Read Ignaciano Apocalipsis 13 Bible Online

Apocalipsis 13 - Ignaciano bible

Apocalipsis 13

¹Taka'e níma'apa eta útsutsure tiúkupaikapa'i tásiapa'i te ichapeama une. Siete eta tachuti. Diez eta taji'uana. Te tápusi eta taji'uana tatiari'i eta taye'e corona, tási'a te tachutiana tatiari'i eta ajureka tímijachawa'i Víyaina'ini.

²Eta juka sárare níma'akene'i tawasima'iyaréni eta ichini, eta táiwapeana takutiyaréni eta táiwape eta atikure, tási'a eta tajaka takutima'iyaréni eta tajaka eta itiare. Eta taka'e, eta ichapekene kichare táijarakapa eta máitupajijiasirawayare'i ema útsutsure, étapa eta ma'akenukawayare'i.

³Te étana machuti ema útsutsure, tatiari'i'i eta majara eta tikapaka'i. Tási'asera, tichawa'i títareka, tinarakawarepa. Taka'e eta náimaira'i ena achaneana te tamutu awasareana, ichapeine'i eta nárami, tási'a náe'ikapa ema útsutsure.

⁴Natsiukawarepa eta ichape kichare, taicha eta náimaira'i eta taijarasira'i eta ma'akenukawayare'i ema útsutsure, tási'a naka'epa: “¿Tétavikawa'i eta máitupajijiasirawa'i ema maka útsutsure, nájina tirata'aima'i nakanara nákipaika ema?”

⁵Taka'e, ema Viya máisapapa eta útsutsure taechejisiawa, eta makapika'uira'i taicha emakene'i yátupikene'i Viya, tási'a maisapaware akenukayare'i taye'e tamutu eta awasareana te juka apake'e, cuarenta y dos kaje eta akenukairayare'i.

⁶Je'esareine'i tepanawapa techejika tíñema'ipiwaka eta máechejisira, makaeka'ira'i ema Viya étapa eta mapena, makaeka'iware ena tiávi'ana'i te anuma.

⁷Maisapaware, makanara te'akakana taye'e eta awasare santukene'i, etapa eta maita'asirayare'i, maisapaware eta ma'akenukawayare'i, naye'e ena apánapanenejiana achaneana te juka apake'e, enapa ena apaechejiriruwana tiavi'ana te apana awasareana.

⁸Eta akane te tépanawainapa eta apake'e, tatiari'i eta Ajureka tiama eta najukunana ena títarekanaya te apana vítaresira, makarataru'i ema nakaparu'i Cordero, natiari'isera ena apamuriana achaneana tikawasana te juka apake'e, tájina'i eta nájukunaina'ini taye'e eta Ajureka, ena nani ena titsiukanayare eta Útsutsure.

⁹Te ewara'apuka ekaikutiara eta juka, tawara'a epanerechaya ichape.

¹⁰“Mákani témeratakayare ema apana, énerichuware tikaeratayare ema apanaware, mákani tikapareka'i, nakapakayarewa ema.” Eta taka'e, tikaecherainapa ena yatupikeneana tikasiñawana me Viya, eta nakamichirayere eta nakatajiwarayare, nákani machanerana ema Viya.

¹¹Tási'a, níma'awarepa eta apana utsutsure, taiñe'ikene tiúchujika te ama'e apake'e. Eta juka sárare, makuna'i ema achane tikaijare Falso Profeta, eta juka, tatiari'i'i eta apina eta taji'uana, takuti eta taji'u eta uvesa, étasera eta táechejisira takutia'u eta ta'u eta ichape kichare.

¹²Tajachapa'iware eta ta'akenukawayare'i taijararu'i eta tainapure utsutsure, etapa tikaemataneaka'i eta tainapure, etapa muraka'i eta tikawanairipi'i naye'e ena achaneana tikawasana te juka apake'e, eta natsiusirayare'i eta tainapure utsutsure, eta nakanararu'i eta tajaraini'i taiñe'ikene.

¹³Eta, tarata'a'i taimereka eta tiáramikareana, tarata'a'iware takamirika eta yuku tiási'aya te anuma, náima'a'i namutu ena achaneana te juka apake'e.

¹⁴Ichape eta náramira'i, étavene'i eta juka táimeresira'i eta tiáramikareana, étainapa tiwayuakaya ena achaneana, tisuapakarenapa titsiukakarenawarepa eta Útsutsure, taicha náima'a'i eta tanarasira'i eta tajara te tumare; tiápechawa títareka'i, taka'e, makawanairipipa náepiyakaya eta máima'i ema Útsutsure, nasiñarajiya.

¹⁵Etasera eta tapinane Útsutsure tajachapapa eta taitupajijiasirawayare'i eta táchanechira'i eta náepiyaru'i táima'i eta tainapure Útsutsure, téchejikayare táicha, eta juka nasiñaraji, tawanekapa, namutu natsiukakayare'i, énasera nákani wa'i náwara'a'ini natsiuka, taimikapakawakayare'i.

¹⁶Tasi'a takawanairipipa námutu ena achaneana, amaperuana, ichasiana, énapa ena kaima'akeneana, énapa ena musuana, énapa ena mákenureana, najachapayare'i eta naikutiarana, te nawa'u sapa te'epuka waure te'epuka nana'u.

¹⁷Námayare'i eta táijare eta Útsutsure étapa eta taye'e número, énerichuware makawanairipipa wa'i nakuisapa nakujachapa eta nawacharapiana ena tajina naikutiaraina eta taijare eta Útsutsure etapa eta número.

¹⁸Takamunu'i yátupina vipánerekene'ayare maicha ema Viya, apaesa wákaikutiara eta takayemakene'i tayumururewa'i eta tuparaki máijare ema Útsutsure eta 666. Eta, takuna'i eta máijare ema maka achane.