Read Ignaciano Apocalipsis 12 Bible Online

Apocalipsis 12 - Ignaciano bible

Apocalipsis 12

¹Níma'awarepa eta apana ekutiarare te anuma: sutiari'i esu esena, eta sumuiri'a takutiyaréni eta tajaraiwa eta sache, te tápeku eta suíwapeana takutiyaréni eta kaje, eta te suchuti sukaye'e eta corona, jarari'i takutiyaréni eta dósekeneana jarairiki.

²Esu suka esena tikajari'i, tipiarareka'i eta suínasirayare'i, ichape eta sukatajiwaira'i. Eta tiñe'i ichape kichare

³Tási'a, témuna'irikawarepa tiúchujika eta apana ekutiarare: táiñe'ikene sárare ichape kichare, titsi eta táima'i, siete eta tachuti, diez eta taji'uana, tamutu eta tachutiana tikaye'e'i eta corona.

⁴Eta te táijiki, táestakapa eta mapamuriana eta táichapemuriwa eta jarairikiana, takamirikapa te juka apake'e. Tási'a, titupi'apa eta sárare taiñe'ikene ichape kichare te sumira'u esu esena esu tínakayare'i, titsekawaipa eta tanisirayare'i eta suchicha te suinakapa.

⁵Taka'e, ajaira eta suchicha'i esu esena, ema akenukayare'i taye'e tamutu eta awasareana, makaratakayare eta matsukurupa fiérroki. Etasera eta suchicha naverejisinapa námapa maye'e ema Viya, te mávi'a'i trono.

⁶Tási'a, esu esena tijunawanepa te máwapa'i apake'e eta suávi'ayare'i maicha ema Viya, natiari'iyare'isera ena ténikanayare'i esu, mil doscientos sesenta sácheana eta náitatirayare'i esu esena.

⁷Taka'e, te'akakanapa te anuma: tiúchujikapa ema Arcángele Miguel énapa ena ángeleana machamuriana, te'akakanapa nakanarapa eta taiñe'ikene ichape kichare. Éneichuware natiari'iware ena taye'eana'i ángeleanaini eta ichape kichare,

⁸apake'ererupasera eta ichapekene'i kichare. Énapa ena tachanerana, tási'a, waipa máisapa ema Viya nanasi'ini te anuma,

⁹taka'e, tikakijianapa te juka apake'e eta ichape kichare, eta tikaetema'i esu suinapure esena Eva, émapa ema nákenumuri'i tikaijare Ereana Wínaraji, ema tikaetema'i namutu achaneana te juka apake'e. Namutu tikakijiana ema, enapa ena machanerana, te juka apake'e.

¹⁰Nusamawarepa te anuma eta ma'u muraka, ánipa maka'e: “Títekapapa puiti eta viuchukuirayare, taicha titekapapa ema titupajijiakawa ema Viakenu Viya, tási'a émainapa techa'aviyare ema Viakenu Jesucristo, taicha ema Wínaraji makijikaipa te anuma, ema tikaetemajirikaini'i ena vichamuriana tamutu sacheana, yatiana te mamira'u ema Viakenu Viya.

¹¹Ena vichamuriana naita'aka'i taicha eta maepusaisira'i eta maitine ema Cordero tási'a náimimaticha'i, eta máechejiriruwana ema Viya, wa'i napikakawawaka'ini eta náitaresira, tijarakawana'i te náepenirayare'i.

¹²¡Tétavikawaya eta íurisamurewaya, eti iávi'ana'i taye'e eta juka anuma! ¡Páureanasamisera ena tikawasana'i te apake'e énapa ena tiávi'ana'i te ichapeama une, taicha ema wínaraji máecha'i eta ánipine'i, máukupauchawakaipa, tétavikawa eta masemanewapa'i!”

¹³Taka'e eta ichape kichare, eta táimaira'i eta takakijira'i te anuma, táukupaisiraipa te juka apake'e, takamesapa táe'ikarairika esu esena suínaru'i.

¹⁴Ésusera tikaijarakasipa eta apina ichapekeneana supawanayare'i takuti eta tapawa eta ichape máti'i. Sumaitasiawayare'i tiara taye'e eta máwapa'i apake'e suávi'ayare'i. Ánaki natiari'iyarewa ena téchapajirikanayare'i. Mapana añu y medio eta náenisirayare'i. Eta Serpiente wa'i táitekapauchaima'i esu.

¹⁵Tási'a, eta Serpiente tá'ikapa eta une te tajaka, tawaraira'i tíja'uchawa tatiari'i eta kajakure apaesa suérika'ini esu esena.

¹⁶Étasera eta apake'e takatiuchapa esu esena. Téjiakapa eta apake'e, táerapaikawanepa eta une tá'iruama'i eta Serpiente.

¹⁷Taka'e, eta táimairawa'i eta Serpiente wa'i tárata'a'ini, tavetijipaicha eta tasemira'i suye'e esu esena. Tiyanapa naye'e ena suchamuriana, énapa apavekeneana'i. Tawara'apa takapakayare'i ena sukutikeneana'i tisuapana'i ema Viya, té'ikana'iware eta máimiturapiana'i ema Jesucristo.

¹⁸Níma'apa eta útsutsure tiúkupaikapa'i tási'a'i te ichapeama une