ini eta tú'usikare. Wa'isera ekupanerecha ícha jákani tiámana'i eta tamaurikeneana. Wá'iware takuwayuaka'e eta tájiparakana.

⁴Wa'i ekunaka te ejáka eta echéjirirukawana titsiri'akarepiana, tájiparakakeneana, taicha tájina takunachakaréwaina eta. Tamutusera eta échejisiranaya, amairipikenena eta e'asulupayachiraya ema Viya. Jé'eware, eta iúri'akene'i.

⁵Ímatiekene'aipa eti, wa'i tiúchuku'anaima'i mákani achane te mave'apuka esu esena apayena, esu esena te suve'apuka ema achane apaima; nákaniware amaperuana tive'ajirikakana'i; mákani achane mave'apuka ema maparajairawa; (ena tawayuakawaka'i eta najamurachirana, énaichu'i tikasiñarajiana). Namutu ena nani tímereuchawana'i wa'i machaneranaina'ini ema Cristo, wa'iware tisiapanaima'i te máwasa ema Viya.

⁶Wa'i ekuisapawa nákani nawara'a nawayuaka'e te náechejiriruwa súnsurupiana, napamisira'eya ícha eta júkana tamaurikeneana, taicha eta júkana, eta tiviuchawakayare nákani masuapajiraira'ana'i me Viya, murakayare eta náikuñayare.

⁷Tási'a, ejaneakawa, machu ákuti ena nani tíchana'i eta júkana tamaurikeneana.

⁸Échawaipa taká'eni'i eta ítaresira'i akane étaichu iámapirikaini'i iáwaku'a'i te timapiku. Puítisera eta iúrujiasiraipa ema Viya, tijara'ipa eta ítaresira'i,

⁹tási'a ímerekayare eta emíkauchirayare ena apamuriana achaneana, étapa eta tapachinawa'i eta ítaresira, étapa eta yátupira'i eta é'isira'i ema Viya.

¹⁰Tamutu sacheana ekarawa'uinawarepa eta mawara'akeneana'i máuriruana'i ema Viákenu.

¹¹Ejaneakawa eti, machu iápechawa ícha eta tamaurikeneana náichakeneasa'i ena achaneana te timapiku. Étisera emíkauchayare eta naichakeneana'i tamauriwana.

¹²Taicha tétavikawa'i eta tatsiri'akarewa'i eta náichakeneana'i eta nayumurusirawa'i;

¹³Tási'asera, natiari'ipuka ena tiwara'anaya náinajikayare eta naichakeneana'i, naima'ayare eta taiñe'iwa'i.

¹⁴Eta emíkauchirawaka ena, takuti eta táechejiriruwa eta jirasare, ani taka'e: “Péjamiuchawaichu eta pímakakarasirawa'i; péchepuka pímikutijirikawa'ini pépenakenena'ini, taicha eta pekatu, emasera Cristo timikauchaviya.”

¹⁵Eta taka'e, yátupina eta ejaneasirawaina. Wa'i ekukuti ena máecharaireana. Ímerekawaya eta ítupajijiasirawa'i.

¹⁶Ekamapurawacha'a tamutu sácheana eta ímitusirawaka'i ena achaneana, taicha maverana ena tíchana'i eta tamaurikeneana.

¹⁷Takuija eta esunsuwanaina. Epanerechayare, apaesa ákaikutiara yátupi eta mawara'akene'i ema Viákenu.

¹⁸Wa'i ekukawa'a taicha eta tikauyayakare'i tikamitiaka'e. Ísapawasera émaira máecha'e ema Machanewa Viya tamutu eta ítaresira.

¹⁹Eta ímiturapiyare naye'e ena echamuriana, eta salmo étapa eta jirásareana majiria'uana ema Viya, eta ekunachiraina'i ema Viákenu, iúrisamureyare'i yátupina te esamureana eta ejiraira.

²⁰E'asulupayachaparakaya ema Vikaiyakene'i te máijare ema Viákenu Jesucristo taye'e tamutu jákani íchararakawana taicha tási'akeneana'i eta maye'e.

²¹Emutu eti, etijikaka esuapakaka táichavene'i eta epikauchira'i ema Viya.

²²Éti'ipa eti esenana ekaimakeneanaripa'i, tituparaka'e'i esuapayare ena ímanaveana, takutiyareichu eta esuapira'i ema Viákenu.

²³Taicha mákani achane, tatuparaka'i ema, téchaya eta máitatiraya esu mayena, takuti'i ema Jesucristo ema técha'aviyare'i vimutu viti vé'ikana'i taicha ema make'e'i. Émaichuware ema tikatiucha'aviya vimutu viti machanerana'i.

²⁴Tási'a, takuti'i viti machanerana eta vipikauchira'i visuapa'i ema Cristo. Ene naka'eyare'i ena esenana, nasuapayare'i napikauchayare'i ena náimanaveana'i te tamutu.

²⁵Éti'ipa eti náimanaveana'i, tituparaka'e'i émunakawakayare ena eyenana, takuti'i eta máemunasira'avi'i ema Jesucristo viti machanerana'i, ema, tímijararekawa'i víchavene'i,

²⁶Taicha mawara'a'i tisantucha'aviyare'i, tási'a, masipasina'avipa eta viáchanewana eta visuapira'i eta máimiturapiana, eta masipasira'avi'i taye'e eta maechejiriruwa etapa eta vikaikachasirai.

²⁷Taicha mawara'a takuija víchirawaina viti machanerana te táitekapa eta sache vitupi'amirauchirayare ema, vétaviuchayare'i eta viúrinawaya, tájina véchipejikaima'i, tájinaware tijarareka'avima'i, apanaima'i víchawa, mawara'a'iware tétavikawayare'i eta visantuwaya. Yátupi matapiraware'aviya víti.

²⁸Ene eka'eyare'i eti náimanaveana'i, ímerekayare'i eta émunasira'i ena eyenana, takuti'i eta émunasira'i eta iáke'eana. Mákani máemunaka'i esu mayena, tímikutijirikawa'i eta máemunasirawa'i ema.

²⁹Taicha viti achaneana, eta vítaresira'i, wá'ikene vikatichaima'i eta vécheana, tétavikawa'i eta vijaneasira'i, véchapajirika'i, vénika'iware eta véche, ene maka'e'i ema Cristo eta majaneasira'avi'i, máechapajirisira'avi'iware viti machanerana,

³⁰víti tímikutijirikawa eta táunawana'i eta máke'e táichavene'i eta viáwa'asira'i ema. Taicha eta make'e'i ema Viakenu Jesucristo.

³¹“Échawaya eta táechejirisira'i eta Takapika'ukene Ajureka, ani taka'e: “Mákani amaperu achane ésupa esu mayenayare, te tikaimanapa, tatuparakawaka'i típutsikawanayare'i eta napenana ena tikachichana, énajiwainapa títátikakanayare, eta nave'akakaira'i, tímikutijirikawaipa etanaine'i eta náke'eana.”

³²Te juka timerekawa eta taichapewa eta takayemakene eta tayumururewakene'i me Viya. Taka'e, puiti nímituka'e, viti machanerana ema Cristo, eta viúrujiasira'i ema,

³³Tási'a, nuwara'a yátupina ákaikutiara eta juka nukayemakene'i, tituparaka'e'i eti ajairana, yátupina eta émunasiraina ena eyenana takuti eta émunasira'i eta iáke'e, éneichuware eti esenana, tituparaka'e'i epikauchayare'i ena ímanaveana.