Read Ignaciano Hebreo 5 Bible Online

Hebreo 5 - Ignaciano bible

Hebreo 5

¹Namutu ena nákani katupara'anayare tiyujarakara'iana manerejiru'i ema Viya te vitaraku viti achaneana. Natuparakasiwaichu'i ena tikaitekapanayare'i me Viya eta námawa'uana ena achaneana, étapa eta nanakiruwana táichavene'i eta napekaturana.

²Ena, tijapanura'ianayare'i naye'e ena máiturereana énapa ena téjekapawana, taicha enaichuware tikatajiwana'i taye'e eta naeche máteji;

³étaipa eta nakatajiwairana, tikamunuwana'i ena apana tikamawa'uana'i maye'e ema Viya táichavene'i eta napekaturana.

⁴Taka'e, mákani tikatupara'ayare tiyaseura'iyare'i, wa'i émajiriruwaima'i máichu'akasiwaichu'i. Éma'i ema Viya tíjaraka'i eta matupara'a'i mapika'uyare'i, takuti'i eta máijarasira'i ema víyara'aini Aarón eta matupara'a'i makapika'uira'iware.

⁵Ene maka'e'i ema Cristo, wa'i émajiriruwaina'ini eta makatupara'aira'i tiyaseura'iyare'i eta viye'e. Émaichu'i ema Viya tíjaraka'i eta matupara'a'i mapika'uyare'i, taicha ani maka'e'i ema Viya: “Píti yátupikenevi'i nuchicha; puiti nukaejakavi'i te piáwakure.”

⁶Eta apana máechejiriruwa te Takapika'ukene Ajureka ániware taka'e: “Nunerejikavi'i píti piyaseura'iyare, péchejiura'iyare naye'e ena achaneana, máitawakakayare, eta juka pitupara'a, pikutiyare ema nuwanaraini Melquisedec.”

⁷Taka'e, ema Cristo, te matiari'icha'a ani te juka apake'e, tiyaseuchawa'i te mayujarasirana eta me Maiya. Muraka eta máumitira'i, máiya'aira'iware. Wa'i mákuemitisika'ini ema Maiya eta makaechepusirayare'i te máekari. Jé'esare, tisamakare'i te mayujarasirana, táichavene'i eta mawaraira'i máitaucha tamutu eta mapanereruana ema Maiya.

⁸Taicha ema Cristo, machicha'i yátupikene ema Viya. Wá'isera majunijika'ini eta makatajiwairana'i. Makamicha'i tamutu, makarawa'uira'i eta masuapajiraiwa'i;

⁹Eta tamutuirapa eta máepenira'i, téchepukawarepa, tási'a marata'apa eta makuchuku'aira'aviyare vimuti viti visuapana'i ema. Máitawakakayare'i eta vítaresiraya máicha,

¹⁰eta taka'e, ema Viya manaka'i eta máwakure, téchejiura'i eta viye'e makuti'i ema víyara'aini Melquisedec.

¹¹Ichapemuriyare eta táechejisi'akene'i eta juka numetaru'e'i. Tikajera'isera nítametaka'e'ini, taicha tétavikawa'i eta tamurakawa'i eta echutiana.

¹²Ánakiapaipa'ineni eta ekarawa'uira'i, iúri'aipa'ini puiti ímitura'ipa'ini. Ekamunuicha'a natiari'iyare'i nákani tiápecha'eanaya títametaka'eanayare'i jákani, wa'i tákajera'ini eta vímitukasiwana'i me Viya. Puiti ekutipa ena amuyana, takamunu'i vésichayare'i eta tacheneama eta waka eta tikaitarekayare'i, taicha wicha'a náituka'ini nanika'ini eta tinikakareana.

¹³Taicha ena amuyana tiájikanacha'a, wicha'a técharekana, wícha'aware napanerekene'aima'i eta táuriwayare eta náitaresira. Ene eka'e'i eti, apaesaichu'i ekaratakawa'i eta é'isira eta táurikeneana.

¹⁴Énasera ena yátupi'i eta nakarawa'uira'i, ena nakuti'i ena íchanaruana'i. Téchawanaipa, náitukaipa tinerejiuchawana eta táurikeneana, náepurupa eta tamaurikeneana.