Read Ignaciano Apocalipsis 19 Bible Online

Apocalipsis 19 - Ignaciano bible

Apocalipsis 19

¹Te táekenepa eta juka, nusamawarepa eta na'u ena kamurikeneana achaneana taye'e eta anuma, muraka eta najiraira. Ánipa naka'e: “¡Aleluya! Tétavikawa'i eta vikunachiravi'i Tata.

²Taicha ema máikuñaka'i ena tikaviurewana, eta taka'e máemechareka'i esu tú'usikene, ichape eta suwayuareresiraini'i ena achaneana, puiti pítipa pítsirijiekene'a'i eta nakapasira'i ena mawanaranaini ema Viya.”

³Tiápechawanawarepa tijirana: “¡Aleluya! Taicha akanewakainapa eta takaikuñaira'i eta juka awasare.”

⁴Tási'a, ena véinticuatrukeneana víyakara'ana, énapa ena kuatrukeneana ekutiarareana tépuyumuri'anapa te mamira'u ema Viya, ema téjaka'i te trono, natsiukapa eta nakunachira'i. Ánipa naka'e: “¡Amén! ¡Aleluya!”

⁵Tási'a, tikaechera'uwarepa eta ma'u ema téchejika'i taye'e eta trono. Maka'epa: ¡Etsiukayare ema Viya emutu eti machanerana étipa eti amaperuana tási'a étipa eti ichasiana, epikaura'iana maye'e!”

⁶Nusamawarepa eta na'u ena kamurikeneana achaneana tijajakana'i. Tétavikawa'i eta tamurakawa'i eta najiraira'i. Ánipa naka'e'i: “¡Aleluya! Taicha téjakaipa te máwakure ema Viákenu, Taicha tétavikawa eta máitupajijiasirawa,

⁷Wámutu viúrisamure, tétavikawa eta viúrisamurewapa puiti, taicha títauchawapa eta makurujisira'avipa ema Cordero. Tímikutijirikawa'i te araimamu'u:

⁸Viti vé'ikana'i ema Cordero, tétavikawa'i eta vipachinawaipa'i máicha, takuti'i súkani araimayare, sukamuiri'apa eta múiriare lino, tijapu tirapepemeka. Eta juka lino, táikutiara'i eta táuriwa'i eta naíchakeneana ena té'ikana'i ema Viya.”

⁹Ema ángele máichanupa: “Piájuchayare eta juka: ‘Tétavikawapa eta náurikakarewa nákani nakaichu'asikeneana'i taye'e eta táurinakene mapiestara ema Cordero.’ ” Tási'a, máichanuwarepa: “Eta jukana, eta yátupikeneana'i máechejiriruwana'i ema Viya.”

¹⁰Népuyukapa te máiwapechakaya ema ángele, nuwara'apa nutsiukayare'ini, émasera máichanupa: “Wa'i pikutsiukanu, taicha núti'ichu'i pikutikenenu'i mawanaranu'i ema Viya, énapa ena pichamuriana'i títauchana'i eta mawanairipiana ema Jesús. Ema Viya, ema tatuparakavi'i pitsiukayare.” Taicha éti'ichu'i vikutikeneana eta vikametarairuira eta máechejiriruwa ema Jesús.

¹¹Níma'awarepa eta anuma téjiaka'i, tási'a tiúchukapa eta kawayu tijapu. Eta máijare ema, yátupikene títaura'i, taicha ema, tatupiruwa eta ma'akenukawa'i.

¹²Eta máuki'ana timuru'ewaka takutiyareni eta yuku, te machuti tikaye'e'i eta kamurikene koronana, tási'a tatiari'iware eta ajureka tiáma'i eta apana máijare, makarichusera ema técha'i eta takayemakene'i eta ajureka.

¹³Eta mamuiri'a tikaepapame'i te iti, tási'a eta máijare: Tímimatira'i me Viya.

¹⁴Náe'ikapa'i ena maye'eana ejército, tiási'ana'i te anuma, namutu tikaperawaka eta kawayu tijapu. Eta namuiri'ana, amairi'a eta táurinakene lino tijapu.

¹⁵Te majaka tiúchukapa eta tawasima'i eta takasirikene espada eta makapasi'ayare ena mánarana. Makarataka'i eta matsukurupa fiérroki eta makurujisirawakaya. Tási'a émaichuware makatayayajikawakayare ena mánarana, takutiyare eta nákatayayajisira'i eta uwa eta nakuchusira'i eta tachi. Taicha tétavikawa'i eta náimiyusemasira'i ema Viya ema máitupajiji'akene'i.

¹⁶Tatiari'iware eta ajureka te tacheyarapi eta maye'e capote tépakucha'i eta mapa'eana, ani taka'e'i: “Ema yátupikene'i Rey, Akenuka'iware. Mawaneka'i ena reyeana énapa ena akenukana.”

¹⁷Níma'awarepa ema ángele titupi'a'i te tamira'u eta sache. Mapiarakawakapa eta káyureana tiárarairikara'iana te anuke'e. Ánipa maka'e: “¡Yare eti káyureana, iúrujikawa enikayare eta tinikakare máeniru'eyare ema Viya,

¹⁸enikayare eta náecheanaini ena reyeana, ena ajairanaini tímijachawana túmeana, énapa ena naye'eanaini, étapa eta táeche eta kawayu náperanaini. Vénika'eyare namutu ena!”

¹⁹Níma'awarepa ema útsutsure, tási'a énapa ena reyeana akenukana te awasareana, étapa eta maye'eana ejército, kurujikakanapa, náurujiakapa ema tikapera'i eta kawayu tijapu, énapa ena té'ikana'i maye'eanapa'i ejército.

²⁰Eta Útsutsure nakaratakapa emapa ema Falso Profeta, eta tímerekaparakaini'i eta ekutiarare tiáramikareana, te mamira'u. Taka'e eta maimeresira'i eta tiaramikareana naye'e ena achaneana, ena tisapawana'i manaka eta taikutiara eta Útsutsure, énapa ena titsiukana'iwa eta máima'i ema útsutsure. Taka'e, nakaratakapa eta útsutsure, émapa ema Falso Profeta, náepujukichapa taye'e eta táijurekene yuku táetiraraisina eta tamuruira.

²¹Tási'a, ema tikapera'i eta kawayu tijapu, máija'uchapa makapapajikawaka ena suntaruana mánarana'i, eta makaparaki eta takasirikene espada táuchure'i te majaka, tási'a, járajapapa eta sipukiana, tanikapa eta náecheanaini ena, tisatu'ewakapa.