Read Ignaciano Hebreo 2 Bible Online

Hebreo 2 - Ignaciano bible

Hebreo 2

¹Eta taka'e, tituparaka'e yátupina eta ekarawa'uiraya eta ímitukasikeneana'i, machu émitisika, machu étaina taviucha'e eta iuchukuiraina.

²Eta akane, ena ángeleana, ena tímitukana'i ena nainapureanaini eta juka wanairipiana, tétavikawa'i eta tasuapakarewa'i, tikaikuñawaneana'i ena téjekapawana'i, timasuapana'i eta nasamakene'i.

³¿Vicharakawayare eta viuchukuirayare viti, te wa'i vikusuapa eta ichapekene maechejiriruwa eta tikuchuku'a'aviyare? Émaichu'i ema Tata ema tinapuka'i eta timetaka'avi'i eta juka vuichukuirayare'i, tási'a ena tisamana'i eta juka vuichukuirayare'i enapa timisama'aviana'i viti eta yátupikenera'i.

⁴Énerichuware, ema Viya máimerekapa'i eta tiáramikareana, máikutiarana'i eta émaira'i wanairuka, mawaraira'i tisuapakareyare'i eta nametarapiana, énerichuware puiti ema Machanewa Viya, ema tíjaraka'avi'i eta vítukakenepachuyare apaesa vítauchayare'i eta vématanerepipachu'i víjara'i máicha.

⁵Ema Viya, wá'iware énaina'ini matuparakawaka'ini ena ángeleana eta énairayare téchanaya eta arairuyare awasare eta vikuchapakene'i, étaipa eta véchejisi'akeneyare'i.

⁶Eta Takapika'ukene Ajureka, ani taka'e'i eta táechejiriruwa: “¿Naja'asika ema achane? ¿Taja'a takayema pecha'i, tási'a peñamawaware maicha ema?

⁷Te pépiyakapa ema mainapure'i, wa'i mákutinasiwaka'ini ena ángeleana. Ena, nakachurika'i ema eta náitupajijiasirawana, píjaraka'avi'i eta viáwakure'i tajara'ikene'iware, tétavikawa'iware eta vikapika'uira'i;

⁸tisuapakare'i viti tamutu eta pituparasira'avi'i.” Taka'e, eta véchira'i tamutu eta máepiyaruana'i ema Viya, tájina tikaejeraima'i, maicha ema. Wícha'asera víma'a'ini vikayamurika'ini tamutu táichavenena'ini eta visuapakarewa'i.

⁹Marari'isera ema Jesús. Tiúkupaika'i ánipi'i te juka apake'e, nakachuriakaipa ena ángeleana eta náitupajijiasirawana. Eta máemunasira'avi'i vimutu viti achaneana, ema Viya máimikapakaicha'aware te crusu vítivene'i. Té'esera te táekenepa, makaejakapa ema Jesús taye'e eta tajara'ikene máwakure'i takapika'ukene, táitsiwa'i eta makatajiwaira'i eta máepenira'i.

¹⁰Ema Viya émaichu'i técha'i tamutu. Ema, manerejika'i ema Machicha eta makuchukuira'aviyare'i, tiáma'aviyare'i te máwasa, viti machichanayare'i. Émaipa ema Jesús, eta makamichira'i tamutu eta mátajiwana, títauchawa'i tamutu eta matupara'a'i.

¹¹Eta máepachinachiraipa eta viáchanewana, visiapamuri'aipa ena machichanaveana'i ema Viya, vikuti'ipa ema Jesús eta machichaira'i ema Maiya. Eta taka'e, ema Jesucristo, ichape eta máurisamurewa'i eta viye'e eta majakapira'avi'i maparape'aviyare.

¹²Eta Takapika'ukene Ajureka, ani taka'e'i: “Néchejisi'airaviyare, Tata, naye'e ena nuparapenaveana. Nuwara'a nujirauchaviyarewa, nakachanenu'iware ena.”

¹³Ániware taka'e'i: “Tétavikawa eta nukasiñawaira'i maye'e ema Tata Nukaiyakene.” Eta apana, ániware taka'e'i: “Ani návi'a'i nuti, énapa ena pichichanaveana'i, ena pinerejiruana'i píjararunuana'i piti Tata.”

¹⁴Viti achaneana, étanaichu'i eta vikaechera étapa eta vítine, ene maka'e'i ema Jesucristo, makaeche'i, makaitine'iware étaichu'i takuti'i eta vítine víti achaneana, eta taka'e, eta máepenina'avi'i, makapakechi'ayare'i ema wínaraji.

¹⁵Viti achaneana, ichapekenéni'i eta vipisira'i eta vépenirayare'i, taicha vipika'i eta víkuñayare, eta vipisira'i ta'apapirika'i eta vítaresira, émasera ema Jesucristo makaepa'aipa eta víkuñayare'ini, waipa tápikakare'ini eta viye'e.

¹⁶Ema, eta máitesira'i, wa'i étaina'ini táimiteka'ini eta máimikatasirawakayare'i ena ángeleana, eta timiteka'i ema timikataka'aviyare'i viti manerejiruana mamairiekeneana'i ema Abraham.

¹⁷Eta taka'e, eta máukupaisira'i ema Viákenu, tatuparaka'i makake'eyare'i eta viáke'e eta máitaresira'i, tikuti'aviyare'i viti maparapenaveana tamutu eta vítaresira'i, yátupiyare'i eta máetaviuchiraya eta majapanuira'aviya, máetaviuchayarewa eta makasiñakarewaya eta viye'e, taicha makarichu'i ema tiyaseucha'aviparaka'i te mamira'u ema Viya Makaiyakene, makaepa'áina'aviyare'i eta viviurewana'i táichavene'i eta vipekaturana viti achaneana.

¹⁸Ema Jesús, ichape eta makatajiwaira'i, makaitsamarajikene'i ema wínaraji, makamicha'isera tamutu, wa'i máisapawa'ini, tási'a puiti, ema marata'a tímikataka'aviyare víti eta vikamichirayare eta viátajiwana táichavene'i eta makaitsamarajira'avi'i ema wínaraji.