Read Ignaciano Hebreo 13 Bible Online

Hebreo 13 - Ignaciano bible

Hebreo 13

¹Wa'i ekukainajiruwa eta émunajirisirakaka'i eta echamurikakaira'i táichavene'i eta eparapekakaira'i, te mawa'uana ema Viya.

²Wa'i ekuemitisikawa eta táurirayare eta ejakapiraya ena echimarana te epenana, taicha kamuriana ena achaneana wa'i naecha'ini eta najakapira'i te napenana ena ángeleana.

³Éneichuwa échayarewa naye'e ena tikaeratana, ejapanuwaka ena, táimikutijirikawa'ini étina'ini ekaerata'ini ekachanewaka'ini, éneichuware ejapanuyare nákani náemejapanuraruana taicha ena étaichu'i eta náke'eana takuti'i eta iáke'eana eti.

⁴Ámutu epikauchakaka eti ekaparapekenepa, eti esenana, étipa eti ajairana. Taicha máima'a tiuri ema Viya eta eve'akakaira'i. Taicha ema Viya máikuñakayare'i nákani tive'akakana'i wa'i nakuchapa'ini náitauchawa'ini, énapa ena tikayepekakana'i.

⁵Wá'isera takuwayuaka'e eta plata. Tarataichu takurisamurecha'e jákani íturewa'i ekaye'ekene'i, taicha ema Viya ani maka'e'i eta máechejiriruwa'i: “Wa'i nujunijikavima'i, wá'iware némitisikavima'i.”

⁶Taka'e, ani vika'eyare eta vikasiñawairayare maye'e ema Viya te viyaseaka: “Ema Viákenu ema tímikatakanu'i. Wa'i nupikaima'i jákani náichiranu'i nákani achaneana.”

⁷Échayare ena tímituka'eana'i tímisama'eana'ini eta máechajiriruwa ema Viya. Epanerecha eta naicharakawa'i eta naitaresira'i eti, epamikawa ekutiyare ena eta nakasiñawaira'i me Viya.

⁸Ema Jesucristo, wa'i máitsiwacha eta máuriwa'i eta viye'e. Manasi'i puíticha, étapa eta apajara'iyare.

⁹Wa'i ekuisapawa ekue'ika eta jákani apánapanenejikeneana náimiturapiana. Tiúripana étumechayare eta esamureana, táichavene'i yátupikene eta máemunasira'avi'i ema Viya. Étapasera eta naye'erepiana taye'e eta tinikakareana, wa'i étaparakaina, taicha tájinachucha táimikatakawaka'ini ena tikaye'erepiana'i.

¹⁰Vítisera, marari'i ema apana tiyujarakara'i eta viye'e, apánapaware eta mayujarauchira'avi. Wa'i énaparakaima'i ena náinapureana tiyujarakara'iana.

¹¹Eta naye'erepini'i ena tiyujarakara'iana taye'e eta santuario te Jerusalén. Étachucha eta táitine eta sárareana, máma'i ema mákenu ena tiyujarakara'iana taye'e eta tékene'a cuartu Lugar Santísimo. Nawara'a'i takaepa'ayare'i eta napekaturana, eta titupara'i. Étasera eta táke'eana, náijukecha'i te tachachaku eta awasare.

¹²Ene maka'e'i ema Cristo, tikatajiwa'i eta máepenira'i te tachachaku eta awasare, mawaraira'i máepachiaka'aviyare'i viti achaneana taye'e eta máitineichu ema.

¹³Eta taka'e viti apanawa, takamunu wíchuka vé'ikayare ema Jesús. Tayanapane vikatajiwayarepuka, vikutiyaresera ema eta makatajiwaira'i.

¹⁴Taicha te juka apake'e, wa'i apajaraima'i eta viawasa'i. Víyana vitanuka eta viawasaya arairuyare. Tétavikawa eta vijamurachira'i viyápawane.

¹⁵Puiti, eta vé'isira'i ema Jesús, tawara'a eta vijirauchiraparakayare'i, vi'asulupayachaware ema Viya. Eta juka eta viámawa'u'i eta maye'e. Ema vikawapajayare'i.

¹⁶Éneichuware, wa'i ekuemitisika eta íchira'i eta táurikeneana. Ekajiyarewa ena echamuriana eta ekaye'ekeneana. Eta tímikutijirikawaipa eta iámawa'u'i. Ekurisamurechaipa ema Viya.

¹⁷Esuapayare nákani tímituka'eana'i, ewapinawayare naye'e eta esuapajiraiwa'i. Taicha ena, tijaneakana'i eta iáchanewana eti. Naecha'i ena eta tikayasere'ianayare'i te mamira'u ema Viya. Ekurisamurechawaka ena eta esuapajiraiwa'i, tawapinakare eta nakaemataneasira'e'i. Wa'i ekuimipanerechawaka eta emasuapajiraiwapuka.

¹⁸Eyaseucha'aviyare te eyujarasirana. Vikasiñawaipa'ineni viti táuriwaipa'i eta vipanereru. Tájinapa víchirawaina'ini. Viwara'a víchayare eta táurikeneana naye'e namutu ena achaneana.

¹⁹Nuwara'asera eta eyaseuchinanu me Viya, máisapanu'ini ema níja'uchawa'ini nuchawa'ini eta eye'e.

²⁰Ema Viya, tétavikawa'i eta mauriwa''i, tétavikawa'iware eta máitupajijiasirawa taicha makaechepuka'i ema Viákenu Jesucristo te máekari, émayare'i yátupikene'i Pastuleruyare'i, tijaneara'i viye'e viti machichanaveana. Tisipa'aka'avipa eta te máitine, apaesa máitawakakayare'i eta vikachanerayare ema,

²¹Ema Viya, máimikataka'e'ini ítaucha tamutu eta mawara'akeneana, íchira'i eta táurikeneana apaesa ekurisamurecha'ini ema, tamutu eta ítaresira eta é'isira'i ema Machicha Jesucristo. ¡Máitawakakayare eta vikunachira ema Cristo! Amén.

²²Nuparapenaveana, nuwara'a nuyaseaka'e ákamichawa'ini taye'e eta juka nechejiriruwa'i eta eye'e. Ánipichicha'i eta juka nájure'i. Jarari'isera kamurikeneana eta apana nuwara'a'i numetaru'eyare'ini.

²³Numetaka'eware ema viparape Timoteo tiúchuku'aipa te makaerataiya'i. Te máitekapawanepuka ema, nukachaneyarepa'i te níteka eta ara eye'e. Nuwara'a'i níma'apana'e.

²⁴Néchejika'e emutu eti ejaneara'iana ena vichamuriana. Échejisinanuwaka namutu ena vichamuriana vikutikeneana'i tisuapajira'iana'i te jákani návi'a'i ena. Ani te juka, nukachanewaka ena vichamuriana náiteruana te Italia. Téchejika'eanaware ena.

²⁵Nuyaseucha'eparaka emutu eti me Viákenu Jesucristo, táetaviucha'ini eta iúrikakarewaya máicha. Amén.