Read Ignaciano Apocalipsis 10 Bible Online

Apocalipsis 10 - Ignaciano bible

Apocalipsis 10

¹Níma'apa ema apanaware ángele tiúkupaika'i te anuma, tétavikawa eta máiñe'iwa, tamuichapa'i eta úkaji, tatiari'ipa'i eta a'e te mápusi. Eta mamira, tétavikawa eta tajararasira'i takuti eta táima'i eta sache. Eta mapaikeana tijara'iwaka tikutipa'i timurukiape.

²Téjiaka'i eta Ajurekachicha eta makaratasira'i te mawa'u. Tási'a, eta mapaike waure makatayaeka'i eta ichapeama une. Eta étakiape sapa takatayaka'i te tiájipa'i.

³Tási'a, tipiarakapa muraka, takuti eta ta'u eta tíñe'ikene sárare itiare. Te títapirikapa, nusama eta na'u ena apamuriana takutiyaréni eta tirure'ucha'i. Siétekene'i eta najikapira'i.

⁴Te timatinapa, nuwara'apa nájuekene'ayare'ini. Nusamapasera ema téchejikanu'i te anuma. Máichanupa: “Piáñauchayare eta juka pisamakene'i, tási'a wa'i pikuajucha.”

⁵Taka'e ema ángele níma'akene'i eta makatayasira'i eta ichapeama une, étapa eta tiájipa'i, masuvechapa te anuma eta mawa'u waure.

⁶Tiwanekanu'i ema Viya, ema akanewakakene'i eta máitaresira, ema yátupikene'i tépiyaka'i eta anuma, eta apake'e, eta ichape une, étapa tamutu eta tiávi'akeneana'i taye'e. Ema, tiwanekanu'i numetaka eta juka máechejiriruwa'i: “Tájinapa waipa tiyerema'i eta táitaviraya,

⁷etasera te taitekapapa eta sacheyare, eta makachujairaya ema nasietenekene ángele, títauchawainapa tamutu eta maeñaure'i mapanereruana'i ema Viya.”

⁸Eta tainapure na'u nusamakene'i, tiapechawaware téchejikanu, tási'akene'i te anuma, ánipa maichanu: “Piyana piyaseaka eta Ajureka makarataru'i ema ángele, ema titupi'a'i taye'e eta ichape une tási'a étapa te tiájipa'i.”

⁹Taka'e, nuyanapa maye'e ema ángele, nuyaseakapa eta Ajureka, tási'a, ema máichanupa: “Júka'i eta Ajureka, pive'a, pinika. Títiveyare eta pisamira te pijaka takutiyare eta mápama, étasera te piami, tisukareyare pisama.”

¹⁰Taka'e, nuve'apa eta ajureka te mawa'u ema ángele nunikapa, jé'esareine'i títiveine'i eta nusamira te nujaka takutirine'i eta mápama, té'esera nujirikapa, tisukarepa nusama te nami.

¹¹Tási'a, nukametakasiwarepa: “Píti piápechawaya pikametarapiya eta náichararakawayare namutu ena akenukana te juka apake'e, énapa ena achaneana tikawasana'i te tamutu awasareana.