Read Ignaciano Colosenses 1 Bible Online

Colosenses 1 - Ignaciano bible

Colosenses 1

¹Nuti Pablo, maye'enu'i apústule ema Jesucristo, taicha manerejirunuichu'i ema Tata Vikaiyakene, nawaraira'i nímitukaya eta náechejiriruwa ema Viya, nukachane ema nuparape Timoteo,

²Puiti nukajure'e eta juka ajumeruka eye'e eti nuchamuriana ekawasana'i taye'e eta awasare Colosas, taicha eti machanera'eipa ema Viya, tiúri'i eta é'isira'i ema Jesucristo.

³Vi'asulupayachaparaka'i ema Viya Makaiyakene ema Viákenu Jesucristo. Tamutu sacheana te viyujarasirana, viyaseucha'e'i.

⁴Puíti'i títametaka'aviana'i eta íchararakawa'i, eta é'isiraipa ema Jesucristo, étapa eta émunasirakakaira'i emutu eti, émunasira'iware ena iúmuriwana'i te apana awasareana, machanerana'iware ema Viya,

⁵taicha ekuchapawainapa eta esiapiraya taye'e eta máwasa anuma ema Viya. Viúrisamurewa'i eta visamairisira'i eye'e, Ichape eta viúrisamurewa'i eta táuriwa'i esama eta metarapi, eta yátupikene máechejiriruwa ema Viya

⁶etupiruwa'i esuapa eta ímitukasiwa'i, te esamainapa eta máemunasira'e'i eti apanawa ema Viya. Étaichu'i eta juka naímiturapi'i naye'e ena apamuriana achaneana tikawasana'i te apanana awasareana.

⁷Ema tímituka'e'i eta juka, ema'i ema vemunarukene Epafras, ema vichamuri'i eta vikametarairuira'i. Tiúri'i eta máitauchira'i eta makawanaraira'i ema Cristo.

⁸Ema títametaka'avi'i eta íchararakawa'i eti, émunasira'iware ena iúmuriwana'i. Maicha ema Machanewa Viya.

⁹Eta taka'e, te visamairika'epa, viyaseucha'eparaka me Viya tamutu te viyujarasirana, viyaseucha'e'i máijaraka'eni eta ítusiraina, ímatiraina yatupina eta mapanereru'i ema Viya, máijaraka'e'iwaréni eta échemaraiwaina'ini, ekaikutiarayare eta máechajiriruwana, máichavenena'ini ema Machanewa Viya.

¹⁰Víti viyaseaka'i ema Viya takuija'ini etapirawaina te mamira'u taicha eti machanera'e'i ema, ítaucha'ini tamutu eta ekaurisamurechirayare ema, táuri'ini eta ekaemataneasira'i, támutu'ini ítapara'a eta táurikeneana, iápajukawapáipa'iwaréni eta ímatirayare ema.

¹¹Énerichuware viyaseaka'i ema Viya máijaraka'eni eta ichapekene máitupajijiasirawa apaesa ekamicha'ini tamutu eta ekatajiwairana, apaesa ekamicha'ini muraka, iúrisamurereakawachuchaini

¹²e'asulupayacha'ini ema Tata Vikaiyakene eta máichuira'e'i eti apanawa, mawaraira'i tíjaraka'aviyare vimutu eta tajara'ikene víkuchiana'i viti machanerana'i ema.

¹³Ema Viya tikatiucha'avipa maye'e ema wínaraji tiavi'a te timapiku, tiama'avipa eta mawasa ema maemunarukene Machicha Jesucristo,

¹⁴taicha ema Viákenu Jesucristo tépena'i te crusu eta makaepa'airaya eta vipekaturana, viúchuku'aipa'i máicha.

¹⁵Ema Cristo maima'i ema vima'akene'i maye'e ema Viya, emasera máima'asi'i. Emasera ema machicha Jesucristo, mainapure'i taye'e eta tainapureana takaepiyakeneana.

