Read Ignaciano 1 Tesalonicenses 1 Bible Online

1 Tesalonicenses 1 - Ignaciano bible

1 Tesalonicenses 1

¹Nuti Pablo, némechejirika'e eti nuchamuriana ekawasana'i te Tesalónica. Téchejika'e ema Silas, ema Timoteo. Vímiamareka'i eta juka viajure taicha eta iáwa'asiraipa ema Tata Vikaiyakene, táichavene eta é'isiraipa ema Viákenu Jesucristo. Nuwara'a makatajika'e'ini ema Tata Vikaiyakene, émapa ema Viakenu Jesucristo; náijaraka'e'ini eta táuriwaina eta epanereruana.

²Viti vi'asulupayachaparaka ema Viya eye'e emutu eti. Tamutu sácheana, te viyujarasirana, viyaseucha'e me Viya.

³Taicha tamutu sácheana vécharairika'eparaka eta ímeresira'i eta esuapira'i é'isira'i ema Viákenu Jesucristo, étapa eta epamisirawa'i ekaemataneaka'i yátupi, táichavene eta émunasira'i ema, étapa eta ekamichira'i tamutu táichavene eta ekuchapirawa'i eta machaviraya. Ema Tata Vikaiyakene máima'a tamutu eta íchararakawana.

⁴Nuparapenaveana, eti, máemunaruanaipa ema Viya. Vécha'i eta manerejisira'e'i ema.

⁵Taicha te vímituka'epa eta máechejiriruwa ema Viya, eti etupiruwa'i ejákapa eta vimetarairuana, taicha ema Machanewa Viya tinakasamurecha'e'i eta táuriwa'i esama eta vímitusira'e'i. Ímati'avi'i eta mawanesira'avi'i ema Viya. Íma'a'iware eta viúriwa'i eye'e.

⁶Jé'esare puiti, étijiwapa eta épanirawa'i é'ika'avi eta viúriwa'i víti, vikutiyare eta máuriwa ema Viákenu. Ekátajiwanuma'i ichape taicha eta ejakapira'i eta vimetarapiana. Iúrisamure'isera maicha ema Machanewa Viya.

⁷Taka'e, ena apamuriana vichamuriana tikawasana'i te tinapaika eta Macedonia étapa te Acaya, eta náimaira'i eta yátupira'i eta esuapira'i, étaichu'i náe'ika'i ena.

⁸Eti ímisama'i eta máechejiriruwa ema Viya, namutu ena achaneana tikawasana'i te Macedonia étapa te Acaya. Téchakare'iware te tamutu awasareana te jákani vítekapi'apa'i eta juka yátupira'i esuapa ema Viya. Waipa tákamesa'ini vimetatarakawaka'ini ena eta esuapajiraiwa'i eti.

⁹Timetaka'avianapa'iware eta etupiruwaira'i ejákapa eta vimetarapiana, étapa eta ínajisiraipa eta esiñarajianaini, ékesirawaipa eta ekaiju'erapa yátupi ema Viya. Puíticha tépanawaipa eta ekaemataneasira'i ema. Ema, yátupikene'i Viya. Yátupikene'iware eta masamaraiwa

¹⁰eneichuware timetaka'aviana eta ekuchapira'i eta machaviraya ema Machicha ema Viya mási'airaya te anuma, ema maka Jesús émaichu ema makaechepukasikene'i te máekari maicha ema Maiya. Émara tikatiucha'aviyare taye'e eta ekuñaraki náikuchi'i ena masuapajiraira'ana.