Read Ignaciano 1 San Juan 3 Bible Online

1 San Juan 3 - Ignaciano bible

1 San Juan 3

¹Íma'a, tétavikawa eta máemunasira'avi'i ema Tata Vikaiyakene, tímijarecha'avi'i machichanaveana. Puíti'ipa yátupikene'i machicha'avipa'i. Énasera ena apamuriana achaneana wicha'a nákaikutiara'ini eta makachichaira'avi'i ema Viya, taicha wicha'a náimati'ini eta máemunaraiwa'i ema.

²Nuparapenaveana némunarukeneana, machicha'avipa ema Viya. Vuícha'asera tímecha'avi ema eta viúriwayare. Véchaipasare eta vikutirayare ema Jesucristo eta te machawa. Taicha víma'ayare eta máima'ikene ema.

³Tási'a, vimutu víti vikunewayare eta vikutiraya ema Jesucristo, puiti wákutikaka viúri'ini tákuti'ini eta máuriwa'i ema.

⁴Namutu ena tisipekaturana, nakaticha eta mawanairipiana ema Viya, étara eta juka napekatura'i.

⁵Ema Jesucristo, tájina matapirawaina ema. Vímati'ipasera eta tímiteka'i ema te juka apake'e eta makaepa'airayare eta vipekaturana.

⁶Taka'e te viáwa'aka'i ema, tituparaka'avi waipa vikuimisiapawa taye'e eta pekatuana. Énasera ena tikapekaturara'iana wa'i náimati'ini ema Cristo.

⁷Nuchichanaveana, wa'i ekuisapawa nawayuaka'e: Víti, te vímisiapawa'i eta te táurikeneana, vímerekaya eta viúriwa. Vikutinapa ema Jesucristo eta máetaviuchira'i eta máuriwa;

⁸Ema ticha'i eta tamaurikeneana tímereuchawaka'i eta machichairawaka'i ema wínaraji. Taicha ema winaraji, ema tinakucha'i, tákenu'i eta pekatu. Eta taka'e, eta maitesira'i ema Machicha ema Viya, makaepa'airayare eta majarareruana'i ema wínaraji.

⁹Víti machicha'avipa ema Viya, wáipa vímisiapawaima'i te pekatuana, taicha vikutinapa ema eta tamajinaira'i matapirawaina, ema tájina mapekaturaina. Eta makachichaira'avi'i ema Viya, wa'i vikapekaturaima'i.

¹⁰Nákani wa'i tíchana'i eta táurikeneana, wá'iware náemunaka'ini ena nachamuriana, náimereka'i eta wa'i machichawakaina'ini ema Viya. Nímereka'i eta machichairawaka'i ema wínaraji. Vítisera, víchira'i eta táurikeneana, étapa eta vémunasirakaka'i, vímerekawa'i eta makachichaira'avi'i ema Viya.

¹¹Étara, eta juka vimetaka'e'i, te tépanawainapa eta ekasiñaira'i ema Viya, eta mawaraira'i eta vémunasirakakayare.

¹²Tási'a, wa'i vikukuti ema Caín, máwa'aru'i ema wínaraji. Ema Caín makapaka'i ema maparapéni Abel, táichavene'i eta máetaviuchira'i eta mawínarajiwa'i. Ema Abel, táimikapaka'i eta masuapajiraiwa'i, máichira'i eta táurikeneana.

¹³Nuparapenaveana, éneichuware puiti narari'iya ena achaneana tikaticha'eanayare eti apana. Wá'isera ekuarami eta juka.

¹⁴Víti vécha'i, te táekeneraya eta vépeniraya. Vikaiju'enapa eta vítaresiraya máichekuarakireya. Vécha'i eta juka, táichavene'i eta vémunasira'i ena vichamuriana. Énasera ena wa'i náemunaka'ini ena nachamuriana, nanasi'ichu. Wa'i tiúchuku'anaima'i eta náepenira.

¹⁵Namutu ena tikatichana'i ena vichamuriana, nakuti'i ena tikapa'iana. Eta náichararakawayare ena tikapa'iana, vécha'i eta namauchukuirayare.

¹⁶Ema Jesucristo tímecha'avi'i eta máemunasira'avi'i, taicha tíjarakawa'i tépena vítivene'i, tási'a víti, te jákani táichararakawa, tituparaka'avi víjarakawayare vépena énavene ena vichamuriana, vímechiraya eta vémunasirakaka'i.

¹⁷Te marari'i ema mákani achane tikaima'akene'i, te wa'i achanesamurena'i maye'e ema machamuri eta makaiju'era'i, ema maka wá'iware máemunaka'ini ema Viya.

¹⁸Nuchichanavechichana, vémunakakachucha vikajikaka eta vikaye'ekeneana, wá'iware vikuepiya'ira'i eta vémunasirakakaira'i, wa'i takukarichu eta véchejiriruwa.

¹⁹Je'ewarenapa vechainapa eta vichira'i eta taurikeneana, je'ewarenapa viurisamurenapa eta vikasiñawaira'i te mamira'u ema Viya;

²⁰taka'e te vipikakarakawapuka te visamure, emasera ema Viya ichapepana'i taye'e eta visamure, ema maecha'i tamutu.

²¹Nuparapenaveana nemunarukeneana, te wa'ipuka tipikakarakawa eta visamure, je'ewarepa eta vikasiñawaira eta me Viya;

²²Taka'e ema tijaraka'avinapa tamutu eta viyasearapiana, taichavene eta visuapira'i eta mawanairipiana etapa eta vichira eta mawara'akeneana.

²³Eta juka mawanairipiana'i, étara eta visuapayare'i maye'e ema Machicha Jesucristo, tási'a vinunayare'i vemunakakayare'i, vitauchayare'i eta mawanairipi'i ema.

²⁴Te visuapa eta mawanairipiana, viáwa'aka'i ema, énerichuware ema tiáwa'aka'aviya, vécha'i eta matiari'ira'i ema Viya eta viye'e, máicha ema Machanewa Viya mawaneru'i ema.