Read Ignaciano 1 San Juan 4 Bible Online

1 San Juan 4 - Ignaciano bible

1 San Juan 4

¹Némunakasareana nuparapenaveana, ekuneuchawa naye'e ena tépiyakawana tikametarairuana. Taicha puiti narari'i ena, wa'i mawaneruanaina ema Viya, wá'iware máwa'aruanaina ema Machanewa Viya, tási'a, te náitekapaucha'epuka ena náwara'a tímituka'eana, eti eyaseresinawaya te yátupipuka wanairukana me Viya, esamayare te étaichupuka eta vímiturapiana'i víti.

²Eta juka eta ímatiarayare ena máwa'aruana ema Machanewa Viya: te naka'e'ipuka: Ema Jesucristo yátupikene'i achane eta máuchusira'i.

³Énasera ena apamuriana, te náñaucha'ipuka eta yátupira'i achane ema Jesucristo, wa'i mawaneruanaina ema Viya. Enapa tikaye'eana ema machanewa ema anticristo, taicha eti echaipa eta maitesirayare. Tiuri, puítiichu narari'ipa ani viye'e.

⁴Nuchichanavechichana, eti machicha'e ema Viya, eti ekapakechaipa ena naenana tepiya'ira'iana, taicha ena tawa'aka'e eti ema tapajupanawa'i titupajijiapanawa'i maye'e ema tiavi'a te juka apake'e.

⁵Ena nani, ta'apapirikawaka'i eta tájiparakana taye'eana eta apake'e tamaurikeneana, tási'a, ena achaneana máe'ikara'ana'i ema Viákenu náurikaipa nasamararakawaka'i.

⁶Vítisera machicha'avi'i ema Viya. Tisamararaka'aviana ena tímatiana ema Viya, énasera ena apamuriana máimatira'ana ema Viya, wa'i tiúrima'i eta nasamira'avi. Etainapa, tímatikareanaya ena máwa'aruana ema Machanewa Viya, énerichuware tímatikareanaya ena máwa'aruana ema wínaraji.

⁷Nuparapenaveana némunakasareana, takamunu eta vémunakaka wámutu, taicha ema Viya tímituka'avi'i eta vémunasirakakaya. Vimutu viti vémunakaka'i, étapa tímereucha'avi'i eta makachichaira'avi'i ema Viya, yátupi'i eta vímatira'i ema.

⁸Énasera ena nani wa'i témunakakana, wa'i náimati'ini ema Viya, taicha ema Viya, yátupikene'i eta máemunaraiwa.

⁹Ema Viya, tímecha'avi'ipa eta máemunasira'avi'i, eta mawanesira'i ema makarichukene Machicha, mawaneka'i títeka te juka apake'e, tíjaraka'aviyare eta vítaresirayare máichekuarakirenapa.

¹⁰Eta vemunaraiwa ani taka'e: vítisera wa'i vitíwaina'ini vémunaka ema Viya, matiwa'i ema témunaka'avi'i, eta máemunasira'avi ema Viya, máijarareka'i ema Machicha, mawaneka'i tépenayare te crusu étavene eta makaepa'airayare eta vipekaturana.

¹¹Nuparapenaveana némunakasareana, máetaviucha eta máemunasira'avi ema Viya, eta taka'eyare eta vemunasirakakaina.

¹²Nájina tíma'aina ema Tata Vikaiyakene. Té'esera víti, te vémunakakapuka, tiáwa'aka'aviya ema, tási'a, vikuti'i ema Viya eta máemunaraiwa'i ema.

¹³Puiti, viti viáwa'aka'i ema Viya, éneichuware tiáwa'aka'avi'i ema, vécha'i eta máwa'asira'avi'i ema Viya, máichavene'i ema Machanewa Viya mawaneru'i eta viye'e.

¹⁴Tási'a, viti vikachaneanaipa ema Jesús, vimetakawakapa'i namutu ena vímanaruanapa'i eta máukupaisiraipa te anuma, taicha viwara'a náimatiyare namutu eta mawanesira'i ema Viya máiteka ema Machicha tikatiucha'aviyare vimutu viti achaneana te juka apake'e.

¹⁵Namutu nákani timatiana eta émaira'i ema Viákenu Jesús, eta emaira'i ema machicha ema Viya, tási'a, tímatikareana'i ena, máwa'aruana'i ema Viya, étapa eta náwa'asira'i ema.

¹⁶Víti vécha'i eta yátupira'i máemunasira'avi'i ema Viya. Ema Viya emakene temunara'i, ema yatupikene temunara'i, timatikare'i eta mawa'asira'i ema Viya, tási'a ema Viya mawa'aka'iware ema.

¹⁷Vétaviuchaya eta vémunasiraya ena vichamuriana taicha eta viáwa'asira'i ema Viya, tási'a, wa'i vipikaima'i eta jena sácheyare te viyanapa te mamira'u ema Viya, wa'i vipikaima'i taicha machicha'avi'i ema Viya, vikuti'i ema Jesús eta makachichaira'i ema Maiya, tayanapanepuka vítarekaicha'a te juka apake'e.

¹⁸Ema temunara'i wa'i tipikaima'i. Taicha eta yatupikene vemunaraiwa takaerajika'i eta vipikakarasirawana, taicha eta vipikakarasirawa tiama'aviyare taye'e eta ekuñaraki. Eta taka'e te natiari'ipuka ena tipikakararakawanacha'a, ena wicha'a narata'a naemunara'i'ini yatupina'ini.

¹⁹Víti vémunaka'i ema Viya taicha ema matiwa'i témunaka'avi.

²⁰Te narari'ipuka ena naka'e'i: “Viti vémunaka ema Viya”; tasi'asera nakatichaichucha ena nachamuriana, ena tépiya'ira'iana'i. Taicha náima'anenipuka ena nachamuriana, wá'isera náemunaka'ini, ene taka'e'i eta namaemunasira'i ema Viya máima'asikene'i.

²¹Eta juka eta mawanairipi'i viye'e ema viákenu Jesucristo: ema temunaka'i ema Viya, éneichuware maemunakayare ena machamuriana.