Read Ignaciano 1 Tesalonicenses 5 Bible Online

1 Tesalonicenses 5 - Ignaciano bible

1 Tesalonicenses 5

¹Nuparapenaveana, wa'i ekuemitisikawa, ekunewaicha yátupina, taicha téchakareipa eta táramikarewaya eta máitesirayare ema Viákenu.

²Takutiyare mákani tiámereka te yati, nájina tinekapaina, ene taka'eyare eta máitesirayare ema Viákenu, wá'isera vécha tájamu'uyarepuka.

³Te naka'epa ena achaneana: “Viúri'ichucha puiti. Tájina víchirawaima'i”, wa'i tinekapauchawanaima'i eta táitekapauchiraya eta náikuñayare takutiyare esu súkani esena tikajari, tíja'uchawapa tikati eta suju'e eta suínasiraya, ene naka'eyare ena. Tájina najunaiyaima'i.

⁴Étisera, nuparapenaveana, échaipa eta juka, waipa iáramekaima'i te jena sache máitekapiraya ema Viákenu, taicha tamutu sácheana ekuchapa'i eta máitekapiraya waipaware karameaka'ema'i ákuti'ini mákani tiamera'i.

⁵Taicha víti viávi'a'i te majaraiwa'i ema Viya, víti vipaika'i te sachemu'u. Wa'i táiñe'avina eta yati, taicha vínajikaipa eta tamapikukene.

⁶Eta taka'e, tawara'a vikuneuchawa tamutu sácheana, vijaneasirawaina'ini muraka, wá'ini vikukuti'ini ena tiwayuchawana'i tímakakarakawana, tájina náechakenena ena, vítisera vijaneakawaya tamutu sacheana, yátiana, tájina víchirawaima'i.

⁷Ena achaneana, tímakakarakawana'i te yátiana, ena apamuriana tikáwa'a'arakawana'i te yátiana, wa'i najaneakawa'ini ena.

⁸Vítisera taye'e'avi'i te sachemu'u, takamunu'i vikuneuchawa eta tauriwaina eta vitaresira. Tawara'a vikatiuchawa, wakuti'ini ema suntaru makarataka'i eta makatiuchawaya, eta taka'e vimeresiraina'ini eta vikuneuchirawayare viti machanerana, eta vikasiñairawame Viya, etapa eta vemunasirakaka yatupina'ini visuapa eta makuchuira'avirayare takuti'ini eta casco maye'e ema suntaru.

⁹Taicha ema Viya manerejiru'avi'i eta makuchukuira'aviya máichavene'i ema Viákenu Jesucristo, waipa vikaikuñaima'i.

¹⁰Ema Jesucristo tépena'i te crusu vítivene'i, tayanapane vitarekacha'apuka te'epukasera vepenaipapuka, etasera vitareka'ini te machakaya ema Viya.

¹¹Eta taka'e, étumechakaka, ékatiakaka, nuti nukasiñawa'i eta eye'e eta íchirapaipa puiti eta juka.

¹²Nuparapenaveana, énerichuware vituparaka'e eta epikauchiraina ena víyara'ana pastoreana taicha ena tichejirika'eana'i, tímituka'eana'i eta juka é'isira'i ema Viya.

¹³Échapajirikawakaya ena, émunasinawaicha, taicha ena tiúri'i eta náimikatasira'e'i, takuija ekuichirawaina eti eta naye'e.

¹⁴Énerichuware vituparaka'e, nuparapenaveana, epamikayare muraka nakaematane ena plújuana, wa'i náesacha'i tikaemataneana. Éneichuware étumechawaka ena tiyakujiriri'ana, ena nani tínajirikawana'i, murakaina eta ímitusiraina, ekamichayaresera namutu ena.

¹⁵Échapawayare, tijurikati natiari'ina nawara'a titupiaka'eana, wa'i ekujikapa. Wá'isera ekuitsikawa. Ímerekayaresera eta iúriwaya naye'e ena echamuriana, énapa namutu ena apamuriana achaneana.

¹⁶Iúrisamurerekaya tamutu sácheana.

¹⁷Wa'i ekukainajiruwa eta eyujarasirana tamutu sacheana maye'e ema Viya.

¹⁸Tamutu jákani íchararakawana'i, e'asulupayacha ema Viya, taicha eta mawara'a'i ema Viya eka'eyare eti é'ikana'i ema Viákenu Jesucristo.

¹⁹Wá'isera ekuemepurureka eta mawara'akeneana'i maicha ema Machanewa Viya eta eye'e.

²⁰Wa'i ekuepuru nákaini tijachapana eta naitukakene eta naechejisi'aira ema Viya.

²¹Wa'i ekuemunanasikawa, epanerechinawayare te tája'apuka jákani esamakeneana'i, íma'akeneana'i, e'ikaya eta táurikeneana.

²²Erajikawa taye'e tamutu jakani tamaurikeneana'i.

²³Tiuri puiti, máijaraka'eni ema Viya táuriwaina eta epanereruana, yátupina'ini takuija'ini ekuichirawaina eta iáwa'ásira'i ema, majaneasina'e'ini eta iáchanewana, eta iáke'eana, takuija eta etapirawaina'ini te machawapa ema Viákenu Jesucristo.

²⁴Taicha eti máichu'akeneana'i ema, yátupi eta makasiñakarewa'i, máitauchayarewa tamutu eta juka.

²⁵Nuparapenaveana, ímikataka'avi eyujaraucha'avi me Viya.

²⁶Échejisina'avi namutu ena vichamuriana.

²⁷Nutuparaka'e te máijare ema Viákenu échejiku'a eta juka ajureka te namuri ena vichamuriana apaesa námutu nasama.

²⁸Nuyaseacha'eparaka me Viákenu Jesucristo táetaviucha'ini eta iúrikakarewaya máicha.