Read Ignaciano 2 Timoteo 4 Bible Online

2 Timoteo 4 - Ignaciano bible

2 Timoteo 4

¹Puiti nutuparakaviyare muraka te máijare ema Viya, émapa ema Viákenu Jesucristo. Taicha ema, títekawaneyare eta makawakureiraya te juka apake'e. Viti vítareruanaicha'a énapa ena náepenakeneanaipa vikayasesere'inapa te mamira'u tája'a'ipuka eta vikaemataneasirana'i ema

²eta taka'e, pímiyanawachucha pikametarairu eta máechejiriruwa ema Viya te jákani pítujisirawana. Pékatiakawakaicha muraka ena téjekapawana'i. Pechejikawaka, pétumechawaka ena, apaesa tiúri eta napanereruana. Pakamichasera eta pímitusirawakaya namutu.

³Taicha titekapayare eta sácheyare ena achaneana waipa nasuapaima'i eta vímiturapiana táurikeneana, étainapa náichayare eta nawara'akeneanaichu. Natanukainapa ena nákani tímitukanayare eta tájiparakana, nakarichuinapa tisamakareanayare naye'e.

⁴Tasapi'ainapa náepuruyare eta vimiturapiana yátupikeneana'i, nakaepakekuinapa. Étasera eta náepiyapiruana ena achaneana, tasapi'ayare eta tisuapakareyare'i naye'e.

⁵Pítisera pinasiyareichu tájina píchirawaima'i. Pikamichayare tamutu eta pikatajiwairana. Pímiyanawachucha pikametarairu eta máechejiriruwa ema Viya. Pítauchayare eta pituparakasiwa'i.

⁶Puítisera, nuti tiáne'ipa eta nítaviraya te apake'e. Nukutipa eta yúkupi te títawayarepa téma'ayarepa, éneipa nuka'e'i nuti.

⁷Nítawawarerupa eta nukanaraira'i eta tamaurikeneana. Wa'i nuvitaekene'a'ini. Nítaucha'i eta nutuparakasiwa'i maye'e ema Viákenu. Núnaka'i muraka eta nusuapira'i ema Jesús.

⁸Puiti etanecha nukuchapa'i eta jena sácheyare eta máijarasiranuyare eta níjarakasiya me Viákenu, taicha eta né'isira'i yátupi. Ema, máitauchayare'i eta máijarasiranuyare eta níkuchi'i maye'e. Wá'iwaresera nákarichuima'i nuti nukaijarakasiyare. Éneichuwa máijarakayarewa namutu nákani tikuchapana'i eta machaviraya.

⁹Pitatajiríkawaicha eta pítesirawaneyare ani nuye'e.

¹⁰Puiti tijunijikanuipa ema Demas, taicha tétavikawa'i majamurachira'i eta mawara'a tikaima'akeneyare te juka apake'e, tiyanapa makaiju'e'i taye'e eta Tesalónica. Émasera ema Crescente, néwataka'i te tinapaika Galacia, éneichuware ema Tito, néwataka'iware te tinapaika te Dalmacia.

¹¹Makarine'i nukachane'i ema Lucas. Pivenumapa'i ema Marcos, máiteka ema apanaware, tétavikawa'i eta nukamunuira'i ema.

¹²Ema Tíquico, nuwaneka'i máiteka ara piye'e te awasare Éfeso, émainacha'a pítsiwaina.

¹³Te píteka, pétawajikayarepa'i te Tróade, pivenuminanuya eta nuye'e capa nunakiru'i maye'e ema Carpo, étapa eta nuye'eana libro, étapa eta apamuri ajumerukana.

¹⁴Numetakaviware eta máejekapirawa'i ema Alejandro eta nuye'e; tétavikawa'i eta makatichiranu'i ema maka herrero, máima'ainesera ema Viákenu. Ema títsirijiekene'ayare eta máichiranu'i.

¹⁵Eta taka'e, pikuneuchawaicha eta maye'e, taicha tétavikawa'i eta makatichira'i eta vikametarairuira'i.

¹⁶Étaipa, te tínapukainapa nukatiuchawa'i te mamira'u ena tuparairukana juéseana, nájina náimikatakanu'ini. Namutu'i tijunijijikanuana'i. Tiuri, takuijaseraini makuícharakaini ema Viya, majapanu'ini ena tijunijikanuana'i.

¹⁷Émasera ema Viákenu tijaneakanu'i, tímikatakanu'i, wa'i máisapanu'ini nanakanu'ini te tapena eta sárareana tinikara'iana. Nítujikawa'i núchuka nuyana taye'e eta apanakeneana awasareana, nukametarairu'i naye'e ena apawasakeneana.

¹⁸Ene taka'eyare eta máimiyanirawayare tikatiuchanu ema Viákenu taye'e eta táiñe'ikeneana, tiámanuyare'i taye'e eta máwasa anuma. ¡Ichape eta majaraiwa'i Máichekuarakireyare'i eta vijirauchiraya ema! Amén.

¹⁹Péchejisinanuwaka ema Áquila ésupa esu mayena Priscila, énapa ena machichanaveana ema Onesíforo.

²⁰Émasera ema Erasto, nunakika'i te Corinto, émapa ema Trófimo nunakika'iware te Mileto taicha tikajuma'i ema.

²¹Pítekawanecha te tamira'uinaicha'a eta murakana tikasara'i. Téchejikaviana ena vichamuriana ema Eubulo, ema Pudente, ema Lino, esu Claudia, tási'a énapa ena apamuriana vichamuriana.

²²Nuti nuyaseuchaviparaka me Viákenu Jesucristo majaneakavi'ini tamutu sacheana, táetaviuchawareni eta iúrikakarewaya emutu eti máicha.