Read Ignaciano Hebreo 7 Bible Online

Hebreo 7 - Ignaciano bible

Hebreo 7

¹Ema Melquisedec, rey'i, taye'e eta awasare Salem. Ema'i mawanara'iware ema Viya, tiyujarakara'i ema. Taka'e ema Abraham énapa ena masuntarurana té'akakapana'i, makanarawaka'i ena reyeana. Máita'akakawaka'isera. Taka'e, te tichawapa te mapena ema Abraham, mákapapa ema Melquisedec, mayujaraucha'i;

²taka'e, ema Abraham títsirijikawapa. Máijarakapa ema Melquisedec eta diésmuri'i eta maiturewa'i naye'e ena mánarana. Eta takayemakene'i eta maijare ema Melquisedec, te vechejiriruwa “Ema Rey máurikene'i”, akenuka'iware ema te awasare tikaijare Salem, te vechejiriruwa taka'e'i “rey táuriwa tamutu eta máwasa.”

³Ema Melquisedec, wa'i táimatikare'ini eta majurusira'i, eta máuchusira étapa eta máepenira'i. Nája'a'ipuka ena tikachichana'i. Eta matupara'a'i, ene maka'e'i puiti ema Machicha ema Viya, nájina máitsiwaina'ini. Máichekuarakire'i eta máwakure.

⁴Ema maka Melquisedec tikapika'upana'i maicha ema Viya. Eta taka'e, ema viáchukaini Abraham máijaraka'i eta diésmuri'i eta maiturewa'i naye'e ena reyeana máita'aruana'i.

⁵Ema Moisés manakapa eta wanairipi, tatuparaka'i namutu ena mámariekeneana ema Leví, tiyujarakara'ianaya'i ena, tawaneka'i tinakikawanayare'i eta nayasea'ana eta nawachayare ena najaneananaichu'i, mámariekeneanaini ema Abraham.

⁶Émasera ema Melquisedec, wa'ineni mámarina'ini ema Leví, majakapa'isera eta nanakiruwana maye'e ema Abraham, eta majachapira'i eta maitauchirayare eta maechejiriruwa ema Viya. Eta taka'e ema Melquisedec mayujarauchapa ema Abraham;

⁷eta taka'e, vimutu vecha víti, mákani tiyujaraucha'i ema apana, ema tikunachakarepana'i maye'e mákani mayujarauchakene'i.

⁸Taka'e, ena apamuriana tiyujarakara'iana tijachapana eta vinakiruwana viti achaneana tépenanapaipa'i. Émasera ema Melquisedec wa'i makaitsiwa'ini, puiti eta Takapika'ukene Ajureka táechejisi'a'i ema, máichekuarakire eta máitaresira'i.

⁹Émaipa ema Leví énapa namutu ena tiyujarakara'iana mámariekeneanaini'i, eneichuware naijaraka'i ema Melquisedec eta nanakiruwa, taicha ema Abraham ena maka'e'i émaichu'iware niyakara'i,

¹⁰Ani taka'e'i eta juka, taka'e ema Melquisedec te maka'epaipa ema Abraham, ema mamapaipa'i te make'e ena mamairiekeneanayare'i, wícha'a'ineni nauchuka'ini.

¹¹Ena tikawasana te awasare Israel najachapa'i eta wanairipiana naye'erepi'i ena tiyujarakara'iana Levitikuana. Taicha te náitaucha'ini ena tiyujarakara'iana eta naimitupiruchirayare'i ena achaneana, wáipayare'ini takukamunuini ema apana tiyujarakara'i, wáipasera mámariékenéna'ini ema víyara'aini Aarón.

¹²Taicha eta nakaitsiwaira'i ena tiyujarakara'ina, éneichuware tikaitsiwayare'i eta wanairipi;

¹³taicha ema Jesús, wa'i mámariekenena'ini ema Aarón. Ema, máchukaini ema Judá. Te nataraku namutu ena, nájina émanaina'ini mayujarakara'i'ini.

¹⁴Taicha ema Moisés wa'i máechejisi'a'ini matiari'iyare ema tiyujarakara'iyare, mámariekene'i ema Judá. Émasera ema Jesús táechejisi'akene'i eta Takapika'ukene Ajureka eta émairayare tiyujarakara'iyare.

