Read Ignaciano Efesios 6 Bible Online

Efesios 6 - Ignaciano bible

Efesios 6

¹Éti'ipa eti amaperuana, yátupina eta esuapajiraiwaina naye'e ena tikachicha'eana, taicha tituparaka'e'i ene eka'eyare'i eta é'isira'i ema Viákenu.

²Eta juka tinapuisina taye'e eta maechejiriruwa eta takachanekene eta maikure'avi'i ani taka'e: “Epikauchayare ema eya, esupa esu ena,

³Apaesa iurisamure taimiyanawa eta itaresira te juka apake'e.”

⁴Énerichuware, eti náiyana, náenana, wa'i ekuimiyusemaka ena echichanaveana taye'e eta ewanesirana, tauri eta ekawanairipira, apaesa napikaura'i eta najurusiraina, énajiwayare tikaratakawana, ímitukawaka tamutu eta máimiturapiana ema Viákenu, apaesa nasuapajira'i.

⁵Énerichuware eti ekakenurekana, tituparaka'e'i esuapajira'iyare naye'e ena iákenuana'i te juka apake'e. Epikauchawakayarewa, émunakayarewa, táuriwaina'ini eta ekaemataneasira'i, takutirichu eta táuriwa'i eta ekaemataneasira'i ema Cristo.

⁶Ewapinawayare'i te esamureana eta ekaematanera, wa'i takukarichu te natiari'i ena iákenuana'i te emira'u, ewarairainachucha eta nakunacha'e, wa'i ekuyakujiriri'a eta ekaemataneraina taicha eti machanera'e'i ema Viakenu Jesucristo, ímiyanawayare eta ichira eta mawanairipiana ema Viya.

⁷Ewapinawayaresera eta ekaematanera, takutinasi eta ekaemataneasira ema Viya, taicha wa'i enaina ena achaneana ena ekaemataneaka'ini.

⁸Taicha écharipa'i emutu eti, vijakapayare eta víkuchi'i maye'e ema Viákenu te vítaucha'i tamutu eta táurikeneana, wa'i manerejikaima'i nákani makenurepuka énapa ena tikakenurekana'i; vinunayare'i taye'e eta víkuchi'i.

⁹Énerichuware eti nákenuana, tituparaka'e'i iúriyarewa naye'e ena echanerana, ejapanuyare ena taye'e eta ewanesirana, wa'i ípikararerekaima'i te ewanesirana. Ínunayare'i échawa eta matiari'ira'i ema Iákenu'iware eti apanawa, ema tiávi'a'i te anuma, taicha ema, nájina máepurukenéna ena achaneana.

¹⁰Puiti nutuparaka'eware, nuparapenaveana, ekasiñawa yátupina maye'e ema Viákenu apaesa máijaraka'e ema eta matumewa étapa eta máitupajijiasirawa.

¹¹Akasiñawa taye'e eta maitupajijasirawa ema Viya eta maijararu'e'i, apaesa árata'a te taitekapa'aka'e eta mawayuaraki ema wínaraji, mawaraira'i timiakipaika'e

¹²Taicha wa'i wakanara'ini ena vikutikeneana achaneana, ena vikanarakeneana'i ena'i ena kamurikeneana majupa'ana ena tiavi'anaini te anuma ángeleanaini, enapa techana'i akenukana'i te juka apake'e.

¹³Eta taka'e, akasiñawa me Viya eta maitupajijiasirawa, eta maijararu'e'i apasea árata'a eta ekanarairaina te taitekapa eta sache tiñe'ikare, tási'a eta erata'airayare ekanara, enasinapa eta étumechirawayare.

¹⁴Taka'e yatupina etumechawa, akasiñawa taye'e eta yatupikene apaesa etaina takatiucha'e ichiraina eta tauriwaina eta itesira tatupiruwa'ini.

¹⁵Wa'i takuechuki'a eta ekametarairuirayare, eta taurinakene maechejiriruwa ema Viya, naye'e namutu ena achaneana.

¹⁶Takutikene yátupina'i eta ekasiñawairaina maye'e ema Viya. Eta ekasiñawairayare timikutijirikawa'i iávi'uina'ini eta tamuruirapa'i eta mayukaraki ema wínaraji.

¹⁷Ekasiñawa yátupina, tákuti eta makasiñawaira ema suntaru eta maye'e casco te machuti. Iúnaka eta máechejiriruwa ema Machanewa Viya. Eta juka tímikutijirikawa'i eye'ena'ini espada eta ekatiuchirawa'i.

¹⁸Eyujaraka, eyaseakaya ema Viya máijaraka'e eta etumewaina. Eta eyujarasirana, takuija ta'apapirika'e eta máimitusira'e'i ema Machanewa Viya. Wa'i ekuyakuji eta eyaseuchirawaka namutu ena vichamuriana, majaneakawaka'ini ema Viya.

¹⁹Éneichuware, te eyujarasirana, eyaseuchanu'ini me Viya, apaesa máijarakanu'ini ema eta nuwapinairawa, takuijaware ta'apapirikanu eta néchejisirayare ena achaneana. Nuwara'a tasuapakare'ini naye'e eta najakapakarewa'i maye'e ema Viya.

²⁰Ema Viya tiwanekanu'i, námayare'i eta máechejiriruwa, nukutiyare'i mákani achane embajador maye'e ema akenuka presidente. Eta tikaviurenu'i puiti eta naemeratasiranu'i. Taka'e nutuparaka'e eyujarauchanu, eyaseuchanu me Viya, máijarakanu'ini eta nutumewaina eta nukametarairuirayare'i eta Arairu maechejiriruwa.

²¹Tiuri puiti, máima'a'einesera ema vémunarukene'i vichamuri Tíquico. Ema, títametaka'eyare tamutu eta níchararakáwa'i nuti. Tétavikawa'i eta máimikatasiranu'i eta vikaemataneasira'i ema Viákenu.

²²Eta taka'e, néwataka'i ema eta ara eye'e. Títametaka'eyare eta víchararakawa'i, tétumecha'eyarewa eti eta é'isiraya ema Viákenu.

²³Nuyaseaka'i ema Vikaiyakene'i émapa ema Viákenu Jesucristo, náijaraka'e'ini eti nuchamuriana eta enarasira'i te esamureana tamutu eta epanereruana, tajuruka'iwaréni eta ekasiñawaira'i eta naye'e, étapa eta émunasirakaka'i;

²⁴nuyaseucha'eware táetaviucha'ini eta iúrikakarewaya emutu eti yátupi'i eta émunasira'i ema Viákenu Jesucristo.