Read Ignaciano Santiago 3 Bible Online

Santiago 3 - Ignaciano bible

Santiago 3

¹Nuparapenaveana, takamunu najaneakawa muraka nákani naimereka eta nawaraira'i timiturekara'ianayare'i. Échawayare eta tikayasesere'iyare'i muraka me Viya nákaini timitura'iana.

²Vimutu véjekapawa eta véchejisirana. Nájina émanaina wa'i makuejekapawaini eta máechejisira. Te matiari'ina'ini mákani achane wa'i makuejekapawaini, ichape'ini eta makunachakarewaina'ini, taicha ema, yátupi'i eta máitupajijiasirawa'i, máituka'iware tikaratakawa eta máke'e.

³Eta juka tímikutijirikawa'i te vikapera eta kawayu, vinakapa eta freno te tajaka, vichurujakachapa, viámapa te jákani viwara'akene viámi'a.

⁴Takutikene eta ichape pakure, táewatajikaneni muraka eta tékatikawa, étapa eta tajunapira muraka eta une, tarata'ayare'isera táimitupirucha eta taye'e leme wá'ineni ichapena'ini, ema piloto máimitupiruchayare'i te jákani mawara'akene mámi'ayarepa'i.

⁵Ene taka'e'i eta juka vinene; ánichichaichuneni taye'e eta viáke'e. Tasapi'a'isera táechejisi'a'i eta ichapekeneana. Takutikene eta yuku. Ánichichaichuneni eta taepanirawa táijucha, tarata'a'isera táijucha eta ichapekene wáma'i.

⁶Nákani achaneana te wa'i náituka'i tikaratajakachawana, amairijipa tamutu eta náitaresira. Tíñe'ikare'i najarareka ena nákani kamuriana achaneana, taicha eta náechejiriruwana'i. Ena nani téchejisi'ana'i eta tamaurikeneana, ena máwa'aruana'i ema Wínaraji, técha'i eta infierno.

⁷Ema achane marata'a'i namansucha eta kawayu, eta kichareana étapa eta táiñe'ikeneana sárareana tiávi'ana te apake'e étapa te ichape une;

⁸étasera eta vinene, nájina tikaratakaina, táechejisi'ayare'i eta tamaurikeneana. Takuti'i eta jumare te nájina tirata'aima'i típuchaina, tiáma'iware eta takapasirawakayare ena achaneana.

⁹Eta vinene, étaichuware táuchusi'a eta náechejiriruwana ena tikunachanayare'i ema Tata Vikaiyakene, ena achaneana naparaepíyana'i me Viya.

¹⁰Wá'isera tikunachakarema'i te tiúchuka'i eta jakare eta náume'aira ena nakutikeneana. Nuparapenaveana, tatuparaka'i wa'i ekuka'e'ini.

¹¹Takutikene eta une, te tipachina'i eta tajututurusira'i te apake'e, wa'i tíja'uchawaima'i titsiriekawa, táuchukapukaini tisukareama'ini, ticheveamapuka'ini.

¹²Takutikene wa'i tiúchukaima'i eta aceite taye'e eta ta'i eta yana. Étaipa eta narasa, wa'i tiúchukaima'i eta ta'i siñáve'inapa'ini. Ene taka'e'i eta une, wa'i tajututuruka'ini te apake'e eta tipachina une takachanepa'ipukaini eta ticheveama.

¹³Te natiari'inapuka te etaraku nákani náechema'a'i tamutu, tatuparaka'i náichayare eta táurikeneana, yátupinaware eta namansuwayare. Étapa tímikaecherachayare'i eta náitusira'i.

¹⁴Te etiari'ipuka eti ímijachawa'i échema'a'i tamutu, tási'a ekapinarura'i'i te esamureana, ewara'apa iápajupanawayare'i naye'e ena apamuriana eta ítupajijiasirawaya, wa'i yátupina'ini eta ítupajijiasirawaina'ini.

¹⁵Eta juka échemaraiwawaka'i, wa'i étaina'ini tási'akenena'ini me Viya. Taye'echucha te juka apake'e tási'akenechucha eta ne achaneana, máewaekeneru'i ema wínaraji.

¹⁶Taicha ena tikapinarujirikakana'i té'ajirikakanapa. Wa'i tákutikaka'ini eta napanereruana. Náichaichucha eta tájiparakana taiñema'ikeneana;

¹⁷narari'isera ena yátupikene'i eta náechemaraiwa, tási'akene'i me Viya. Tikatiura'iana'iware naye'e ena apamuriana, tijapanura'ianaware. Eta náichira'i eta táurikeneana, tikajira'iana'i, nájina nanerejiruina. Tatupiruwa'i eta náechejirisirawana.

¹⁸Nákani tikatiura'iana'i, náetupirika'i eta náitaresira ena apamuriana. Jé'esare, tájinasarepa náichirawaina'i. Nanakipaika'i eta táurikeneana.