Read Ignaciano 1 San Juan 2 Bible Online

1 San Juan 2 - Ignaciano bible

1 San Juan 2

¹Nuchichachichana, nukajure'e'i eta júkana taicha nuwara'a wa'i ekukapekaturaini. Té'esera íchapuka eta pekatu, marari'i ema tikatajira'i viye'e te mamira'u ema Tata Vikaiyakene, tikaijare Jesucristo ema tikatajika'avira'i, ema, matapiraware; tétavikawa eta máuriwa.

²Ema, tímikapakawa'i táichavene'i eta makaepa'airayare'i eta vipekaturana apaesa viúri maye'e ema Viya, wá'isera tákarichu eta vipekaturana víti. Táimikapaka'i ema eta makaepa'airayare'i eta napekaturana namutu ena achaneana te juka apake'e.

³Tiúri puiti, vikasiñawa'i eta vímatira'i ema Viya, taicha visuapa'i eta mawanairipiana.

⁴Te narari'ipuka ena nákani achaneana naka'e'i: “Nuti nímati ema Viya”, wa'isera nasuapa'ini eta mawanairipiana, taka'e náepiyewa'i ena, wa'i tásuapakare'ini eta náechejiriruwa.

⁵Étasera eta visuapira'i víti eta mawanairipiana tímecha'avi'i eta viáwa'asira'i ema Viya, yátupi'i eta vémunasira'i ema Viya, je'ewarepa yatupipa eta mawa'asiraavi'i ema.

⁶Ema tika'eana viti viáwa'aka ema Viya, tási'a, takamunu'i eta táuri'ini eta naitaresiraina'ini tákuti'ini eta táuriwa'i eta máitaresira'i ema Jesucristo.

⁷Nuparapenaveana, eta juka wanairipi nijararu'ekene'i wa'i arairuina'ini: etaichu'ineni eta ejachapakene'e eti kape te taepaninewapa. Eta juka wanairipi tainapure'i etara eta maechejiriruwa ema Viya eta esamakene'i.

⁸Puíti'ichu nuwara'a tápajukawa eta ekaikutiarairaya eta máemunasira'avi'i ema, manasi'ichu'i ema te majaraiwa ema Maiya, tási'a eti, te esuapa eta juka mawanairipi, te émunakaka, epauchainapaipa eta majaraiwa ema Viya, térajikawainapa eye'e eta timapiku.

⁹Te narari'ipuka ena nákani achaneana naka'e viti viavi'a'i eta te majaraiwa ema Viya, enasera nakaticha'i ena naparapenaveana, nanasi'ichu'i navi'a'i te timapiku.

¹⁰Nákanisera náemunaka'i ena naparapenaveana, nanasi'ichu'i navi'a'i te majaraiwa ema Viya, tási'a, tiúri'i eta napaisira'i, najina taimiakipaika'ini.

¹¹Énasera ena nákani nakaticha'i ena naparapenaveana, nanasi'ichu'i ena te timapiku, wa'i náecha'ini eta napaisirayare eta náitaresira, taicha eta timapiku wa'i táisapa'ini náimairirika'ini.

¹²Eti nuchichachichana, nukajure'e taicha nécha'i eta maepachinachira'eipa ema Viya eta epekaturana émavene'i ema Jesucristo, ema maepachinachaipa eta vipekaturana etipa amaperuana

¹³Nukajure'e eti naiyanaveana, taicha eti imatipa'i ema mainapure'i te taepaninewapa eta juka apake'e etipa eti amaperuana, nimiajureka'e taichavene eta erata'aira'i ekanara ena ereanana, emapa ema wínaraji.

¹⁴Eti átinaveana, éneichuware nímiajureka'e'i taicha tanasi'ichu iúnaka'i te esamureana eta máechajiriruwa ema Tata. Nímiajureka'e'i eti naiyanaveana taichavene eta ímatiraipa ema mainapure'i te taepaninewa'i eta juka apake'e. Étipa amaperuana nímiajureka'eware taichavene eta étumechirawa'i ejakapira'i eta máechejiriruwa ema Viya, eta te esamureana tási'a étapa eta ekapakechira ena ereanana.

