Read Ignaciano Apocalipsis 11 Bible Online

Apocalipsis 11 - Ignaciano bible

Apocalipsis 11

¹Taka'e, tíjarakanuanapa eta ekutiriki, tási'a, máichanupa: “Pechepuka piyanayare piama eta ekutiriki taye'e eta mapena eta Viya, te'epa tamira'u te tavirare eta námawa'uasana, pikutichayare eta taunawa eta peti, tási'a pitupachayarewa áyanana'ipuka ena achaneana téñauchawara'iana'i taye'e eta.

²Wá'isera pikuikuticha te aneka tamira'u'i eta mapena ema Viya, taicha nijararuipa'i ena maimatira'ana ema Viya, énainapa techanayare eta awasare Jerusalén namapachichijikainapa, cuarenta y dos kaje eta náichirayare.

³Nútisera nuwanekawakainapa ena apinana nuwaneruanaya profetana, ena tikisamuiri'anayarepa'i eta namuiri'ana, eta juka táikutiarayare'i eta náichuaresirayare náeñauchawa ena achaneana, mil doscientos sesenta sache eta nayerewayare.”

⁴Enanakana apinana profetana, eta'i eta apina yukuki ulivuki étapa eta apina kandeleruana te mamira'u ema Viya, ema técha'i tamutu eta juka apake'e.

⁵Te natiari'inapuka nákani tiwara'anayare titupiakana, ena tikatiuchawanayare, tiúchukayare eta yuku te najaka, táijuchayare muraka, takapakayarewa ena nánaranayare'i.

⁶Énerichuware ena nani, narata'ayareware náichejika eta tikiwa te jena sácheana nakametarairuirayare, étaipa eta une, náepiyakayare ítiamayare náicha, nakuchukayarewa eta táiñepa'iyare naye'e ena achaneana, apánapanenejiyare'i náicha, te jákani nawara'akeneyare ena.

⁷Té'esera te táitauchawapa eta nakametarairuirayare, makanarawakainapa ema tíñe'i achane wínarajikene tikaijare Útsutsure, tási'a masapi'ainapa tikaparekayare makapakawakainapa ena apinana mawanarana ema Viya.

⁸Eta nake'enaini tejarupaikawainapa taye'e eta calleana te ichapekene awasare, ánaki te naetatasine'i ema Viakenu, eta juka awasare, tétavikawa'i eta tamauriwa'i takuti eta awasare Sodoma, étapa eta Egipto.

⁹Tási'a mapana sache y medio eta naka'eyare eta te awasare, apánapanenejianayare ena achaneana naitekapakeneanayare tiasi'ana te apanana awasareana apaechejiriruwana, ena tima'anayare eta nake'enaini nakaparuana'i, enasera wa'i naisapaima'i naekara ena naepenakeneana.

¹⁰Ena achaneana, natiari'ikeneana te tamutu awasareana ena tiúrisamureanaya eta náimairaya ena, eta naepeniraipa. Tikapiestaranainapa, tíjarakasichakakanainapa eta námawa'uana, taicha títawanaipa ena apinana profetanaini, taicha éna'i ti'apapirikana'i eta náichira'i eta tamaurikeneana.

¹¹Tási'asera, te táekenepa eta mapanakene sache y medio, makaechepukawakapa ema Viya, tichawanapa títarekana, namutu ena achaneana timararakana'i, íchapeine eta napisira'i.

¹²Taka'e, ena nani apinana profetana nasamainapa eta ma'u ema tíchu'awaka'i te anuma, muraka eta ma'u eta máichuirawaka'i: “¡Yare, íteka, iápana!” Taka'e, járajapapa eta úkaji táepanawakapa ena, támapa te anuma, ena nanarana'i náimararakaipa eta nayanira'i.

¹³Enewanepa tiyayakarepa eta apake'e, muraka eta tayamurisira'i, kamuri eta pétiana tiákipaikawawaka'i, siete mil eta náichapemuriwa ena náepenakeneana'i. Ena achaneana táemachana'i, tétavikawaine'i eta napisira'i, náimatinumaine'i ema Viya, napiarakapa, nakunachapa eta máitupajijiasirawa'i ema Viya tiávi'a'i te anuma.

¹⁴Títauchawapa eta juka apinakene ekuñaraki, tiane'inapawasera titekapayare eta tamapanane ekuñaraki.

¹⁵Taka'e, tikachujapa ema tékene'a ángele. Tási'a, tikaemapa muraka te anuma. Ánipa taka'e'i: “Ema tikawanairipiyare te juka apake'e, ema Viya, tási'a émapa ema Cristo, akanewakainapa eta émairayare techa tamutu.”

¹⁶Ena véinticuatrukeneana víyakara'ana, ena téjakana'i taye'e eta trono te mamira'u ema Viya. Titsiukapairikanapa, tási'a nakunachapa ema Viya,

¹⁷ánipa naka'e: “Vi'asulupayachavi, Tata. Tétavikawa'i eta pítupajijiasirawa'i, píti pitiari'ikene'i te tépanawainapa eta apake'e, pinasi'ichu'iware puiti eta viye'e. Puiti péjakapa taye'e eta piáwakure ichapekene,

¹⁸Tétavikawa'i eta nasemanewa'i ena achaneana eta piye'e, murakapanainapasera eta píkuñasirawaka ena, puiti tikayasesere'ianainapa te pimira'u ena náepenakeneana, puiti pítsirijikawainapa naye'e ena piwanarana, píjarakainapa eta náikuchi'i ena yátupikeneana'i tiámana'i eta píjare, nákani ichavikana, énapa ena amaperuana. Tási'a pikamitiekene'ainapa namutu ena tikamitiekenera'ianaini te juka apake'e.”

¹⁹Taka'e, téjiakapa eta tapajakura eta templo mapena ema Viya tiávi'a'i te anuma, tikaecherapa eta sagrario takaunaiya'i eta echéjirirukawana matratuneana'i ema Viya. Tási'a enewanepa térameka'i, tirurekapa, tiyamurikapa eta apake'e, témirikapa eta uvereki.