Read Ignaciano Hebreo 9 Bible Online

Hebreo 9 - Ignaciano bible

Hebreo 9

¹Eta táinapureni'i makaejaru'i eta maechejiriruwa ema Viya naye'e ena nani náinapureana tiyujarakara'iana, tatiari'i'i eta naye'erepichu'i ena te juka apake'e, jé'esare, te jena Jerusalén eta távi'a'i eta santuario nayujarasirare.

²Ani taka'e'i eta táima'i te náepiyakainapa, eta tínapuka cuartu tikaijare'i Lugar Santu, takapika'ukene'i, eta távi'a'i eta kandeleru étapa eta mesa távirare eta pan Takapika'ukene maye'e'i ema Viya.

³Eta apana cuartu, tikaijare'i, Lugar Santísimo. Eta tétavikawapanapa eta takapika'uira.

⁴Te tachakaya eta nanakisirarewa eta námawa'uana, amairi'a'i uru náijuchirare eta incienso, etapa eta tikaijare arca amairi'a'i uru. Te tachakaya eta arca tatiari'i eta jarra amairi'a'i uru, eta tavi'a'i eta tikaijare'i maná étapa eta matsukurupa ema Aarón eta tímarutsikaipa'i, etapa eta taunaiya'i eta ajureja marija'i eta makaejaru'i eta maechejiriruwa.

⁵Te táina'u eta kajune, natiari'i'i ena apinana ángeleana, tikaijare querubín, eta juka táma'i eta majaraiwa'i ema Viya, tási'a, eta napawana táepaku'ika'i eta kajune. Jarari'iware eta apamuriana tayereruwanaini'i eta santuario, wá'isera nuwara'a nechejisi'a'ini te juka puiti.

⁶Eta taka'e'i eta táima'i eta náemamakasareana eta te santuario, taka'e, tamutu sácheana ena tiyujarakara'iana tisiapaparakana'i taye'e eta tínapuka cuartu eta náitauchi'aparaka'i eta náematanerepiana.

⁷Étasera eta te apaju'e, táetaviucha'i eta takapika'uwa'i, makarichu'i tisiapa ema nákenumuri ena tiyujarakara'iana, eta'eichuware tisiapa te étana añu, mámayarepa'i eta táitine eta sárareana, eta tiwachachayare'i eta mapekatura ema tisiapa'i, étapa eta napekaturana ena achaneana.

⁸Émasera ema Machanewa Viya mawara'a vímatiekene'aya eta juka, eta cortina, eta tiávimiraucha'i eta Lugar Santísimo, wa'i táisapa'ini tisiapana ena achaneana, puítisera vísapakare'i víti eta vítekapauchaya ema Viya.

⁹Tamutu eta juka etachucha eta taimeraki juka viawakurepa sacheana. Taicha eta namawa'uana nanakiruwana te mamira'u ema Viya, waipa etaina tarata'a takatiuchaima'i ena tipanerechana eta nawaraira nakurisamurecha ema Viya.

¹⁰Wa'i étaparakaina'ini taye'e eta náchanewa, taicha eta námawa'usana ena, tinikakareanachucha térakarechucha, étapa eta nakasipawa'uira te tisiapana taye'e eta templo, eta júkana naye'erepiana'i, wa'i tímiyanawaima'i, taicha te tépenapa ema Cristo te crusu, máitsiwacha'i ema Viya eta vítekapauchirayare'i ema.

¹¹Puítisera, tímerekawapa ema Cristo, jé'eware ema, yátupikene'i tiyujarakara'i eta viye'e tétavikawa'i eta táuriwa eta viáchanewana máicha. Eta Santuario te anuma távi'a'i eta mayujarasirare, wa'i taye'ena te juka apake'e tamaurikene'i. Te jena, tamutu tiúri'i, tipachina'iware, tétavikawa'i eta takunachakarewa, takachurika'i eta santuario nayujarasirare ena apamuriana tiyujarakara'iana, náepiyaruchucha ena vikutikeneana achaneana.

¹²Ema Cristo, jé'eware ema mávi'a'i taye'e eta yátupikene Santísimo te anuma, waipa makamawa'u'ini eta táitine eta sárareana chikeru, chíwaina'ipukaini, eta mámawa'u'i ema, étakenepa eta máitine, éta'eichu'i máicha ema, vimutu'isera viti makuchukureana'i, tási'a, máitawakakaipa eta vítaresiraya.

¹³Ena nani tiyujarakara'iana náepusasapaikaicha'a te náina'u ena nachipejikeneana'i, eta náepusasapairu'i, eta táitineana eta turu étapuka eta chíwachicha, étapa eta tsimapama taye'e eta esena chikeru náijureasa, eta júkana, tépachinachinawaka'i eta náke'eana, apaesa táisapakarepa nasiapa taye'e eta templo.

