Read Ignaciano 1 San Juan 5 Bible Online

1 San Juan 5 - Ignaciano bible

1 San Juan 5

¹Yátupi'i eta makachichaira'avipa ema Viya vimutu viti visuapana'i ema Jesús eta émaira'i ema Cristo. Tási'a, vémunaka'i ema tikachicha'avi'i.

²Tási'a, te vémunaka ema Viya, té'epa visuapa eta mawanairipiana, tituparaka'avi takutiyareichu eta vémunasiraya namutu ena vichamuriana, taicha machichanaveana'iware ena, viparapenaveana'i te mawa'uana ema Viya.

³Étavene, eta vémunasira'i ema Viya, visuapaya eta mawanairipiana. Taicha wa'i táyakujikare'ini eta visuapiraya,

⁴tási'a, viti machichanaveana ema Viya virata'aya vínajika eta tamaurikeneana eta vítaresiraya. Taicha tímikataka'avi'ipa ema Jesús, táichavene'i eta vikasiñaira'i eta maye'e.

⁵Víti visuapa'i eta yátupira'i Machicha ema Viya ema Jesús. Tási'a, viti vé'ikana'i ema, vikarichu'i víti virata'a vínajika eta tamaurikeneana'i eta vítaresira.

⁶Te títekapa ema Jesucristo, tímerekawapa te juka apake'e, une eta makaikachasiya'i. Éneichuware eta máitine máepusairu'i eta máepenira'i te crusu. Ema Machanewa Viya, émapa títametaka'avi.

⁷Mapanana ena titametaka'aviana:

⁸eta une, eta máitine, émapa ema Machanewa Viya, eta juka, tikutikaka'i eta takayemakeneana. Eta maepusaisira'i eta maitine maepenira'i te crusu.

⁹Takuti'i eta nasuapakarewa ena nákani achaneana tiuriana, tiápajukawasera tasuapakarewapana eta mametarapiana ema Viya maye'e ema Machicha.

¹⁰Tási'a, te vikasiña ema Machicha ema Viya, visuapawa vikasiñawa te visamure eta yátupira'i eta mametasira'i ema Viya. Ena apamuriana wa'i nasuapa'ini ema Viya, náimikutichapa máepiya'ira'i'íni ema Viya, taicha wa'i nasuapa'ini eta mametarapiana'i maye'e ema Machicha Jesucristo.

¹¹Étaichuware eta juka eta mametasira'i ema Viya, eta máijarasira'aviripa eta vítaresirayare máichekuarakirenapa, ema Machicha ema Viya, ema técha'i eta vítaresira.

¹²Ena eta maitinetikasiñanayare ema Viya, títarekanayare; énasera nákani wa'i tikasiñana'i me Machicha ema Viya, wa'i títarekanaima'i.

¹³Nukajure'e eta juka eti esuapana maye'e ema machicha ema Viya, apaesa echa eta maichekuarakirenapa eta itaresira tiuri.

¹⁴Tási'a, tájina táeñamawakare'ini eta viyasearuana'i ema Viya, taicha vécha'i víti eta masamira'avi'i, taicha eta viyasearapiana tási'akeneana'i eta vímatiekene'aira'i eta mawara'akene'i ema Viya.

¹⁵Tási'a, vécha'i eta máijarasira'aviya tamutu eta viyasearuana, taicha vécha'i eta tasamakarewa'i eta viyasearapiana'i eta maye'e.

¹⁶Te natiari'ipuka ena tima'ana'i ema naparape eta makapekaturaira'i, wa'ichusera tiñe'icha takamunu eyujarauchaya, taka'e ema Viya makaitarekainapa ema vichamuri, jarari'i eta pekatuana tíñe'ipana mayuchatikawaneya ema Viya eta vítaresira táicha. Taicha tatiari'i eta pekatu tiñe'i titikene'a'ivi etasera eta juka wa'i nawara'a eyujaraucha taicha énajiwa'i tichawana.

¹⁷Tamutu eta taiñema'ikeneana pekatu'i; jarari'isera eta pekatu wa'i tiñe'icha wa'i takapakaima'i.

¹⁸Vecha eta wa'i vímisiapawaima'i taye'e eta vikapekaturairana viti machichanaveana'i ema Viya, taicha ema Machicha ema Viya tijaneaka'avi'i vimutu víti, wa'i márata'aima'i tikaetema'avi ema wínaraji.

¹⁹Taicha vécha'i eta makachichaira'avi'i ema Viya, kamuripananasera ena machanerana'i ema wínaraji.

²⁰Vítisera vécha'i eta máitesira'i eta te juka apake'e ema Machicha ema Viya, ema tímitupana'avi'i, émavene'i témesenika'avi'i maye'e ema Maiya ema yátupikene'i Viya. Máichavene ema Machicha Jesucristo, viáwa'akaipa víti ema yátupikene'i Viya, émara ema makarichukene'i yátupikene'i Viya, ema, tíjaraka'aviya eta vítaresiraya máichekuarakirenapa.

²¹Nuchichanaveana, wa'i ekukasiñaraji; wa'i ekukuti ena achaneana tikasiñarajiana eta achanemirana.