Read Ignaciano Santiago 4 Bible Online

Santiago 4 - Ignaciano bible

Santiago 4

¹¿Tavi'a tási'a'i eta e'ajirikakaira'i eti? Ekutikaka'i ena apamuriana eta ejamuraraiwana'i. Eta, timauricha'e'i eta tájiparakana, étijiwaichucha íchawa'i.

²Eti ejamuracha'i ekaima'akene. Étasera emaitusirawa'i, ewara'apa ekapaka ena tikaima'akeneana'i. Eti ekapinarureka'i eta emaitusirawa'i, tási'a e'akakauchapa. Taicha eti wa'i eyaseaka'ini ema Viya eta ekamunukeneana'i;

³eti eyaseaka'ineni ema, wá'isera máijaraka'e'ini, taicha wa'i táetupikawa'ini eta eyasesearapiana, étachucha eta tajamurachakeneana'i eta iáke'e.

⁴¡Tétavikawapa eta emaetupisirawa'i eti achaneana! ¿Wa'i echa eti, eta vikajiriarera eta tamauirikeneana te juka apake'e, timikutijiriwa'i vikatianaka'ini ema Viya? Namutu nákani naicha eta tamaurikeneana nakatianakayare ema Viya.

⁵Eti ímijachaipapuka táepiyewa'i eta táechejiriruwa'i eta Takapika'ukene Ajureka. Ani taka'e'i: “Eta máwa'asira'avi'i ema Machanewa Viya, téñama'avi'ipa wa'i vi'apasamurechaima'i taye'e eta tamaurikeneana.”

⁶Étaipa eta máemunasira'avi'i ema Viya, tétumecha'avi'i, mamawaraira'i vícha'ini eta tamaurikeneana'i, taicha ániware taka'e eta Takapika'ukene Ajureka: “Ema Viya makatianakawaka ena tisiñawawairikana, máemunakawaka'isera máimikatakawaka'iware ena mánsuana.”

⁷Eta taka'e, esuapa yátupina ema Viya. Ekanaraya ema Wínaraji, te mawara'a mawayuaka'e, jé'esare, tijunijika'enapa ema.

⁸Puiti, yátupina eta epauchira'i ema Viya. Tási'a, ema apanaware tipaucha'eyare. ¡Ínajikapa puiti eta íchira eta tamaurikeneana epekaturana! Émitisikainapa eta ejamurachira eta tájiparakana te esamureana, eti ewara'ana e'ikana émunaka ema Viya, waipa ekupanerecha eta naye'erepiana ena achaneana masuapajiraira'ana te juka apake'e.

⁹¡Puiti, ekatisamurrewa, íyauchawa táichavene'i eta éjekapirawana'i! ¡Waipa ekuekarairikawa, íyauchawapa eta iurisamurewa itsiwachapa taye'e eta ekatisamuewaira!

¹⁰Ekajapanurawayare eta éñauchirawayare te mamira'u ema Viákenu, tási'a, tétavikawayare eta ejákapakarewainapa maye'e ema Viya.

¹¹Nuparapenaveana, wa'i ekuechejika maye'e mákani echamuri'i. Taicha mákani téchejika'i maye'e mákani machamuri mapanararachapuka, émaipa máepururipa'i eta mawanairipi tási'a mapanararchaipa'i. Etasera eta napanararacha eta wanairipi, timikutijirikawapa émaina'ini takenuina'ini, taicha wa'i masuapa'ini.

¹²Ema Viya, éma'i tikawanairipi'i eta wanairipi, tási'a émaichuware akenuka'i techa'i, ema makarichu tikatiucha'aviyare emaichuware techa'i eta maikuñasira'aviyare; pitisera, ¿naja'avisika eta pipanararacha'i ema piparaepepiya?

¹³Esamanucha'a eti, eta juka nakayemakeneana: “Puiti juka sácheana, achichupuka, nuyanaya te apana awasare, níjararekaya eta nukaye'ekeneana. Tiámainukawa nuchawa te apana añu, ichapeyare eta nuganareruyare”,

¹⁴¡eti, wa'i écha'ini tája'apuka eta íchawakenewaya achichu eta itaresira! Eti ekutichucha eta iyáru, ánipichu eta takaecheraira, tási'a, témitiakaipaware.

¹⁵Eta échejisira ani eka'eyare: “Ema Viya técha'avi'i eta vítaresira, te mawara'a ema, vítauchayare'i eta juka vipanereru'i.”

¹⁶Étisera, tétavikawapa eta ekasiñawawaisira'i eta échejisirana, tikuti'ine'i étina'ini échinawa'ini eta ítaresirana, tamutu eta juka ekasiñawawaisira'i wa'i tiuri.

¹⁷Némecha'e eta juka yátupikene'i, mákani máimati'i eta makatupara'aira'i máichaya eta táurikeneana, tási'a te wa'i máitaucha'ini máicha'ini, tikapekaturaipa'i te mamira'u ema Viya.