Read Ignaciano Filipenses 1 Bible Online

Filipenses 1 - Ignaciano bible

Filipenses 1

¹Nuti Pablo émapa ema Timoteo, mawanara'avi'i ema Viákenu Jesucristo, vímiamareka puiti eta juka viajure eye'e emutu eti vichamuriana'i, ekawasana'i te Filipos, énaipa ena najupa'ana. Taicha eti machanerana'i ema Viya, eti itati'i ema Jesucristo.

²Ema Tata Vikaiyakene, émapa ema Viákenu Jesucristo; náijaraka'e'ini táuriwaina eta epanereruana eti.

³Tatiari'i te nécha'e, nu'asulupayacha'i ema Viya íchavene'i eti;

⁴te nuyujarasirana, tétavikawa'i núrisamurewa eta nuyaseuchira'e'i emutu eti,

⁵taicha te jena sache tínapukainapa nukametarairuira'i eta Arairu maechejiriruwa ema Viya eta eye'e, ichapekene eta ímikatasiranu'i. Puíticha enasirichu'i.

⁶Ema Viya, tétavikawa eta máurichira'e'i eta ítaresira kape juka. Nuti, tétavikawa'i eta nukasiñawaira'i maye'e eta máimiyanirawaina eta máurichira'eyare, mawaraira'i iuri eta machimapira'eya ema Jesucristo te jena sache machavirayare.

⁷Éneichuware nukasiñawa'i eye'e, taicha némunaka'e'i ichape emutu eti. Nukasiñawa'iware vikutikakaipa'i eta vijakapira'i eta maemunasira'avi'i ema Viya, tayanapane viyere'ikaka'ipuka. Étaipa te juka návi'a'i nukaerataiya'i. Étapa te nutupi'amirauchawaka ena tuparairukana, eta nukatiuchirayare'i eta Arairu maechejiriruwa ema Viya.

⁸Tímararakanu'i ema Viya eta némunasira'e'i emutu eti, nukuti'i ema Jesucristo eta máemunasira'e'i ema.

⁹Nuyaseaka'iware ema Viya eta iápajusirawaina'ini eta émunaraiwaya. Ítupajijiakawa'ini, támutu ímatiekene'a, apaesa ímatiparaka'ini eta enerejisiraya eta táurikene'i,

¹⁰taicha nuwara'a tápajukawa'ini eta iúriwaina eta ítaresirana, tájina téchipejika'ema'i. Matapiraware'eyare, tiúriyarepa eta machimapira'eyare te machawa ema Jesucristo;

¹¹nuwara'aware iápajusirawaina'ini eta íchakeneana táurikeneana eta ekaemataneasira'i ema Viákenu Jesucristo. Tási'a, tétavikawayare'i eta nakunachirayare'i ema Viya ena achaneana eta náimaira'e'i eti.

¹²Nuparapenaveana, nuwara'a numetaka'e tájinaichucha táichawa'ini eta nukaerataira'i, eta návi'aira'i nuti te juka nakaeratairare, kamuriana ena numetaruana'i eta máemunaraiwa'i ema Viya eta naye'e.

¹³Énaipa ena tasuntarurana eta palacio énapa ena apamuriana achaneana náechaipa'i eta táemeratasiranu'i eta né'isira'i ema Cristo.

¹⁴Takutikene, eta náimairanu'i eta nukaerataira'i, ena kamurikeneana nuchamuriana táetumechawakaine'i eta nakametarairuira eta máechajiriruwa ema Viya, waipa napika'ini taicha ichape eta nakasiñawaira'i maye'e ema Viákenu Jesucristo.

¹⁵Narari'i ena, tiúri'i eta napanereruana eta náimituresira'i te máijare ema Cristo. Narari'iwasera ena apamuriana tikametarairuana taichavenechucha eta nakapinaruiranu'i nawaraira tikachurikanuanayare.