¹⁴Eta apana taka'e'i eta juka, ¡tavetijichapuka eta maitine ema Cristo ichape'i eta taitupajijiasirawa'i! Eta taka'e'i maimereka'i maye'e ema Machanewa Viya, maitawakaka, émasera ema Viákenu Cristo tijararekawa'i emajiwa te mamira'u ema Maiya, eta makatajiwaira'i tajina tachipe'ini, eta maitine étapa tepachinacha'avi'i eta vipanereruana eta vichira'i eta tamaurikeneana tiama'aviyare'ini eta vepenira, puitisera tajinapa eta taviucha'avi'ini eta vikaemataneasira ema Viya.

¹⁵Puíticha ema Cristo, ema yátupikene'i viye'e abogado, téchejiuruka'avi'i taye'e eta táekenereru'i matratune'i ema Viya. Eta máepenira'i ema Cristo, mawachacharipa'i tamutu eta vipekaturanaini viti máichu'akeneana'i ema, viti, énapa ena náinapureanaini tijakapana'i eta táinapureni'i matratune ema Viya. Tási'a, yátupi'i eta makuchukuira'aviya, máijaraka'avi eta vítaresiraya máitawakakayare'i.

¹⁶Nuwara'a nímikutichina'e: Mákani achane te manakika'i eta ajureka titametakara'i, májuchapa eta mawaraira'i máijarakasichawakayare'i ena machichanaveana te máepenapapuka, eta tasuapakarewayare'i eta wanairipi takamesaekene'ayare'i takayasesereru te yátupipuka tépenaipa ema achane, te yátupi'i tépenaipa'i, eta testamento tisuapakare'i.

¹⁷Wícha'asera tasuapakare'ini eta ajureka titametakara'i, te wícha'a'i tépena ema maka tépiyaka'i, tapaenumawa tisuapakare eta ajureka titametakara'i tepenapa ema tiájucha'i.

¹⁸Takutikene'i, eta táinapuiru'i makaejaru'i maechejiriruwa ema Viya, takamunupa tépena eta sárareana, apaesa nave'aya eta táitine.

¹⁹Ema víyara'aini Moisés makametarapipa tamutu eta wanairipiana naye'e namutu ena achaneana. Taka'e, mave'apa eta titsi lana máitiapusichapa eta yukuki, máepusasapaisi'ayare'i eta ítiama, táitineana eta chikeruana, chiwana takachane eta une, tatiwa máepusasaka eta libro tiáma'i eta wanairipiana, máepusasakaware ena achaneana náurujiruwana'i.

²⁰Taka'e, mametakawakapa ema: “Eta juka íti népusaru'e'i, eta táikutiara eta íjarasirawa'i ítauchayare tamutu eta makaejaru maechejiriruwa ema Viya eta eye'e eti.”

²¹Éneichuware ema víyara'aini Moisés máepusasakaware eta ítiama eta te santuario étapa tamutu eta náemamakasareana te nayujarasirana.

²²Taicha taka'e'i eta wanairipi, tikaepusasa'ayare'i te iti tamutuyareni eta náemamakasareana'i, náepachiasi'ayare'i. Taicha te wa'i takuepusaikawa'ini eta iti, wá'iware takuepa'a'ini eta pekatuana.

²³Taka'e, eta juka naemamakasareana'i ena nani, takamunu'i náepusasakayare'i eta nayujarasirayare'i apaesa tapachinawaka'ini. Náikutipakeneana'i eta tiávi'ana'i te anuma. Étasera eta Santuario tiávi'a'i te anuma, takamunu'i eta apana iti tasiwachakene, takachurikayare'i eta iti náepusasaru'i taye'e eta santuario te juka apake'e.

²⁴Ema Jesucristo, tájina máimatiya'ini mayujaraka'ini eta te jena santuario te juka apake'e. Étakene'isera masiapa eta mayujarasirayare eta te Santuário tiávi'a'i te anuma. Puíticha matupi'amiraucha'i ema Viya eta mayaseuchira'avi'i víti.

²⁵Ema maka tiyujarakara'i te juka apake'e, añuipa'i eta masiapira taye'e eta tékene'a cuartu Santísimo. Tikamawa'upa'i eta táitine eta sárare, wa'i máitinenaichu'ini ema.

²⁶Émasera ema Cristo, éta'eichu'i eta máepusaisira'i eta máitine. Wa'i mápepejirikawa'ini te añuana. Te mápepejirikawa'ini, éneichu'iwareni tiápepejikawa'ini eta máepenira'i puiti juka táepanirawa'i eta apake'e. Eta tímiteka'i ema, eta makaepa'airayare'i eta vipekaturana.

²⁷Víti achaneana, eta'eichuyare eta vépeniraya vimutu. Te táekenepa, járajapainapa eta viyasesere'iyare,

²⁸éneichuware ema Cristo, éta'eichu'i eta máepenira'i makaepa'airayare eta vipekaturana viti kamurikeneana achaneana. Yátupisera tiápechawaya tímerekawa, wáipasera étaima'i tímiteka mawachachaya eta pekatuana. Eta tímitekayare ema, tépana'aviyarepa viti vé'ikana'i vikuchapana'i ema eta makuchukuira'aviyare'i.