Read Ignaciano Santiago 1 Bible Online

Santiago 1 - Ignaciano bible

Santiago 1

¹Nuti Santiago, mawanaranu'i ema Viya, emapa ema Viákenu Jesucristo. Nuwara'a nukaitekapa eta juka néchejiriruwa eye'e emutu eti nujaneanana israelítana éjanerepairuana'i te tamutu awasareana.

²Nuparapenaveana nemunaruana, eti nuwara'a nechejirika'eya, te tatiari'inapuka eta ekatajiwairana puiti juka ítaresira'i, wa'i ekukainajiruwa, ekaurisamurechawachucha, ewapinawaya, taicha iúripanayare eta iúchukuirayare.

³Taicha échaipa eta ekasiñawaira me Viya titsamareka'eyare'i eta erata'ayarepuka eta iatajiwana, eta juka eta timikataka'eya'ere eta ekamichirayare eta iatajiwana apaesa etumechawa.

⁴Taka'e ekamesawayare étumechawachucha apaesa tatupiru eta itaresira, etainapa timikataka'eyare, apaesa wa'i ekuechuriaka eta esuapajiraiwaina.

⁵Taka'e, te tatiari'inapuka eta téchakare, te wá'ipuka íturuekene'a'ini, eyaseakayare ema Viya eta ítupajijiasirawaina, ema Viya tíjaraka'eyare, taicha ema tájina mayawanakenena, wá'isera tikajacha'avima'i eta viyaseasirana jákani vikamunukeneana.

⁶Yátupina'isera ákasiñawa me Viya eta eyaseasiranayare eta ítupajijiasirawaya, wa'i ekueñamawa maye'e, taicha te éñamawapuka, tímikutijirikawaipa'i ekuti'i eta táepakusira eta ichape une tékekerekawa'i taicha eta tekatikawa.

⁷Taicha narari'i ena tékekerekawanachucha eta napanereruana, wa'i étanainaichu'ini jákani nawara'akeneyare, nákani taka'e'i eta napanereru, ena tájina máijarakaima'i ema Tata Viákenu,

⁸taicha puiti pipanerecha picha eta piwara'akene'i, tási'a achichu apanaipawa eta pipanereruana, wa'i etanainaichu'ini eta pipanereru.

⁹Émaipa mákani vichamuri, te páure'ipuka eta máitaresira'i, tiwapinawayaresera taicha eta máimikatasiraipa ema Viya taicha eta máemunasira'i.

¹⁰Émaipa mákani vichamuri kaima'akenepuka eta máitaresira'i, énerichuware tiwapinawayarewa, tayanapane títa'apuka eta máima'akeneana'i, taicha eta víma'akeneana'i te juka apake'e, wa'i táeñamakare'ini, taicha títawayare'i tamutu.

¹¹Ánipichu eta táurinajiwa eta flureana; taicha te járajapapa eta murakana sache, takajiyujikapa, tamutu títawa eta táurinajiwaini'i, témirikaipaware eta taflurene, ene maka'e mákani riku, wa'i tánasima'i eta máima'akeneana, tayanapane wa'i makuwara'a táitawa tasi'asera titawayare'i eta mawacharapiana.

¹²Tétavikawa eta náuriwayare nákani vichamuriana tikamichana'i tamutu eta nátajiwana'i, járajapayare eta sacheanayare eta najakapiraya eta naikuchi'i táitsiwayare'i maicha ema Viya, máijarakainapa eta táuriwayare eta náitaresirayare, taicha tikunachakareana'i, taicha maitauchayare'i eta mapanereru'i ema Viya naye'e ena témunakana'i ema.

¹³Té'eware tatiari'inapuka eta éjekapirawaya jákani tamaurikeneana'i, wa'i émaima'i émeteaka ema Viya, taicha wa'i tási'akenena me Viya eta juka tájiparakana, nájinaware mapamiruina'i náicha'ini eta júkana tamaurikeneana.

¹⁴Nákanisera nákipairuwana taye'e eta tamaurikeneana, táuchurepa te napanereru tamaurikeneana, tási'a nawara'a náichayare'i eta pekatuana, waipa nanekapawa'ini eta náichiraipa, té'esera te táekenenapa, étapa tiviuchayare'i.

¹⁵Taka'e eta jukana tamaurikeneana eta taepaniawa eta pekatu. Taka'e eta juka pekatu, eta taepaniawa eta tamaurikeneana, taka'e etapa tiamayare eta maepenirayare eta timikuñakayare.

¹⁶Némunarukeneana nuparapenaveana, machu éjekapawa:

¹⁷tamutu eta juka vima'akeneana'i taurikeneana'i, tamutu tiasi'a'i te anuke'e anuma, ema Viya tepiyaka'i eta tiavi'ana te anuma. Ema Viya émaparasaichu'i: eta maye'e tajina titsiwachawaima'i tamutu'i tikaechera taicha eta majaraiwa.

¹⁸Taicha ema mawaraira'i machicha'aviyare'i, eta taka'e tijaraka'avipa eta arairu vitaresirayare'i, taye'e eta yatupikene maechejiriruwa, taicha maichekuarakirenapa eta vitaresira.

¹⁹Eta taka'e, eti némunarukeneana nuparapenaveana, nutuparaka'echa yátupina tauri eta esamiraina eta máechejiriruwana ema Viya. Wa'i ekuijaja'úchawa esema, epanerechinawa eta échejisiraya.

²⁰Taicha nákani tisemarairi'iana, wa'i étaina'ini náicha'ini eta mawara'akeneana ema Viya.

²¹Eta taka'e ínajikapa eta tamaeperajisira eta iáchanewana, taicha tétavikawaware eta tapamisira'avi'i icha eta tamaurikeneana, puítisera nutuparaka'e, ínajikapa tamutu eta júkana, ekasamureyarepa eta máechejiriruwa ema Viya eta ímitukasiwana'i, yátupina esuapa, jé'eware, eta tikuchuku'a'eyare eta iachanewana.

²²Ítauchayare eta tametarapiana'i eta máechajiriruwana ema Viya, wa'i takuejekapawa eta epanereruana, machu ímijachapuka tarataichu'i eta esamararasira'i taicha te taka'e eta juka vitijiwainapa viwayuakawa.

²³Wa'i ekukuti nákani nasamarararuchucha, tási'a wa'i náitaucha'ini eta tawanairipi'i, tímikutijirikawaipa nákani tímakunachawana'i te espejo:

²⁴ema timakunachawa'i, maima'a'i eta mamira tási'asera te tekerukawapa maemitisikaipawa eta maima'i'i.

²⁵Étisera ekutiyare ena natupiruwana'i eta nasamira'i táuriwa eta yátupikeneana vímiturapiana tási'akeneana'i me Viákenu, wa'i ekuemitisika, tási'a, ítukayare enerejika eta táurikeneana, esuapayarewa eta ímitukasikeneana'i, tási'a, tétavikawaya eta iúriwaya táicha.

²⁶Narari'ipuka nákani tímijachawana'i yatupikeneana naitaucha eta mawanairipi ema Viya, wa'isera náituka'ini tikaratajakachawana, ena nani téjekapawana'i eta napanereruana.

²⁷Vítisera, eta vítauchira'i eta yátupikene té'ikakare, te viwara'a tájina véchejisiakarewaina te mamira'u ema Tata Vikaiyakene: tatuparaka'i vijapanuyare vítatiyare ena amaperuana wáchachichana énapa ena náepenaimakeneana taye'e eta nakamunuirawana'i, tituparaka'avi'iware wa'i víchaima'i eta pekatuana te juka apake'e.