¹⁶Natiari'isera ena tiuri eta nakametarairura eta maechejiriruwa ema Cristo, taichavene eta naemunasira'i, taicha necha'i eta manasiranu'i ema Viya eta ani juka mawaraira'i nukatiuchayare'i eta maechejiriruwa,

¹⁷énasera ena apamuriana tikametarairuana, etachuchasera eta nawaraira eta tikanaranuana taichavene eta nakapinaruiranu, etapa eta nawaraira tijararekanuana te juka nukaerataiya'i.

¹⁸Etasera ¿tájinachuchasera táichawa'i? Tayanapane wa'i yatupina eta makametarairuira, enapa ena yatupikeneana natupiruwa eta nakametarairuira, wa'isera nukapinaruwakaima'i, tikurisamurechanuanachucha nuti eta náechejisi'aira'i ema Cristo namutu. Énerichu ichapemuriyarechucha eta núrisamurewaya,

¹⁹taicha németeaka tiúriyare tamutu eta níchawakenewayare, taicha tisamakare'i me Viya eta eyaseuchiranu'i, emaipa ema Machanewa Viya, ichape eta máimikatasiranu'i.

²⁰Nuti, ichape eta nuwaraira'i wá'ini nukutsiri'aini, nuwara'a nuwapinawa eta nímiyanirawa nukasiñawaya maye'e ema Cristo eta majaneasiranu'i apaesa náimati'ini ena achaneana eta yátupira'i eta makasiñakarewa'i ema Cristo, tájina wa'i nupikakawa'ini eta náimikatichiranu'ipuka, táimikapakanupuka.

²¹Taicha, eta nítaresira'i puiti, ema técha'i ema Cristo, te népenapuka, tiápajukawainapa eta núrikakarewaya.

²²Té'esera te nítarekaicha'apuka, nukamapurawayare'i nukaemataneakayare ema Viákenu, eta juka, waipa nímatiekene'a tája'apuka tiúripanayare'i nuye'e.

²³Nuwara'aipanéni níja'uchawa'ini népena'ini apaesa nunarakapaini te machakaya ema Cristo, eta juka tiúripana'i eta nímaira'i, wá'isera nímatiekene'a tája'apuka eta né'iruyare.

²⁴Nécha'ewaresera eti, néñama'eware nujunijika'e, tiúripanaichupuka wicha'a nukuepena.

²⁵Tási'a, németeaka wicha'a mawara'a népena'ini ema Viákenu, nunasiyarecha'a jakani apaesa nimikataka'echa'a eta vimiyanirawaina eta viurisamurewaina te visamureana eta vikasiñawairaina me Viya.

²⁶Taka'e napechawayarecha'a nutiari'iya eye'e, apaesa nimikataka'e eta tapajusirawaina eta esiñavira me Viakenu Jesucristo.

²⁷Eta ítaresiraya, ímereka yátupina eta é'isiraina eta máimiturapiana ema Cristo. Tayanapane wá'ipuka nukuiteka eta eye'e, ímiyanawasera eta étumechirawaina eta iúrujiasirakaka'i, nusamairirika'e'ini táuri'ini eta ímiyanirawa'i é'ika emutu, etanainaichu'i eta epanereru, ewapinawa'i eta ekametarairuira eta vé'iru'i taye'e eta viúchukuiraya,

²⁸wa'i ekuarameka naicha nákani iánarana'i, eta nakatianasira'e'i, tímikaecheracha'i eta nakaikuchira'i eta náikuñayare, taimikaecheracha'i eta iúchukuirayare'i eti maicha ema Viya.

²⁹Eti, iúrikakare'i maicha ema Viya eta ejákapakarewa'i maye'e, táichavene'i eta ekasiñawaira'i me Cristo, takamunu'isera eta ekatajiwairayare táichavene'i eta é'isira'i ema.

³⁰Ekutinuipa'i eta vikanarajirisirawaka'i ena viánarana'i, eti íma'anurichu'i kape juka eta nukanarairawaka'i, puíticha esamairikanuipa'iware eta nunasi'ichu'i nukanarawaka'i.