¹⁵Emutu eti, wa'i ekujamuracha eta tamaurikeneana te juka apake'e, te narari'ipuka ena najamuracha eta tamaurikeneana te juka apake'e, waipa émaina'ini náemunaka ema Tata Vikaiyakene.

¹⁶Taicha tamutu eta juka taimeru'avi'i eta juka apake'e, wa'i tasi'akenena'ini eta me Tata, etachucha taye'erepi eta juka apake'e. Etachucha eta tamaurikeneana taimereru'i etajuka apake'e: eta tamaurikeneana mijamurarawana eta juka vechereji mateji, taicha tamutu eta napanereruana ena achaneana te juka apake'e, tájina táuriwaina, etaipa eta tajamurachira eta nauki'ana nawaraira tikaima'akene etapa eta nasiñawawaisirana eta nakaima'akeneraipa.

¹⁷Numetaka'e puiti, títawainapaipa tamutu eta apake'e, énerichuware títawainapaipa tamutu eta najamurachakeneana ena achaneana. Vítisera, te visuapa eta mawara'akene ema Viya, máichekuarakirenapa eta vítaresira.

¹⁸Nuchichanavechichana, puiti tiáne'inapa eta táichekuiraya, títawainapa tamutu. Vimetaka'eipa eta máitesirayare ema anticristo, puítipa narari'ipa ena anticristuana. Eta taka'e véchainapa eta tiáne'inapa eta táichekuiraya tamutu.

¹⁹Ena tikatianakana ema Cristo náuchure'i eta viye'e. Wá'isera viúmuriwaina'ini ena, taicha te viúmuriwaina'ini, nanasi'ichu'ini eta viye'e, náerajiruwaipa'isera eta viye'e. Tási'a, vímatipa eta wa'i viúmuriwaina'ini.

²⁰Ema Viákenu Jesucristo tíjaraka'eipa eti ema Machanewa Viya, tási'a, emutuipa'i ímati eta yátupikeneana.

²¹Nukajure'e'i táichavene'i eta ímatira'i eta yatupikeneana, écha'iware ena timatiana eta yatupikeneana waipaine'i tepiya'ira'ianaima'i.

²²¿Naja'asika ema tepuya'ira'i? Emara ema tika'e, ema Jesús wa'i émaina'ini ema Viakenu Jesucristo. Je'ewarepa puiti emapa ema anticristo, taicha wa'i masuapa'ini ema Tata Viya, émapa ema Machicha ema Viya.

²³Nájina tiáwa'akanaima'i ema Tata, ena wa'i nasuapa'ini ema Jesús eta machichaira'i ema Tata Vikaiyakene. Viáwa'aka'isera víti ema Tata Vikaiyakene vimutu viti visuapana'i ema Jesucristo eta machichaira'i ema Viya.

²⁴Tási'a, ekapanereruyarechucha eti, eta máechejiriruwa, tamutu eta esamakeneanaipa'i te tépanawainapa eta ekasiñaira'i ema Jesucristo. Eta ekapanereruira eta júkana, iáwa'akayare ema Tata émapa ema Machicha.

²⁵Eta'i eta juka máikure'avi'i ema Viakenu Jesucristo, tíjaraka'aviya máichekuarakirenapa eta vítaresira.

²⁶Puiti narari'i ena nawara'ayare tiwayuaraka'eana. Eta taka'e, nukajure'e'i apaesa ekuneuchawa eti naye'e ena témejekapawara'iana.

²⁷Eti, máwa'aru'eipa ema Machanewa Viya, mawaneru'i ema Jesucristo. Tási'a, nájina apanaina ákamunu'ini náimituka'e'ini, taicha tímituka'e'i tamutu ema Machanewa Viya. Ema, yátupikene'i eta máechejiriruwa. Ánasichu iáwa'aka'i ema Jesucristo.

²⁸Puítisera, nuchichanaveana, ímiyanawa eta iáwa'asiraina eti ema Jesucristo apaesa túmesamure'eina eti, wa'i ekutsiri'a maye'e eta te machawa.

²⁹Eti écha'i eta máetaviuchira eta máuriwa'i ema Jesucristo. Tási'a, ímatiyare ena apamuriana machichanaveana ema Viya, táichavene eta náichira'i eta táurikeneana.