Read Ignaciano Santiago 5 Bible Online

Santiago 5 - Ignaciano bible

Santiago 5

¹¡Nuwara'a esamanuicha'a eti rikuana, eta íchararakawaya. Íya'a epiarareka. Eti, ichape eta ekatajiwairayare!

²Taicha títawainapa eta ima'akeneana. Étaipa eta emuiri'ana táurinakeneana, tanikakamekainapa eta kachusiri.

³Eta naplataneana étapa eta naye'e uru. Ichape eta nakatajiwairaya, taicha eta náeñamira'i. Étainapa tímikuñakawakayare te jena yuku te táitekapapa eta jena sácheyare.

⁴Ena ríkuana, ichape eta nawayuasirawaka'i eta nawachachira'i ena tikaemataneakana'i eta naye'e. Tatiari'iyaresera eta sácheyare táitekapauchayare eta náikuñayare, taicha ema Viya máimararaka'i tamutu, masama'iware eta nayaseserepiana'i ena páureana músuana.

⁵Ena ríkuana puiti te juka apake'e, tétavikawa'i eta náuritaresira'i. Tamutu'i nanika eta táurinisikeneana. Tésinanakawana'i nakuti eta kuchi te náesinacha. Ena, tíja'uchawayare eta náepenirayare, nakutiyare eta táija'uchirawa nakapaka eta kuchi náesinaru'i.

⁶Takutikene, náimikaviure'i náimikapakaware ena matapirawareana'i, náimipanapa eta namaitusira'i tiákapauchawana nakatiuchawa'ini.

⁷Étisera, nuparapeanaveana, ekamichayare tamutu, táichavene'i eta ekuchapira'i eta machavirayare ema Viákenu. Ekutiyare mákani achane tikaematanera'i makamicha'i tamutu eta makatajiwairana. Tiámainukawa te tiúchuku'apa eta máewaru, mapaenumawapa majakapa eta makuchapakene'i máewaraki.

⁸Ene eka'eyare eti, yátupina ekamicha tamutu, wá'iware ekuinajikawa eta juka é'iru'i. Ekuchapawachucha, taicha tiáne'ipa eta máitesirayare ema Viákenu.

⁹Nuparapenaveana, wa'i ekukicha eta tájiparakana naye'e ena echamuriana. Wá'isera ekuemeteaka ena, apaesa takuija eta táimikatsiriaka'e te ekayasesere'ipa te mamira'u ema Viya. Échaichu'i eti eta táne'irapa eta máuchujisirayare ema Juez, ekayasesere'inapa.

¹⁰Nuparapenavechichana, nuwara'a ákutini ena profetanaini eta nakamichira'i tamutu eta nakatajiwaira'i, táichavene'i eta nakametarairuira'i te máijare ema Viákenu.

¹¹Ichape eta nakunachakarewa'i eta viye'e nákani tikamichana'i eta nátajiwana'i. Échaichu'i eta makamichira'i ema Job. Écha'iware eta táurikene'i máijarakasi'i me Viákenu. Taicha tétavikawa'i eta majapanuraiwa'i ema Viákenu.

¹²Takutikene nutuparaka'echa eti nuparapenaveana, te ekayasesere'ipuka, wa'i ekukicha eta juramento: te máijare ema Viya, ema tépiyaka'i eta anuma étapa eta juka apake'e, wá'ikene ekukicha eta juramento. Átupiruwachucha te ítauchayarepuka, “Nítauchayare”, áka'epa, té'esera wá'ipuka, etupiruwayare “Wa'i nítauchaima'i” áka'epa, apaesa takuija taviucha'e maye'e ema Viya.

¹³Te etiari'inapuka eti ekatajiwa'i, tatuparaka'i éñeuchawayare me Viya, te etiari'inapuka eti iúrisamureana'i, tatuparaka'i ejira eta majira'u.

¹⁴Té'eware etiari'inapuka eti ekajumana'i, ímichu'ayare ena naiyakarana taye'e eta iglesia, apaesa nayaseucha ema, te maijare ema Viákenu apaesa nayajiaka te aceite.

¹⁵Tási'a te eyujaraka, yátupina ekasiñawayare me Viya, ema makajumakene tinarakainapa, jé'esare, ema Viákenu makaechepukainapa. Etaipa te tikapekatura'ipuka makaepa'ayare.

¹⁶Eta taka'e, te tatiari'ipuka eta éjekapirawana'i maye'e ema echamuri, eyaseakayare eta najapanuira'ena, tási'a, eyaseuchakakayare te eyujaraka eta enarasiraina. Taicha tétavikawa'i eta tasamakarewa'i eta nayujarakasa ena matapirawareana.

¹⁷Ema profeta Elías émaichu vikutikene'i viti achaneana, te tiyujarakapa ema, tiyaseserekapa wa'i takukiwa, tisamakare'i ema, waipa takiwa'ini, mápana añu, y medio.

¹⁸Te taekenepa eta mayujarasira'i, tiápechawawarepa tikiwa'i, tási'a eta apake'e turiwarepa eta taewasirawa.

¹⁹Nuparapenaveana nemunaruana, te etiari'ipuka eti eta éjeke'a'i eta yátupikene, tási'a ema apana maimichawapa,

²⁰échasera eti, te natiari'ipuka mákaini tikapekaturara'i'i eta maichira'i eta tamaurikeneana, makatiucha'i eta maepenira, tási'a makatiucha'i eta tasimutuwana eta napekaturana.