Read Ignaciano 2 San Pedro 1 Bible Online

2 San Pedro 1 - Ignaciano bible

2 San Pedro 1

¹Nuti Simón Pedro, mawanaranu'i ema Jesucristo. Maye'enu'i apústule. Nukajure'e eti nuchamuriana, taicha tétavikawa'i eta ewapinairawa'i eta juka vé'iru'i. Puiti eti apanawa ejakapakare'iware me Viya, ekaikuchipaware eta iúchukuiraya maicha ema Viákenu Jesucristo.

²Puiti, nuwara'a tajuruka'ini eta ekaikutiaraira eta máemunasira'e'i ema Viya, tási'akene'i eta ímatiekene'airapaipa'i eta mapanereruana ema, émapa ema Viákenu Jesucristo, tájinaware ta'apapirika'ini eta táuriwa'i eta epanereruana.

³Ema Viya tetavikawa eta maitupajijiasirawa'i, tijaraka'avi'i tamutu eta vikamunukeneana te juka vitaresirapa, etapa eta, maimimatichira'avipa ema Viakenu Jesucristo, mawaraira'i vitaucha eta mawara'akene vicha, ema tichu'a'avi'i taichavene eta maitupajijiasirawa'i, etapa eta maemataneana tiaramikareana vima'akeneana'i.

⁴Taye'e te juka vima'akeneana'i taurinakeneana eta taka'e tíjaraka'avipa eta vikuchi'i, taicha taetaviure'i eta, maitupajijiasirawa, tetavikawaware eta tasiwachawa'i, apaesa visiapa taye'e eta mawasa ema Viya, apaesa wa'ipa vikuima'a eta tamaurikeneana, tajamurachakeneana eta viake'e te juka apake'e.

⁵Eta taka'e, akamesawa etumechawa eta ímiyanirawa'na eta ekasiñawairaina me Viya, eta tauriwaina eta itaresira, etapa eta itukakeneanaina,

⁶eta epanerechira, étapa ekaratakawa eta ichiraina eta tamauirikenana, eta ekaratasirawa eta ichira eta tamaurikeneana, eta ekamichira, eta ekamichira étapa eta éjarasira eta itesira me Viya.

⁷Epamikawa'iwareni iápajukaya eta émunaraiwa'i naye'e ena echamuriana, ekajirayare, epamikawa'iwareni eta émunaraiwa'i naye'e ena apamuriana achaneana, tayanapane wa'i náe'ika'avi'ini.

⁸Eta ímatira'i ema viákenu Jesucristo, ichayare eta taurikeneana, étumechawayare eta tapajuriwayare eta ichirayare eta taurikeneana, taka'e eta itaresirayare etachucha ichayare eta taurikeneana te namira'u ena achaneana.

⁹Nákanisera wa'i náwara'a'ini nakarawa'u, tímikutijirikawa'i ena púchukiana énainapa tikatajiwanayare, taicha náemitisikaipa'i eta máepachinachirawaka'i ema Viya taye'e eta táinapureni'i napekaturana náichakeneni'i kape eta náitaresira'i.

¹⁰Étisera, eti nuparapenaveana, nuwara'a échawa'ini eta máichuira'e'i ema Viya, manerejisira'e'i, epamikawa'ini eta ímeresira'i yátupi eta machicha'era'i, eta ímiyanirawa'i eta ekarawa'uira eta juka néchejisi'akeneana'i, jé'esare, tájinapa tímiakipaika'ema'i.

¹¹Tási'a, tétavikawaya eta iúrikakarewaya eta machimapira'eya ema Viákenu Jesucristo te makuchuku'a'epa eta te juka apake'e, mámira'eya eta te máwakureya. Máitawakakaya eta makachanera'aviya vimutu.

¹²Taka'e nuti, nupamikawa'i puiti eta némechira'eya eta júkana, tayanapane nímati'e'i eta ímatiraipa'i, murakaipaware eta é'isira'i eta yátupikeneana ímitukasiwana'i.

¹³Németeaka nétupikawa'i eta juka nechejirisira'e'i puiti juka nítaresiraicha'a te juka apake'e.

¹⁴Taicha waipa náyerema'icha eta nítaviraya, ema Viákenu Jesucristo tímimetakanu'i eta nunarasirawanenapa te machakaya.

¹⁵Nuwara'a'isera wa'i ekuemitisika eta juka numetaru'eana'i, tayanapanéinepuka népenaipa, eta taka'e, nupamikawa'i eta nímiájureka'e emutu, taicha nuwara'a'i échayare'i tamutu sácheana.

¹⁶Eta vímitusira'e'i, eta machaviraya ema Viákenu Jesucristo, máimeresiraya eta máitupajijiasirawa, wa'i vépiya'ira'ima'i, wá'iware vive'akenéna te vichuti, vímatipa yátupi, taicha víma'a'i te viúki'ana eta majaraiwa'i ema Viákenu.

¹⁷Taicha vima'a'i ema Tata Viya te maíjarakapa eta mapikauchararewayare'i étapa eta majaraiwayare'i, te mapiarakapa ema Viya te mametakapa eta majaraiwayare'i: “Ema maka ema yátupikene'i Nuchicha némunarukene'i. Tétavikawa'i eta núrisamurewa'i máicha”

¹⁸Viti'ichu'iware visama'i eta ma'u, tási'akene'i te anuma, vikachane'i ema Viákenu taye'e eta mari santukene.

¹⁹Víti vítametaka'i eta nakayemakeneana'i ena profetana, eta náechejisi'aira'i ema Viákenu. Eta náimiturapiana takuti'i eta tajaraiwa eta lámpara, tamikauchira'avi'i apaesa táuri eta vítaresirana te juka apake'e. Taka'e, étumechawa eta ekuchapirawaya eta sácheyare, márajapainapa ema yátupikene eta majaraiwa, tétavikawayarepa eta mamikauchira'eyare tamutu eta esamureana.

²⁰Nuwara'asera yátupina ímatiekene'a eta juka: wa'i táurika vive'a te vichuti eta vímijachira'i eta takayemakeneana'i eta Takapika'ukene Ajureka. Vikatupara'a'i vikarawa'uyare'i eta yátupikene'i,

²¹taicha ena víyara'anaini profetana, wá'iware nave'akenena'ini te nachutiana eta nájuekene'aira'i eta máechejiriruwana ema Viya, ema Machanewa Viya éma'i tímitukawaka'i eta nájuekene'aira'i.