Read Ignaciano 1 Timoteo 5 Bible Online

1 Timoteo 5 - Ignaciano bible

1 Timoteo 5

¹Te natiari'inapuka náejekapawa ena víyara'ana ichavikapanana'i piye'e, wa'i pikukajachawaka ena. Pechejirikasera tauri, tákuti te péchejika ema tikachichavi. Éneichuware ena amaperukijiana ajairana, tauri eta pechejirapina tákuti eta péchejisira ena pichukikeneana.

²Éneichuware ena vénara'ana ichavikapanana'i piye'e, te náejekapawapuka, pechejirikawaka tauri tákuti eta péchejisira esu tikachichavi. Énapa ena amaperuana esenana, pechejirikawaka tauri tákuti eta péchejisira ena pichukikeneana. Tátupiruwa eta péchejirisirawakaina ena.

³Pímikatakawakaya ena tépenaimana'i, nákani tájina'i naviyawa'ini, yátupi'i eta nakamunuirawana.

⁴Té'eserapuka natiari'i'i ena suchichanaveana esu esena tépenaima'i, suámarianapuka, énapa títatianayare'i. Títsirijikawanainapa eta nakajurusirawaka'i ena náenana, nátseanapuka. Eta juka, máurika ema Viya.

⁵Súkani tépenaima'i sukarichu'ipuka, nájina suchichaina'i, nájinaware suviyawa'i. Sukuchapainapa eta tási'akeneya maye'e ema Viya, taicha suíjararuwaipa yátupi eta maye'e. Tiyujarakainapa te sacheana, te'epa yátiana.

⁶Ésusera súkani esena tepenaima, suíkutichirawa'i suicha eta suwara'akeneana'i, esu tímikutijirikawaipa suákijiruwa'ini eta maye'e ema Viya.

⁷Pímitukawakayare ena tépenaimana'i, apaesa táuri eta nakaemataneasiraina ema Viya, takuija natapirawaina.

⁸Taicha ena vichamuriana, tatuparakawaka'i náeñamawa eta náitatira ena náenana, ena nátseana. Nákani wa'i nakukicha eta juka, tímikutijirikawaipa wa'i náitaucha'ini eta náe'isira'i ema Viya.

⁹Nakarichu tikajukunanayare ena tépenaimana, ena tikaye'eanaipa sesenta añu eta na'añura. Súkani esena tépenaima, émanaichu'iware ema suímaini eta suítaresira'i.

¹⁰Ésupa súkani tímatikare'i eta táuriwana'i eta suématanerepiana. Súkani tiúri'i eta sukajurusira'i ena suchichanaveana. Súkani tijakapara'i te supena naye'e nákani tichimarachanapa'i. Súkani tiuri eta suéchapajirisira ena vichamuriana. Súkani tamutu'i suítapara'a suicha eta táurikeneana.

¹¹Énasera ena tépenaimana'i amaperuanaicha'a, wa'i piajukunachaima'i. Tijurikati tiakipaikawana, taicha tawayuakawakaicha'a eta tájiparakana, natanukaicha'a ema ajaira, nawara'aicha'a tiápechawanayare'i tikaimana. Tijurikati tikainajiruana eta náe'isira'i ema Cristo

¹²takamitisikawakapaipa, énapa tíminajikanapa'i eta náe'isira'i ema Cristo.

¹³Éneichuware tikauyayakare'i, tépiyakawanapa plújuana. Náematanepa tipaipirikana te pétiana, námapaipa eta cuéntoana. Tímisiaparakawanapaipa. Nakaemataneaka náechejisi'apaipa jákani náima'akeneanapa'i te pétiana. Wa'i tákatupara'a náicha'ini eta juka.

¹⁴Eta taka'e, ena tépenaimana'i amaperuanaicha'a, nuwara'a nápechawa nakaimaware, nakachicha, apaesa nakaenakare'i te napena, takuija nakukayema ena tikunera'iana.

¹⁵Taicha narari'i ena tépenaimana'i tínajikawanapaipa eta náe'isira'i ema Jesús, náe'ikapa ema Wínaraji.

¹⁶Te sutiari'ipuka tépenaima'i esu vichamuri'i, te natiari'iwarepuka ena sujaneana'i vichamuriana'iware, ena títatianayare'i ena sujaneananaichu; apaesa wa'i sukuapitawairika'i naye'e ena máimaruana'i ítatijiriruana'i, táichavene'isera jákani tamajinaira'i naviya'ini ena.

¹⁷Ena pastoreana, te tiúri'ipuka eta náechapajirisirawaka ena vichamuriana, ichapeyare eta náemunakakarewayare'i. Tatuparakawaka'i tiuriyare eta viwachachira, taicha ena, eta náematanerepi'i tímiturekana'i tikametarairuana'i.

¹⁸Taicha ani taka'e'i eta Takapika'ukene Ajureka: “Wa'i pikuitisumucha eta pivuiyera te tikaematanepa'i, taicha téku'apa'i.” Ániware taka'e: “Ema achane tikaematane'i, tatuparaka'i tikawachayare'i maye'e ema makaematanearu'i.”

¹⁹Wa'i pikusuapawane te tatiari'inapuka eta máepiyaekenena mákani naiyakara'i ena vichamuriana. Té'esera natiari'inapuka ena apinana, mapananapuka tinekapaekene'ana'i eta máejekapirawa'i, jé'esare tisuapakare eta.

²⁰Té'esera yátupikene'ipuka eta máejekapirawa'i, pikajachayare muraka te namira'u ena machamuriana'i náiyakarana, apaesa nátsiri'a napika ena apamuriana, waipa nakukicha eta juka.

²¹Nutuparakavicha muraka, pítauchayare yátupina eta juka numetarapiana'i piye'e, wa'i pikunerejikawaka, nákutikaka eta píjarasiraina eta piye'e justicia.

²²Te matiari'inapuka mákani nawara'a nakasiapa pastor, pikasamairunumaya te tiúri'ipuka ema, wa'i pikuíja'ucha pikunakawane ema, tijurikati tatiari'inapa'i eta máejekapirawa'i, machu pítina tamuriaka taicha eta pímisiapiraina ema. Pijaneakawaicha taye'e eta juka.

²³Puiti néchawa'i eta pikajumamajipa eta pítaresira'i te piami. Tási'a, nuwara'asera, pímisirikicha apaesainaichu eta vino eta péresarama une, pípurujina'i.

²⁴Takamunu'isera eta pikasamairunumaya nákani tisiapanayare eta pastulerukare, taicha narari'i ena machasi'i eta napekaturana, wa'i táimatikarewane, tapaenumawa te pikasamairunuma ena, narari'isera ena tikaecherawane eta napekaturana, tímatikarewaneana.

²⁵Ene taka'e'i, narari'i ena tímatikareanawane'i eta náichira'i eta táurikeneana'i, narari'iware ena takamunu'i eta pikasamairunuma, wa'i tikaecherawane'i eta naichakeneana tamutusera eta juka timerekawayare.