Read Ignaciano 3 San Juan 1 Bible Online

3 San Juan 1 - Ignaciano bible

3 San Juan 1

¹Ema viyara'a tikatupara'a, ema némunarukene'i Gayo nukaju'i, ema temunaka'i eta yatupikeneana.

²Némunarukene, nuyaseuchavi'i me Viya táuriwaina eta pémataneana, énerichuware nuyaseuchaviware táuriwaina eta pítaresira, tákutini eta táuriwaipa eta piáchanewa.

³Tétavikawa'i eta núrisamurewa'i, te títekapanapa ena vichamuriana, taicha timetakanuanapa eta pisuapira'i, pé'isira'i eta yátupikeneana echéjirirukawana maye'e ema Cristo.

⁴Tájina tákuti eta núrisamurewa'i taicha eta nusamairisiraparaka'i eta é'isira'i eti nuchichanaveana eta yátupikene echéjirirukawa maye'e ema Cristo.

⁵Nuparape némunarukene, tájina táichawa'i eta pijakapira'i péchapajirisira'i ena vichamuriana, wá'ineni pímatikenewakaina'ini ena.

⁶Te títekapanapa ani te viúrujisiawa'i, timetaka'avianapa. Tájina táichawa eta piúriwa, pímikatasirawaka'i eta nayanira ena vichamuriana. Eta pika'eyare pímiyanawaini eta piúriwa naye'e, taicha eta juka víchira'i takurisamurechayare ema Viya.

⁷Taicha ena, táimipaika'i eta nakametarairuira'i eta echéjirirukawa maye'e ema Jesucristo. Eta napaisira'i, tájina nayaseserekapa'ini ena naye'e ena achaneana masuápajiraira'anaicha'a.

⁸Tási'a, tawara'aichu eta véchapajirikawaka ena, apaesa eta vímikatasi'aya ena eta nakametarairuiraya, eta yátupikene echéjirirukawa.

⁹Nukajureipa naye'e ena pichamuriana te piávi'a'i. Marari'isera ema Diótrefes. Ema máurika tikainapupuirikawa te namira'u ena achaneana. Ema, wa'i masuapa eta vitupara'ana.

¹⁰Tási'a, nutiari'inapa eta ara eye'e, nuti nítametaka'eyare tamutu eta máichakeneana. Ema, téchejika'i eta viye'e. Kátichakare'i eta máechejiriruwana, wá'isera másuapakare'ini. Ema wa'i majakapaima'i ena vichamuriana tipaikana'i. Te natiari'i ena nawara'a najakapa, ema maka makawanairipi nakuija nakujakapa. Éneichuware mawara'a makaerajika te emuri ena tiwara'ana najakapa.

¹¹Nuparapenaveana némunarukeneana, wa'i pikuikutipa ena tíchana'i eta tamaurikeneana. Pikutiyaresera ena tíchana'i eta táurikeneana. Taicha viti víchana eta táurikeneana, viti machichanaveana ema Viya. Énasera ena tíchana'i eta tamaurikeneana, ena, wa'i náimati'ini ema Viya.

¹²Namutu nakunacha ema Demetrio, taicha yátupikene'i táuriwa eta maye'erepi. Nuti apanaware éneichuware nukunacha eta máuriwa. Píti pímatinu'i, eta tatupiruwa'i tamutu eta néchejiriruwana.

¹³Tiuri, jukari'i apamuri eta numetaruvianayare. Wicha'asera numetakavima'i puiti te juka najure.

¹⁴Nútijapainapasera eta ara piye'e apaesa níma'avi. Tási'a, véchejirikawainapa eta vímanasirakakayare.

¹⁵Puiti, nuwara'a máijarakavini ema Viya eta piúriwaina taye'e tamutu eta pipanereruana. Téchejikaviana ena piájiriareana. Tási'a, péchejisinanu émanapachuina ena nájiriareana nuti.