Read Ignaciano Tito 3 Bible Online

Tito 3 - Ignaciano bible

Tito 3

¹Pémechayarewa ena vichamuriana eta nasuapiraina ema ichapekene'i akenuka, tási'a, énapa ena tuparairukana. Énerichu pémechaware ena vichamuriana énaina nápajukawa eta náwanakare taye'e jákani emátanekanaya.

²Wa'i nakuechejika naye'e nákani achaneana, wá'iware nakume'areka, wá'iware nakutupiara'i, mánsuanainasera, najapanura'i naye'e ena achaneana.

³Víti, akane éneichuware vika'i maiturere'avini'i masuapajira'avi'i. Tatajina vechakenena, vicha'i eta tamaurikeneana taicha tamusura'avi'i eta taiparakana te juka apake'e. Vicha'i eta ta taiñema'keneana, vikapinarureka'i tikaticha'aviana'i tási'a vikatichajirikaka'iware.

⁴Puítisera, waipa wáka'e'ini, taicha máitsiwachaipa eta vítaresira ema Makatiura'ikene'i Viya eta maemunasira'avi'i viti achaneana,

⁵Viti tajina'ineni vicha'ini eta taurikeneana, emasera eta majapanuira'avi'i tikatuicha'avipa tijaraka'avipa eta arairu vitaresirarayare'i, maye'e ema Machanewa Viya.

⁶Tétavikawa'i eta viúrikakarewana'i maicha ema Machanewa Viya máijararu'i ema Jesucristo Makatiura'ikene'i eta viye'e,

⁷etasera te taekenapa eta majakapira'avi'i tijaraka'avipa eta tauriwayare eta vitaresira etapa eta vijachapirayare eta vikuchi'i maichekuarakirenapa eta vitaresira.

⁸Etasera eta juka yátupikene'i tasuapakarewa eta juka vímitukasiwa'i, eta juka néchejisi'akeneana'i puiti, nuwara'a pímitukayare tamutu sácheana apaesa náimiyanawa naicha eta táurikeneana ena vikutikeneana tisuapajira'iana me Viya. Tétavikawa'i táuriwa eta vímiturapiana, tájina táichirawaina, taicha eta juka tíjarakara'i eta náuriwaya naye'e namutu ena achaneana.

⁹Wa'isera pikukicha eta tamaurikeneana naye'e ena tiakapaemajirikakana sunsurupiana, nachukarapianachucha eta naye'e ena viachukanavuanaini, wa'i pikusema naye'e ena te'ajirikakana taichavene eta maye'erepiana ema Moisés. Taicha eta juka tijina taechejiriruwaina tajinaware taimiturapina.

¹⁰Te matiari'ipuka ema mákani mawara'a ma'apapika eta napanereruana ena vichamuriana, pímichu'ayare pechejirikayare eta mapanereru'i. Te api'ekenénapa eta pímichu'a, te máviraichu wa'i makusuapavi, péwatakayare mayana máuchuka,

¹¹taicha tímatikarepa'i ema achane eta mamaimitukakarewaya, étavenera'i eta mapekaturana táimikuñakaya,

¹²Tiúri, néwatakayare pítsiwayare ema Artemas eta ara piye'e, té'esera émapuka néwataka ema Tíquiico, te máitekapauchavipa ara piye'e, pítekawaneyare ani nuye'e te juka awasare Nicópolis, taicha nunasiyarecha'a ani. Nuwara'a táetavikawanumacha'a eta murakana tékatikawa,

¹³Éneichuwa títekapauchaviya ema vichamuri abogado Zenas, émapa ema vichamuriware Apolo, pímikatakawakayare ena eta nayanirayare, péchapajirikayare ena, pijarakayare eta nakamunukene te náechuriapuka eta napaisiraya.

¹⁴Pímitukayare ena vichamuriana eta achanesamurewakaina, máejerarena eta nakajiraiwaina naye'e ena achaneana, yátupina naitaucha eta nakamunukarewana'i.

¹⁵Téchejikaviana namutu ena natiari'ikeneana'i nuye'e. Tási'a, péchejisinanuya namutu ena némunakasareana vikutikeneana eta vikasiñawaira eta maye'e ema Viya. Nuyaseucha'eparaka emutu eti me viákenu Jesucristo, táetaviucha'ini eta iúrikakarewaya máicha.