¹⁵Taka'e, vímatiekene'a'i eta máitsiwachirapa ema Viya eta viyani'ayare eta maye'e, taicha ema arairuyare tiyujarakara'i, takamunu'i eta makutirayare'i ema Melquisedec,

¹⁶tási'a, vímatiekene'a'i puiti ema tikatupara'a'i ema Jesús táichavene'i eta máitaresirayare máitawakaka'i. Wa'i étaparakaina'ini eta nája'a'ipuka ema máchukaini'i.

¹⁷Taicha taka'e'i eta máechejiriruwa ema Viya: “píti piyaseura'iyare máitawakakayare eta juka pitupara'a, pikutiyare ema Melquisedec.”

¹⁸Taka'e, tépa'apa eta wanairipiana manakiruana'i ema Moisés. Taicha tájina tárata'aini takuchuku'a'avi'ini táichavene'i eta vimáitauchira'i,

¹⁹eta wanairipi wa'i takaitekapa'avi'ini me Viya. Puítisera eta arairu'i, tétavikawapa eta makasiñakaréwa'i ema. Émapa tikaitekapa'avi'i maye'e ema Viya.

²⁰Ena náinapureana tiyujarakara'iana, tájina wa'i maijaraka'ini eta maitaureya maechejiriruwa eta nakatupara'aira'i. Émasera ema Jesús, tikapika'upana'i eta máwakure'i, taicha tíjarakawa'i ema Viya eta maitauchirayare'i eta maechejiriruwa, te matuparakapa ema Machicha,

²¹taicha eta Takapika'ukene Ajureka táechejisi'a'i, ema Viya, eta maijarasira'i eta maechejiriruwa ema machicha, ánipa taka'e'i: Ema Viya maijaraka'i eta maechejiriruawa piti piyujarakara'iyare máitawakakayare eta juka pitupara'a.’ ”

²²Jé'esare ema Jesús, tétavikawa'i eta makasiñakarewa'i eta máitauchiraya tamutu eta máijararuwana'i ema Viya.

²³Eta tayerewa'i te juka añuana, kamuriana'i ena tiyujarakara'iana. Étasera tícha'i ena tépenanapaichucha, wa'i náimiyanawa'ini náitareka'ini.

²⁴Émasera ema Jesús, máepenakaka'i ema. Nájina nasiapa'ini máitsiwaina'ini taye'e eta máwakure'i.

²⁵Tási'a puiti, makarichu ema marata'a'i tikatiucha'avi'i viti vikasiñana'i ema. Ema, tikaitekapa'avi'iware me Viya. Máitawakakayare'i eta máechejiuchira'avi'i.

²⁶Taka'e'i puiti eta makatupara'aira'i ema Jesús téchejiucha'aviyare. Tétavikawa'i eta vikamunuira'i ema, taicha yátupikene'i santu, matapiraware'i ema. Tájinaware máimatiya'ini makapekatura'ini. Wá'ikene mákuti'ini ena pekatumareana eta napanereruana. Puíticha ema mávi'a'i taye'e eta anuke'e anuma.

²⁷Ema, wá'iware mákuti'ini ena apamuriana tiyujarakara'iana. Ena, nakamunuicha'a tamutuyare'i sácheana nakapaka eta sárare náijuchakeneyare'i, tási'a natiwayarepa tiyaseuchawana taye'e eta napekaturaichu. Te tamutupa, tapaenumawapa nayaseucha eta napekaturana ena achaneana. Émasera ema Jesús, éta'eichu'i eta mawachachira'i eta vipekaturana vimutu, tíjarakawainapa eta máepenira'i te crusu.

²⁸Ena nani ajairana tikatupara'ana tiyujarakara'ianayare'i, taicha eta wanairipiana, étasera wa'i nánasi'ini te juka apake'e, náepenaekene'apaichucha eta náematanerepianaini. Eta makatupara'aira'i takachurika'i eta nakatupara'aira'i ena nani. Máitawakaka'iware eta máechejiuchira'avi'i. Taicha ema Viya máijaraka'i eta maechejiriruwa eta matuparasira'i ema Machicha.