Read Ignaciano 1 San Pedro 1 Bible Online

1 San Pedro 1 - Ignaciano bible

1 San Pedro 1

¹Nuti Pedro, maye'enu apústule ema Viákenu Jesucristo. Nukajure'e eta juka eti nuchamuriana éjanerepairuana'i ekakijikeneana'i taye'e eta apana awasareana, eti iávi'ana'i te Tinapaika te Ponto, eti iávi'ana'i te Galacia, eti iávi'ana'i te Capadocia, eti iávi'ana'i te Asia, étipa eti iávi'ana'i te Bitinia,

²emutu eti, yátupikene'i eta manerejisira'e'i ema Tata Vikaiyakene taicha taka'e'i eta mapanereru'i akane eta táepanirawa'i. Émaipa ema Machanewa Viya, tiáwa'aka'eipa máepachiasira'e'i eta epekaturana eta te máitine ema Jesucristo. Apaesa ejachapa ichapemurikene eta majapanuraiwa etapa eta viuriwayare.

³Tétavikawa'i eta vikunachira'i ema Viya, Makaiyakene ema Viákenu Jesucristo, tétavikawa'i eta majapanuira'avi'i, tepanawa'i maicha eta vitaresira eta machavira'i titareka ema Viákenu Jesucristo. Eta juka yátupikenepa eta viuchukuiraipa,

⁴tási'a ema tímijaraka'enapa eta maunaru'i maikure'e'i ema Viya eye'e eti, maunaru'i te anuma, eta juka wa'i temitiakaina'i, wá'iware techipejikawaima'i.

⁵Puítisera, tétavikawa'i eta máitupajijiasirawa'i ema Viya eta majaneasira'e'i, táichavene'i eta ekasiñawaira'i maye'e. Taicha mawara'a tikuchuku'a'eyare te jena sache táepanirawayare eta viúritaresiraya.

⁶Puiti, apánapanenejiyarecha'a eta ekatajiwairayarecha'a, nukasiñawa'isera eye'e eti, wa'i ekainajiruwaima'i, eta ekasiñawaira'i me Viya, ewapinawaichucha eta ekamichira'i tamutu, taicha ímati'i waipa táunaima'i eta ekatajiwairaya.

⁷Ema Viya máisapa'i eta juka ekatajiwairana, mawaraira'i ímereuchawayare eta yátupikene'i eta ekasiñawaira'i eta maye'e. Ekutiyare eta uru te nakaitsamaraji te yuku te yátupi'ipuka étakene'i. Étisera étaviviriaka'i eta tatumewa eta uru, taicha eta uru títawayare'i, témitiakayare'i. Te wa'i ekainajiruwa eta ekasiñawaira'i maye'e ema Viákenu, tétavikawayare eta ekunachakarewayare'i maye'e ema eta machimapira'eyare te machawa.

⁸Eti, wicha'a ímati'ini eta mamira ema Viákenu. Émunaka'isera ema. Ichape'iware eta ekasiñawaira'i eta maye'e. Tási'a, ichapeyare'iwa eta iúrisamurewaya, tájina eviyaima'i ákayema'ini,

⁹Taicha eti ekapayakainapa eta epanereru'i ewarakene'i ekapayakayare'i taye'e eta ekasiñawaira'i me Viya, eta juka iuchukuirayare.

¹⁰Ena Profetanaini nakarawa'u'i tási'a nakayesesereru'i eta taichararakawa'i eta viuchukuirayare, tási'a naechejisi'a'i eta maichakene'i ema Viya eta maemunasira'e'i tijaraka'eyare'i eti.

¹¹Eta Machanewa ema Viákenu Jesucristo, ema tinapuka'i mamimetaka'i ena Profetanaini eta matajiwaiyara'i ema Viakenu Jesucristo tási'a eta taitekapirayare'i eta makunachakarewayare'i te taekenepapa. Enasera tikaematanean'i eta nawaraira'i naimati eta sachewayare'i eta maitekapirayare'i, eta maimijarechakene'i ema machanewa ema tiáwa'aka'i ena.