¹⁶Ema, mawana'i'i me Maiya eta máepiyasira'i tamutu eta víma'akeneana'i puiti, te anuma, étapa te juka apake'e, tamutu eta vima'akeneana étapa eta vimarata'akeneanapa víma'a, enapa ena ángeleana tikawakureana, enapa ena ichapekeneana eta naitupajijiasirawa eta nakawakurera'i. Namutu'isera ena maepiyaruana'i ema, taicha mawana'i'i ema Machicha maye'eyare'i ema Cristo.

¹⁷Ema Cristo manasikenepa akane te tamira'uicha'a eta táepanirawayare'i tamutu, puíticha ema técha'i tamutu.

¹⁸Émaichuware ema Cristo Tachuti'i naye'e ena machanerana, enasera tímikutijirikawaipa énaina'ini make'ena'ini. Taicha ema tinapuisina'i te tepanawainapa, ema tinapuka'i techepuka te maekari, eta taka'e ema techa'i tamutu.

¹⁹Taicha ema Viya máijarakapa ema Machicha makutiyare'i eta masantuwa'i, étapa eta máuriwa'i, étapa eta máitupajijiasirawa'i.

²⁰Eta mapanereru'i ema Viya eta mawanesira'i ema Machicha te juka apake'e, tépenayare te crusu, taicha máetupirikayare'i tamutu eta juka apake'e pekatupaire, étapa tamutu eta anuma. Tichawayare'i tiuri tamutu.

²¹Eti, kape juka iásinekene'i ekatianakaini'i ema Viya. Wa'i táuri'ini eta epanereruana, taicha eta íchira'i eta tamaurikeneana'i.

²²Eta taka'e'i eta máimitesira'i ema Jesucristo te juka apake'e. Tépena'i te crusu táichavene'i eta makaepa'airayare eta etapirawanaini'i, masantuchira'eyarewa, apaesa takuijapa ekuawamira'u te jena sácheyare eta mámira'eyare te mamira'u ema Viya.

²³Taka'e, nuwara'a étumechawayarechucha, ímiyanawa táuri eta é'isira'i. Wa'i ekuyakujiekene'awa eta ekuchapira'i eta iúchukuiraya. Wa'i ekuemepurureka eta esuapiraipa'i eta máechejiriruwa ema Viya. Tétavikawa'i tasuapakarewa'i naye'e namutu ena achaneana te juka apake'e. Núti'ipa nuti Pablo wanairukakenenu'i, étaichu'iware taka'e'i eta nukametarairuira'i.

²⁴Puiti, nurisamure'i eta nukatajiwaira'i ichavene'i eti eta nukatupara'aira'i nukametarairu eye'e eti. Eta juka nukatajiwaira'i, tákuti'ini eta makatajiwaira'i ema Viakenu. Nukatajiwanumapaipa'i íchavene'i eti machichanaveana, eti vichamuriana'i.

²⁵Taicha tituparakanu'i ema Viya eta néchapajirika'eyare'i emutu eti. Nuwanekasiwa'i maye'e eta nímitusira'eyare tamutu eta máechejiriruwana.

²⁶Nímimaticha'eyare tamutu eta juka mapanereruana'i ema Viya, tayumururewaini'i eta táitaresira'i akane, énaipa ena viáchukanaveanaini wa'i támutu'ini náimati'ini. Puítisera ema Viya, tímimaticha'avipa viti machanerana'i tamutu eta júkana.

²⁷Tétavikawa'i táramikarewa'i maicha ema Viya eta máimimatichira'avi'i eta juka tayumururewaini'i ímitukasiwa'i puiti eti apawasanana'i. Eta juka, éma'i ema Jesucristo títekapaucha'eipa'i tiáwa'aka'eipa. Puiti, ejákapakarepa me Viya. Ekunewainapa maicha ema Jesucristo eta esiapiraya te máwasa anuma.

²⁸Eta taka'e, émakene'i ema Cristo véchejisi'a'i víti te vikametarairu. Étaipa te vechejirika, te vímiturekapa'i naye'e namutu nákani achaneana. Viwara'a ítamuturukaipa'ini te táitekapapa eta sache vímeresira'eyare te mamira'u ema Cristo.

²⁹Eta taka'e, nupamikawa'i nuti eta nukaemataneasira'i ema Viákenu. Émakene'i tétumechanu'i eta nurata'aira'i tamutu eta nímitusira'e'i emutu eti nuchamuriana'i.