Read Ignaciano 1 Tesalonicenses 4 Bible Online

1 Tesalonicenses 4 - Ignaciano bible

1 Tesalonicenses 4

¹Tiuri puiti, nuparapenaveana, vituparaka'echa muraka te máijare ema Viákenu Jesucristo: táuri eta ítaresiraina puiti juka epaisirayare, te tauri eta ítaresiraina, ekurisamurechayare ema Viya, puiti iápajupanawáinapáipa eta iúriwaya.

²Ítukaipa'i eta juka ímitukasiwana'i viye'e, étaichu'i viwanekasiwana'i maye'e ema Viákenu Jesucristo.

³Taicha eta juka mawara'akene'i ema Viya, tiápajukawayare eta iáwa'asira'i ema, waipa ekukicha eta pekatuana, nakuijapa nakuve'a súkani apana esena, ésuipa esu esena, wa'i sukuve'a ema apana achane, takuija eta natu'usiwaina

⁴nakuchapa eta náitauchirawaina yátupina te mamira'u ema Viya, emutu eti, yátupina eta émunasiraina ena eyenanaveana,

⁵wa'i ekukutipa ena ajairana esenamareana. Ena náicha'i eta juka, taicha eta namaimatira'i ema Viya.

⁶Nakuija nakuve'a esu mayena ema mákani echamuri. Taicha ema Viya, yátupi eta máikuñasirayare nákani ena tíchana'i eta juka. Étaichu'i eta vímiturapiana'i eye'e kape juka te vítekainapa eta ara eye'e.

⁷Taicha víti máichu'akeneanaipa ema Viya, mawara'a tiúrinayare eta vítaresiraya, waipa víchaima'i eta juka tamaurikeneana.

⁸Taka'e, ema mákani tépuru'i eta juka vímiturapiana'i, máepuru'iware ema Viya; taicha mawanairipiana'i eta juka, vimetakasiwa'i víti maye'e ema Machanewa Viya.

⁹Puiti tájinapa, waipa néñamawa eta eye'e eta émunasirakaka'i, taicha ema Viya tíjaraka'eipa eta émunasirakaka'i.

¹⁰Taicha nusamairirika'eipa eta émunaraiwa'i naye'e ena echamuriana títekapaucha'eana'i tiási'ana'i te táunawana'i eta iáwasa Macedonia. Nuparapenaveana, puiti vituparaka'echa iápajukawayare eti eta émunaraiwaya.

¹¹Éneichuwa viápechawa vituparaka'e tauri eta ítaresiraina. Échapajirika eta émataneana. Ekaemataneakawa yátupina,

¹²apaesa takuija ekukamunu te epenana. Te ítaucha eta juka, tipikaucha'eanayare ena apamuriana achaneana.

¹³Nuparapenaveana, éneichuware viwara'a vimetaka'e eta náichararakawayare ena vichamuriana náepenakeneanaipa. Wa'i ekukatisamurewa naye'e. Ena apamuriana achaneana tikatisamurewanapa te náekarapana ena náepenakeneana, taicha wa'i nákasiñawa'ini me Viya. Wa'i ekuka'e eti.

¹⁴Víti visuapa'i eta máechepusira'i te maekari ema Jesús te táekenepa eta máepenira'i. Tási'a, visuapa'iware eta makaechepusira'aviya ema Viya te vépenapa, vikáchanenapa ema Jesús viti vé'ikana'i ema.

¹⁵Eta taka'e, vimetaka'e eta juka vímitukasiwana'i maye'e ema Viya. Te machawapa ema Viákenu Jesús, te wícha'apuka vikuepena'i víti, wa'i vikainapukawaima'i naye'e ena náepenakeneana.

¹⁶Taicha émaichu ema Viya tiúkupaikaya tichawayare, tiási'aya te anuma. Tipiarakaya muraka tíchuarekaya. Ema Arcángele éneichuware tipiarakayarewa. Tikaemayarewa eta machuja ema Viya. Taka'e, téchepukanainapa tínapukanaya ena náepenakeneana, ena tisuapajira'iana'i maye'e ema Cristo;

¹⁷taka'e, viti vítareruanaicha'a viyanainapa vimutu. Vikáchanenapa ena náepenakeneanaini. Viakapajikainapa ema Viákenu te anuke'e te távi'a'i eta úkaji. Tási'a, máichekuarakireyare eta vikachaneraya ema Viákenu.

¹⁸Eta taka'e, imitatajirikakayare naye'e ena echamuriana tamutu eta juka vímiturapiana'i.