¹²Émasera ema Viya, mametakawakapa wa'i náima'aima'i ema Cristo te vikametarairupa maye'e ema. Ema Machanewa Viya masi'akene'i te anuma títametaka'e'i te esamureana. ¡Tétavikawayare eta viúrikakarewayare víti, te viúchuku'apa! Énaipa ena ángeleana, ichape nawara'a'i náimati'ini tája'apuka táichararakawayare eta viúrikakarewayare.

¹³Eta taka'e, ekaratakawa taye'e eta epanereruana, táuriwaina eta ítaresiraya. Ekasiñawayare eta ejakapirayare eta íkuchi'i me Viya, máijararu'eyare te machawapa ema Viákenu Jesucristo.

¹⁴Ímerekawayarewa eta machichaira'e'i, esuapajira'iyare. Waipa ekukicha eta íchakeneanaini eye'erepianaini kape juka te wicha'a ímati'ini ema Viya.

¹⁵Puítisera, santu'enapa eta ítaresirayare. Taicha ema tíchu'a'e'i, tétavikawa'i eta masantuwa'i;

¹⁶Taicha, ani taka'e'i eta táechejiriruwa'i eta Takapika'ukene Ajureka: “Nuwara'a santu'ena eta ítaresiraina, taicha nuti, yátupikene'i eta nusantuwa.”

¹⁷Te eyujarasirana eti, “Tata Vikaiyakene” eka'e'i maye'e ema Viya. Ímatiyare yátupi ema eta nájinaira'i manerejiruina, takutikene eta máemecharesira'i ena téjekapawana, máitsiwachawaka'iware nákani tíchana'i eta táurikeneana. Taka'e, yátupina eta epikauchiraina ema tamutu sácheana puiti juka ítaresiraicha'a te juka apake'e.

¹⁸Ema Viya tikuchuku'a'eipa taye'e eta tamauriwaini'i eta ítaresirana, iámapirikaicha'a eta naye'erepianaini ena iáchukanaveanaini. Échaichu'i eti eta mawacharesira'e'i ema Cristo eta iúchukuira'i, wá'isera plátaina'ini, úruina'ipukaini,

¹⁹Étasera eta máitine máepusairu'i ema Cristo, eta mawacharesira'e'i, étivene'i ímijarareka'i ema, kúti'ipa te káijararekasi eta uvesa matapirawarekene'i.

²⁰Akane te tépanawainapa eta apake'e ema Viákenu Jesucristo tikatupara'aipa taka'eyare'i eta máepeniraya. Wá'isera táitauchawawane'ini. Tapaenumawapa puiti, títauchawa'i étavenepa eta iúchukuirayare'i eti.

²¹Éneichu táichavene'i eta é'isira'i ema Cristo, ímatipa puiti ema Viya, ema tikaechepuka'i ema Machicha te máekari. Puíticha téjakaipa ema te máwakure'i te anuma. Eta taka'e, tétavikawaine'i eta ekasiñawaira'i maye'e ema, ekuchapawaipa eta maijararu'eyare ema Viya.

²²Puiti tipachinaipa eta iáchanewana táichavene'i eta esuapira'i eta yátupikene máimiturapiana ema Jesucristo. Eta taka'e, ímerekawainapa puiti yátupina eta émunasirakaka'i naye'e ena echamuriana. Ewapinawaware eta te esamureana eta émunasirakakaira'i.

²³Kape juka, eta ítaresira'i, tájina wa'i íturuekene'a'ini eta iúchukuiraya. Puítipasera machicha'eipa'i ema Viya. Ítsiwachaipa'i eta ítaresiraini'i eta esuapira'i eta máechejiriruwa. Eta tikaitareka'eyare'i; jé'eware eta máitawakaka'i.

²⁴Eta Takapika'ukene Ajureka, taka'e'i: “Eta vítaresira viti achaneana, vikuti'i eta muiji, eta vitumewaini'i, títawayare takuti'i eta taflurena eta muiji. Tépune'apa, tijiyupa, témirikapa,

²⁵Étasera eta máechejiriruwa ema Viya, jé'eware maitawakaka'i.” Eta juka Arairu máechejiriruwa ema Viya, étakene'i eta emetakasiwana'i, apaesa táuripa eta é'isira'i.