Read Ignaciano San Judas 1 Bible Online

San Judas 1 - Ignaciano bible

San Judas 1

¹Nuti Judas mawanara ema Jesucristo, maparapenuware ema Santiago, néchejika'ewaka emutu eti maichu'akene'i maemunaruana ema Tata Viya, taicha tetavikawa'i eta majaneasira'e'i ema Jesucristo.

²Puiti, nuwara'a tajuruka'ini eta ewapinairawaka'i eta máemunasira'e'i ema Viya, étapa eta majapanuira'e'i; tájinaware ta'apapirika'ini eta táuriwa eta epanereruana.

³Tiuri nuparapenaveana, ichape eta nuwaraira'i nukajure'e emutu eti taka'e eta viuchukuiraya te apana vitaresira vimutu viti, tási'a puiti nima'apá eta vikamunukeneana nuyaseaka'ewa ímiyanawa étumechawa eta esuapajiraiwaina eta mawanairipiana.

⁴Neñamawa'i taicha natiari'i ena tiwayuara'iana eye'e eti, ena naka'e'i ema Jesucristo wa'i mákarichu'ini viákenuina'ini, wa'i wikusuapa. Taicha naemeña'a'i eta maemunasira'avi ema Viya, naimijachapa wa'i tikuñaka'avima'i eta vichira eta tamaurikeneana, taicha eta titukakare ani taka'e, namutu ena achaneana kaikuñawakaya ena masuapajiraira'ana.

⁵Németeaka eti échaipa eta náichararakawa'i ena viáchukanaveanaini israelítana eta náuchusirapa te awasare Egipto, nuwara'asera némecha'e, éma'i ema Viákenu tikuchuku'awaka'i namutu ena. Té'esera te táekenepa, máitapaimurí'apa ena masuapajiraira'ana'i.

⁶Éneichuware naka'e'i ena ángeleana enasera wa'i naunakawa'ini taye'e eta nawakureni'i, enasera nanakikapa eta navineni'i, ema Viya maeratakawakaipa taye'e te nakaikuñairare, pajara'inapa eta nauchukuiraina'ini tiamainukawa te taitekapapa eta sache nakayesere'irayare tamutu eta naichakeneana'i tamaurikeneana.

⁷Takutinasi eta náichararakawa'i ena achaneana tikawasanaini te apinakene awasare Sodoma étapa eta Gomorra, étapa eta awasarechichana te tachakayana'i, tijararekawanapa tu'usianapa, tisapawanapa naicha eta tamaurikeneana, taitusiawa tikatajiwanapa taye'e eta taijurekene yuku, taka'e puiti vechapawaya vimutu.

⁸Éneichuwa naka'eya ena maecharaireana tu'usiana, enanakana nichakeneana'i, naechipejika'i eta náke'e náepuru'i ema Viya eta émaira'i técha'avi. Nakaeka'i'iware ena ángeleana tiámana eta majaraiwa'i ema Viya.

⁹Ema Arcángel Miguel makanarapa ema wínaraji eta makatiuchira'i eta make'e ema viyara'aini Moisés, wá'iware makajachareka'ini maume'aini. Ánipa máicha: Maima'avine ema viákenu.

¹⁰Énasera ena achaneana, naechejisi'a'i eta tamaurikeneana taye'e eta tajiparakana, wa'ineni naimatiekene'a'ini eta takayemakeneana. Ena nakuti'i eta sárareana tajina tapanereruina énajiwapa tímikuñakawanaya.

¹¹¡Páureanasami ena nani!, taicha naikutipa'i ema Caín. Eta mawaraira makaye'e eta plata taemejekapawachapa, nakutiware ema Balaam émapa ema Coré, tepenana'i taichavene eta namasuapajiraiwa.

¹²Tétavikawa'i eta etsiri'akarewa'i eta náimisiapirawa'i eye'e te iúrujisirawana eta énisirana ena echamuriana, taicha ena, tájina napíkauchakenena'ini te nanisirana. Ena tachutiri'ana enachucha natiwawaika'i, nakuti'i eta úkajiana te ichape sachere'i tajina ta'uneraina. Nakutiware eta yukukiana má'irikireana, eta náichira'i eta táurikeneana, nakutiware eta yukukiana tájikeruana vinereruana, tépuri'apa waipakene tímarukaima'i.

¹³Ena, nakutiware eta táepakuru'a eta ichape une tétavikawa'i eta tatsiri'akarewa'i eta náichakene'i eta tamaurikeneana. Nakutiware eta jarairikiana tiyejepaikawana. Jarari'isera eta nakaikuñaiyayare eta ichapekene timapiku, máitawakakayare eta nanasirayare.

¹⁴Ema Enoc ema maekenereru, mae'iru ema Adán, maechejikapa ena achaneana maichawapa: “Níma'a'i, ema Tata Viya makachanemuripa'i maverakeneana ena maye'eana ángeleana.

¹⁵Jarajapainapa eta ekuñaraki naye'eya namutu ena tichana'i eta tamaurikeneana, kaikuñanayare namutu ena kapekaturana'i.”

¹⁶Ena nakana achaneana namutu techejijiakawana, napanararacha'i namutu, enachucha nawara'a titauchawa eta nawara'akeneana, suapawana eta naechejisira.

¹⁷Nuwara'aware némecha'e, eti nuparapenaveana némunarukeneana, eta nametarapi ena víyara'ana apústuleana maye'eana'i ema Viákenu Jesucristo

¹⁸naicha'ineni: “Eta taitekapiraya eta juka añuana, natiari'inapa ena achaneana, kaeka'ira'ianaya eta naitaresiraya napanerechaya eta nae'isiraya eta tamaurikeneana.”

¹⁹Ena'i ena nakana ena tiviuchana'i eta nawaraira'i náiputsikawaka ena vichamuriana; étachucha natanuka'i eta najamuraraiwana, taicha wa'i mawa'aka'ini eta machanewa ema Viya.

²⁰Étisera némunarukeneana nuparapenaveana, étumechakakaya eta esuapiraina eta é'isira'i ema Viákenu. Ísapawayarewa tímituka'e ema Machanewa Viya eta eyujarasirana.

²¹Tauri eta ítaresira, wa'i ekuemitisikawa'ini eta táetaviuchirawa'i eta máemunasira'e'i ema Viya, tási'a ekuchapa eta jena sácheyare táepanirawaya eta vítaresira, máitawakakayare eta vítaresiraya, taicha eta majapanuira'avi'i ema Viákenu Jesucristo.

²²Étumechayare ena echamuriana nákani wa'ichu nasuapa'ini eta nauchukuiraipa'i.

²³Ena apamuriana, ekatiucha taye'e eta taijurekene yuku, ejapanuyare nákani, ekuneuchawasera, machu napareaka'e eta náejekapirawana, taicha tétavikawa'i eta tamauriwa.

²⁴Ema Viya, tétavikawa eta máitupaijiasirawa'i. Makarichu'i ema marata'a tikatiucha'avi taye'e eta víkuñayare'ini. Taicha mawara'a'i máepachinachayare eta iáchanewana, takuija'iwaréni eviurewaina eta mámira'eyare te mamira'u te jena sácheyare,

²⁵ejiraucha ema Viya, ímati ema katiura'i. Éneichuware viti, tétavikawayare eta vikunachiraya vimutu viti, taicha eta máramikarewa'i ichapekene eta máitupaijiasirawa. Vépuyumiraucha eta visuapiraina. Máitawakakayare eta vitsiusirayare ema. Amén.