Read Ignaciano Hebreo 1 Bible Online

Hebreo 1 - Ignaciano bible

Hebreo 1

¹Akane eta náitaresira'i ena viáchukanaveanaini, natiari'i'i ena profetana mawanarana'i ema Viya. Ena, náitametaka'i ena achaneana eta máechejiriruwana ema Viya. Ichapemuriware eta náimeresira'i eta máitupajijiasirawana'i. Apánapanenejiware eta náimituresira eta máechajiriruwana.

²Puítisera viti vítareruana'i puiti juka añuana, ema Viya mawaneka'i ema Machicha eta viye'e, títametaka'aviya eta mapanereruana. Ema maka Jesucristo, machicha'i ema Viya. Akane éma'i tépiyaka'i eta apake'e, eta anuma, étapa eta víma'akeneana'i puiti.

³Ema tikaye'e'i eta majaraiwa'i máijararu'i ema Maiya. Eta máukupaisira'i eta viye'e, tímimaticha'avipa eta máuriwa'i ema Maiya. Tási'a, te tamutupa eta makaepa'aira'i eta vipekaturana, tichawapa te anuma. Ánaki ema Maiya makaejakapa te maejasi'ayare te mawaure,

⁴taka'e, ema Cristo, ema tikapika'upana'i naye'e namutu ena ángeleana, taicha ema Maiya máijaraka'i eta ichapekene máwakure'i tikapika'u'i.

⁵Taicha eta máechejiriruwa'i ema Viya maye'e ema Cristo, ani maka'e'i: “Píti yátupikenevi'i nuchichavi; “nuti nukachichavi'i puiti.” Wá'isera máicha'ini emanaina'ini ena ángeleana: “Nuti pikaiyakene'i, “Ema yátupikene'i nuchicha.”

⁶Taka'e, te makukupaikapa ema makarichukene Machicha te juka apake'e, makawanairipipa: Eta natsiusirayare namutu ena maye'eana ángeleana ema Viya.

⁷Énasera ena ángeleana, táechejisi'a'i, ani taka'e'i: “Ena ángeleana nakuti'i eta tékatikawa, nakuti'iware eta yuku.”

⁸Ánisera taka'e'i eta táechejisi'aira'i ema Cristo: “Máitawakakayare'i eta akenukavirayare, tétavikawa eta tatupiruwairayare'i eta piwanairipi.

⁹Píjarakayare'i eta táuriwayare; eta taka'e ema Tata, tíjarakavi'i tamutu tétavikawa'i eta náurisamurewa pikachuriaka'i naye'e ena pichamuriana.”

¹⁰Ániware taka'e'i: “Píti yátupikenevi'i Viya, píti pítuka'i picha eta táima'iyare'i eta apake'e étapa eta anuma, pépiyaruana'i.

¹¹Tamutu eta juka víma'akeneana'i títawayare, Pítisera pinasiyare'i. Tamutu eta juka titawayare takutinapaipa eta táichasiwa eta vimuiri'a;

¹²¡pikakuyakainapa takutinapa te viakuyaka eta muriare pitsiwachainapa takutinapa te vitsiwacha eta vimuiri'a! Pitisera wa'i pitsiwachawa'ini; eta piake'e tanasirichu'i wa'i taitawa'ini.”

¹³Emasera ema Viya wa'i maicha'ini ena ángeleana “Yare, péjaka te nuwaure, eta pikuchapi'ayare ena tikatianakaviana'i eta nukaepuyusiraya te pimira'u piwapechakaya”

¹⁴Taicha namutu ena ángeleana machanewana'i, mawanarana'i ema Viya, ena, mawaneruana'i tijaneaka'avianayare'i vimutu viti makuchukureanayare ema Jesús