Read Ignaciano 1 San Pedro 4 Bible Online

1 San Pedro 4 - Ignaciano bible

1 San Pedro 4

¹Ema Cristo, ichapemuri'i eta makatajiwaira'i. Makamicha'isera ema tamutu. Eti apanaware, ekutiyare ema. Nímikuticha'eyare eta mákani achane tépenapa, máinajikaipa eta pekatu,

²eta taka'e eti, táichavene'i eta iúrujiasira'i ema Cristo, tímikutijirikawaipa épenaipa'ini, ínajikaipaware eta pekatu. Puiti, tatuparaka'i ekaemataneakayare ema Viya. Waipa tiwayuaka'ema'i eta tajamuraraiwa eta iáke'e.

³Kapeipa juka añuana eta íchira'i eta tamaurikeneana, taicha emáimatira'i ema Viya. Tamutu'i icha eta tájiparakana, tiwayuaka'e'i eta tajamuraraiwa eta iáke'e. Ewayuchawa'i eta ekawa'arasiwa. Eta íchira eta piesta, étapa eta ejaneasira'i eta esiñarajiana.

⁴Puítisera eti, waipa ekasirikimuri'ini ena émunakasareana. Waipa íchaima'i eta táiñema'ikene. Ichapemurine'i eta náejiasira'e'i. Tási'a, téchejikanapa eta eye'e.

⁵Járajapainapasera eta sacheyare nakayasesere'irayare te mamira'u ema Viya, taicha ema yátupikene'i eta makatupara'aira'i eta vikayasesere'iraya víti, vítareruanaicha'a énapa ena náepenakeneana.

⁶Eta taka'e, ema Cristo tikametarairu'i naye'e ena náepenakeneana, mawaraira'i makuchuku'a eta náchanewana, apaesa nápechawa'ini náitareka te mamira'u ema Viya.

⁷Tiáne'ipa eta táitavirayare tamutu eta juka. Eta taka'e, ekaratakawa eta epanereruana apaesa táuriwaina eta eyujarasiranaya.

⁸Tiápajukawayare'isera eta émunajirisirakakaya eti. Te yátupi'i eta émunajirisirakaka'i, máejerareya eta ejapanukakairaya eta jákani éjekapirawana.

⁹Ewapinawaya eta ejakapirakakaya, te epaipiuchakaka te epenana.

¹⁰Ema Viya tíjaraka'ewakaipa eta ítukakenepachu'i. Taka'e, yátupina ítauchaya eta ekaemataneasirakaka'i te mamira'u.

¹¹Eti máimitureana ema Viya, eta échejisira, ekuneuchawa yátupi eta máechejiriruwana ema Viya. Eti ímikatara'iana ítatiwaka ena echamuriana, wa'i éñamaima'i eta etumewa máijararu'e'i ema Viya. Étavene'i eta é'isira'i ema Jesucristo, tamutu tauri eta jákani íchakeneana apaesa nakunacha ema Viákenu namutu ena tíma'a'eana. Ema, ¡tétavikawa'i eta makunachakarewa'i! ¡Máitawakaka'iware eta vé'isiraya ema! Amén.

¹²Némunarukeneana nuparapenaveana, wa'i ekuarami eta murakairaya eta iátajiwanayare, tímikutijirikawayare'i táramikare'ini eta eye'e.

¹³Ewapinawachucha taicha ekapayayaraka'i eta makatajiwaira'i ema Cristo apaesa ewapinawa te jena sácheyare eta enekapirayare ema eta máukupaisiraya mámirayarepa'i eta majaraiwa.

¹⁴Te náume'a'epuka máichavenena'i ema Cristo, tétavikawayare eta iúrikakarewaya eti, taicha tiáwa'aka'eyare ema Machanewa Viya, mási'akene'i te majaraiwa ema Vikaiyakene, tayanapane náepurupuka ema, étisera ekunacha'i ema.

¹⁵Te etiari'ipuka eti ekatajiwa'i náicha, takuijasera étaima'i tiviucha'éma'i jákani ekapa'iwaina'ini, iámeraiwaina'ipukaini, wá'iware étaima'i tiviucha'éma'i jákani ímisiapirasirawaina'ipukaini taye'e eta náichakeneana nákani apanana achaneana.

¹⁶Étisera, te ekatajiwapuka táichavenena'i eta é'isira'i ema Cristo, wa'i ekutsiri'a. Ewapinawachucha, e'asulupayachaware ema Viya taye'e eta ekaijarera'i eta máijare ema Cristo.

¹⁷Puiti juka sácheana viáwakure'i, táitekapaure'avi'ipa ichape eta vikatajiwairayare, viti manerejiruana ema Viya. Te tepanawa'i viye'e viti manerejiruana eta vikatajiwaira'i, ¿navetijipuka ena nasuapajiraira'ana eta maechejiriruwana ema Viya ichapeyare eta najakapirayare eta natajiwanayare naikuñayare?

¹⁸Ichape eta vikatajiwaira'i te juka apake'e viti makuchukureanayare'i ema Viya ¿páureanasamisera ena achaneana masuapajiraira'ana kapekaturara'iana, wínarajikeneana'iware chapepanayare eta nakatajiwairaya?

¹⁹Puiti viti vé'ikana'i ema Cristo, ichape eta vikatajiwaira'i, wá'isera vikainajiruwaima'i, vímiyanawayare'i vicha eta táurikeneana, wákasiñawa maye'e ema Vikaiyakene eta majaneasira'avi'iware, taicha ema, tétavikawa'i eta máitauraiwa'i.