Read Ignaciano 1 San Pedro 5 Bible Online

1 San Pedro 5 - Ignaciano bible

1 San Pedro 5

¹Nuwara'a nechejirika'eya emutu eti pastoreana ejaneakana'i ena vichamuriana. Nuti éneichuware pastulerunu'i. Éneichuware nitametaka'eya eta nímararasira'i eta makatajiwaira'i ema Cristo. Esuapanuyare puiti eta nechejirapi, taicha vikutikakayare eta vikatupara'airaya viávi'ayare te majaraiwa ema Cristo te táitekapa eta machaviraya.

²Tauri eta ejaneasirawakaina namutu ena vichamuriana, taicha ena tímikutijirikawa'i uvesanaina'ini maye'e ema Viya. Ítauchayare eta etuparakasiwa'i. Ema Viya mawara'a'i ewapinawa'ini eta ejaneasirawaka'i. Wá'isera ekupanerecha ekawacha. Ewapinawayaresera eta ekaemataneasirawakaya.

³Wá'isera ímipananajikawakaima'i, taicha wa'i ekawanarawaka'ini. Ímerekayare'isera eta iúriwaya naye'e, apaesa ena náe'ika eta iúriwana'i.

⁴Taka'e te machawapa ema yátupikene Pastor eta viye'e, tétavikawaya eta makunachira'eya. Tíjaraka'enapa eta íkuchi'i, máitawakakainapa eta ekachaneraya ema te mávi'a'i eta te majaraiwa'i.

⁵Eti apanaware, eti amaperuana esuapayare eta nawanesira'eana ena víyara'ana. Emutuyare esuapakaka, mánsu'ena'i. Taicha: “Ema Viya wa'i majapanuima'i ena tikasiñawawairikana, tétavikawasera eta majapanuirawakaya ena mánsupanereruana'i.”

⁶Te ímereka eta emansuwawaka'i, eta ekasiñawaira'i me Viya, ema, te máima'apa tiuri, tikatiucha'enapa te tamutu eta íchararakawakeneana. Tási'a, tétavikawayare eta iúrisamurewaya te taitekapapa jena sacheyare.

⁷Te tatiari'ipuka eta éñamirawana, emetaka tamutu ema Viya. Ema, tikanaraka'eyare, taicha tétavikawa'i eta máeñamirawa'i eta eye'e.

⁸Ekuneuchawa yátupina. Ejaneakawa'iware, taicha ema viánara'i Wínaraji, makuti eta táiñe'ikene sárare itiare tatanuka eta tanikayare'i. Ene maka'e'i ema, matanuka'i ena mákipairuanayare.

⁹Eta taka'e, túme'ena ekanarairayare ema, machu mákipaika'e. Ákasiñawa muraka maye'e ema Viákenu. Wa'i ákarichu'ini eta ekatajiwaira'i. Túme'ena'i eta ekamichira, ekutiyare eta nakamichira'i ena vichamuriana tikawasana'i te tamutu awasareana.

¹⁰Ema Viya, tíchu'a'avi'i, mawara'a'i visiapa te máwasa, táichavene'i eta vé'isira'i ema Jesucristo. Ánipinesera eta ekatajiwairaya puiti juka sácheana. Émasera ema Viya, tétavikawa'i eta majapanuraiwa'i. Ema, tímararaka'e'i eta ekamichira'i; tási'a ema, tíjaraka'enapa eta ewayuchirawaya eta etúmewaya.

¹¹Ema, ¡máitawakaka'i eta makunachakarewa'i! ¡Makachurika'i eta máitupajijiasirawa, máitawakaka'iware eta! Amén.

¹²Ímati emutu ema vichamuri Silwano. Ema, tétavikawa'i eta máitauraiwa'i tamutu. Puiti, éma'i tiáminanu'i eta juka najure. Esamanusera eta nechejirisira'eya, eta numetasira'e'i tamutu eta juka, nuwara'a nétumecha'e eta vé'iru'i, taicha yátupi'i eta vikaiju'eira'i me Viya.

¹³Énaipa ena vichamuriana tikawasana'i te juka awasare Babilonia, téchejika'eana. Éneichu'iware ena, manerejiruana'i ema Viya ekuti'i eti eta manerejisira'e'i. Téchejika'e'iware ema nuchicha Marcos.

¹⁴Nuti, eta néchejirisira'e'i eti nuchamuriana, nuwara'a nétserareka'e emutu, táikutiara'i eta tawayuchira'i eta némunasira'e'i emutu eti. Puiti nuyaseucha'e'i me Viya, máijaraka'e'ini tanaraka tamutu eta epanereruana emutu eti machanerana'i ema Viákenu Jesucristo.