Read Ignaciano Filipenses 2 Bible Online

Filipenses 2 - Ignaciano bible

Filipenses 2

¹Taka'e puiti, németeaka esamawa'i eta máetumechira'e'i ema Cristo, iúrisamurera'iware táichavene'i eta máemunasira'e'i; ewapinawa'iware eta máwa'asira'e'i ema Machanewa Viya, máimitusira'e'i eta ekajira'i ejapanura'i'iware,

²taka'e puiti, nuwara'a etanainaichuware eta epanereru, ákutikakaini eta ekaemataneasiraina ema Viya, tákutikaka'iwareni eta émunasirakaka'i, tási'a etanainaichuware eta ewara'akene.

³Eti eta ítaresiraina, takuija eta ekasiñawawaisiraina, wá'iware ekuimijuki'a eta ewara'akeneana, nuwara'asera ímereka'ini eta emansuwaina naye'e ena echamuriana; éna'i émunarukeneana'i, ima'a ena apamuriana tiuripanana eta eye'e eti.

⁴Natiwaina ímikatakawaka ena, táetaviuchirawaina'ini eta náurikakarewa ícha. Wa'i ekuitatijiwa.

⁵Ámutu eti ákutinasi eta mapanereru ema Cristo Jesús,

⁶eta, taka'e'i: Wa'i makasiñawa'ini eta Víyaira'i ema, Tétavikawa'isera eta mamansuwa'i ema,

⁷taka'e manakika'i eta máwakureni eta máukupauchira'avi'i makutipaipa mákani achane musu. Makutipaipa mákani achane maka'ekene,

⁸kutipa ema achane, kajapanurawa'i émajiwa, tisuapajira'i'i me Viya eta máitaresira'i, ticheku'apa eta maepenira te crusu.

⁹Eta taka'e ema Viya máijarakapa eta máejasi'ayare'i eta maichapewapana taye'e eta máijare,

¹⁰apaesa námutu nákani naépuyuka te máijare ema Jesús, ena tiávi'ana'i te anuma, ena tiávi'ana'i te apake'e, énapa ena nakaeratakene'i puiti te ama'e apake'e,

¹¹Námutu nakunachayare yátupi ema, Jesucristo ema Viya, taka'e, tétavikawa'i eta majaraiwa ema Viya Vikaiyakene.

¹²Nuti nukunacha'e'i, eti nuparapenaveana némunarukeneana'i, taicha tétavikawa'i eta esuapiranu'i te nutiari'icha'a te echakaya. Puítisera nuwara'a tápajukawa'ini eta esuapiranuyare, puiti eta nuyere'ira'e'i;

¹³ema Viya, émaichu'i ema tinaka'i te esamureana eta ewarairayare ekurisamurechayare ema; tiáwa'aka'eware eta ítauchirayare tamutu. Takuija táemitiekene'a'ini eta tapachinawa'i eta iáchanewana.

¹⁴Te tatiari'inapuka jákani íchakeneanayare, wa'i ekuewataemachawaka, wá'iware ekuakapauchawa,

¹⁵apaesa takuija échejisiakarewaina emutu. Takuijaware etapirawaina'i eta náimaira'eyare ena achaneana. Ímerekawayare'i eta machicha'era'i ema Viya, tájina táechipejika'e'ini naye'e ena achaneana wínarajipanereruana. Nímikutichina'e eta jarairikiana víma'akeneana te anuma.

¹⁶Ímitukawaka'ini eta máechajiriruwa ema Viya, eta íchu'airawakaware náe'ikaware, apaesa náuchuku'a'ini taye'e eta apana náitaresira, taka'e, te máiteka machawa ema Viákenu Jesucristo, eta máimaira'eyare'i eta juka táurikeneana íchakeneana'i, tétavikawainapa eta nukunachirawaya nuti íchavene'i eti eta táuriwa'i eta nímitusira'e'i, wa'i támapuruji'ini eta nukaemataneasira'e'i.

¹⁷Nímikuticha'e eta esuapajiraiwa'i taye'e eta ekaemataneasira'i ema Viya, takuti'i eta iámawa'u'i maye'e, nuti, tijurikati táimikapakanupuka eta nukametarairuira'i eta eye'e, eta népenirainapukaini takutiyarewa eta námawa'u'i maye'e ema Viya, takachane eta iámawa'u'i eti, nuti nuwapinawa'i eta níjarasirawa'i népena, núrisamure'iware eta nukamawa'uira'i me Viya.

¹⁸Nuwara'a iúrisamureyarewa eti apanawa, wa'i ekukatiekene'anu, ákutinu eta núrisamurewa'i nuti.

¹⁹Nupanerecha'i néwatakayareni ema Timoteo eta ara eye'e, máima'apana'e apaesa núrisamurepaini eta nusamairisira'eya te machawapa máima'a'avirinesera ema Viákenu Jesús eta vítujisirawaya.

²⁰Taicha ema Timoteo, yátupi'i makutinu'i eta nu'apasamurechirawa eta iúrikakarewaina'ini eti, nájina apanaina'ini nákuti'ini ema.

²¹Narari'i ena apamuriana, énachuchasera tiyayauruirikawana'i, wa'i nayayaucha'ini eta náuriwaina'ini maye'e ema Viákenunu Jesucristo.

²²Ímatipa'i eti eta máuriwa'i ema Timoteo eta máimikatasiranu'i taye'e eta vikametarairuira'i eta maechejiriruwa ema Viya, takutipa émaina'ini nuchichaina'ini.

²³Wícha'asera néwatakaima'i ema, néchanumayare eta juka níchararakawayare te juka.

²⁴Nukasiñawa'inénisera maye'e ema Viákenu Jesucristo eta nútijakaruwaina'ini níma'apana'e.

²⁵Tási'asera, nupanerecha'i néwataka'iwareni puítiichu ema apana viparape Epafrodito, ema éwataru'i tímikatakanuyare'i, tiámapa'iware eta enakiruwana, puiti ema, tétavikawa'i eta máimikatasiranu'i taye'e eta juka vématanerepi'i, vikanaraira'i eta tamaurikeneana.

²⁶Mawara'aipaichaware tíma'a'e ema apanawa, téñamawaipa'i eta eye'e emutu eti taicha máecha'i eta esamairisira'i eta makajumaira'i.

²⁷Yátupi'i eta makajumaira'i, tiáne'iyare'ini tépena, majapanu'isera ema Viya; tinaraka'i. Tijapanunu'iware nuti apana apaesa wa'i nukueñamawa'icha'ini, wa'i takuapiki'anu'ini eta néñamirawa'i puiti.

²⁸Eta taka'e, nuyayaucha puiti néwataka ema, apaesa eta ímairaina'ini eti, iúrisamurewarepaini, te néchapa eta iúrisamurewa'i, étapa takaepa'a eta néñamawa'i eye'e.

²⁹Táurisera eta ejakapiraina ema te esamureana, taicha yátupi'i echamuri'i ema eta é'isira'i ema Viákenu.

³⁰Taicha ema, yátupi'i tiáne'i eta tepena, táichavene'i eta táetaviuchira'i eta mawaraira makaemataneaka ema Cristo, wá'ikene tiyawanawa'ini eta máitaresira'i, taicha muraka eta mawaraira'i máitaucha eta etuparasirana'i maye'e, taicha ema ítsiwa'i eti, eta wa'i ítujikawa'ini íteka'ini étijakaruwaina'ini ítatinu'ini.