Read Ignaciano Apocalipsis 2 Bible Online

Apocalipsis 2 - Ignaciano bible

Apocalipsis 2

¹“Pikajureyare eta juka numetarapiana'i maye'e ema tikametarairura'i naye'e ena pichamuriana tikawasana'i te awasare Éfeso: ‘Nuti iákenunu'i taicha nuti nukarataka'i eta sipikeneana jarairikiana te nuwa'u waure, nuti návi'a'i te tamuri eta sipikeneana kandeleruana urukiana:

²Nuti nímati tamutu eta píchakeneana'i; étaipa eta tamurakawa'i eta ekaemataneasiranu'i, ekamichira'i tamutu, necha'iware eta pimakamichira eta tamaurikeneana. Necha'iware eta pitsamaresira'i ena tepiyakawana'i apústuleana'i. Wá'isera ejakapa'ini ena, ímatiakawane'i eti ena tépiya'ira'ianapa'i.

³Nímati'e eta ekamichira'i tamutu eta iátajiwana'i táichavene'i eta ekaemataneasiranu'i. Wa'i eyakuji'ini.

⁴Jukari'isera eta juka piviurewa'i nuye'e: puiti pikamitiakaipa eta pémunaraiwaini. Waipa tákuti'ini eta pémunaraiwaini'i te tépanawainapa.

⁵Taitusiawa puiti nuwara'a, tachawa eta pémunaraiwa'i. Péñauchawa tatiwaina, apaesa píchaware eta táurikeneana takuti eta akane. Te wa'i pikuetupirikawa, nútijakaruwayare níteka, nítsiwachayare eta kandeleru íkutiara'i eye'e.

⁶Pikunachakare'isera eta pikatichira'i eta tamaetupisirawa'i eta naye'erepiana ena apamuriana té'ikana'i ema nicolaítas. Ene nuka'e'i nuti, nukaticha'iware.

⁷¡Ema Machanewa Viya tímituka'eyare eta juka mametarapiana eti nuchanerana'i! Emutu eti ekamichana'i, ímiyanawa'i eta é'isiranu'i, nukasiapa'eyare te paraíso íkumuna'i me Tata. Nénika'eyare eta ta'i, eta yukuki tiama'i eta táurikakarewayare eta ítaresira.

⁸“Pikajureware eta juka numetarapiana'i naye'e ena pichamuriana tikawasana'i te awasare Esmirna: ‘Nuti nunakucha'i eta táepanirawa'i, núti'ichuware nécha'i eta táitavirayare tamutu. Nuti nakaparu'i, nuchawa'isera nítareka:

⁹Nuti nímati tamutu eta píchakeneana'i, eta pikatajiwaira'i, étapa eta pipaurerawa'i. Tétavikawa'isera eta piúrikakarewa'i, tímikutijirikawaipa'i ríkuvina'ini. Nímatiware wa'i pisema'ini, taicha eta pépiyaekeneana'i naye'e ena tímijachawana'i machanerana ema Viya. Machanerana'i ema Wínaraji.

¹⁰Wa'i ekupika eta ekatajiwairaya, numetaka'e, ema wínaraji tímisiapa'eya te cárcel eta máitsamaresira'eya te tíminajika'eyarepuka, ekamichachuchasera, taicha diez sache eta ekatajiwairayare, nutuparaka'echa. Ejikapaikayare tayanapanepuka nakapaka'e nuti níjaraka'eyare eta táitsiwayare, tiúriyare eta ítaresiraya.

¹¹¡Ema samara'i masamayare ema Machanewa Viya eta makayemakene'i taye'e ena pichamuriana! Nakaini tita'arekanayare wa'i tikatajiwaima'i taye'e eta taiñema'ikeneana, étapa eta tapechirawayare eta naepenira.’

¹²“Pikajureyare eta juka numetarapiana'i ema tikametarairura'i naye'e ena pichamuriana tikawasana'i te awasare Pérgamo: ‘Eta juka maka'e'i ema tikarataka'i eta takásirikene espada tinunape eta takasiriwa:

¹³Nuti nímati tamutu eta píchakeneana'i, eta piavi'aira'i te mawasa ema Wínaraji, wá'isera ínajikawa'ini, étumechawaichucha eta é'isiranu'i nuti. Étaipa te íma'apa eta nakapasira'i ema nuchaneraini Antipas, yátupikene'i eta masuapiranu'i ema, ena machanerana'i ema Wínaraji nakapaka'i ema te jena iávi'a'i eti.

¹⁴Jukari'isera eta juka piviurewa'i nuye'e: taicha písapawaichucha natiari'i'i ena nanerejiruwana ena echamuriana wa'i náwara'a'ini náinajika eta maimiturapiana ema Balaam, ema maimitukawaka'i ema Balac eta maimiakipaisirayare ena israelitana mawanekaware nanika eta nayujaraure'i te tamira'u eta nasiñarajiana, etapa eta nainajisirawaina eta nae'isiraina ema Viya.

¹⁵Éneichuware narari'i ánaki te emuri ena apamuriana wá'iware nawara'a náemitisika eta náimiturapiana ena nicolaítas.

¹⁶Eta taka'e, éñeuchawayare me Viya eti éjekapawana'i, te wa'i ekueñauchawa, nútijapayare némecharepana'eyare taye'e eta takasirikene espada táuchurekene'i te nujaka.

¹⁷¡Ema tikakiña masayare eta makayemakene ema Machanewa Viya naye'e ema pichamuriana! Enasera ena tita'arekanayare nijarakayare eta nanikayare eta maná, nijarakayareware eta marichi tijapu, eta taye'e marichicha tikajuyare eta taijare arairu, najinasera timatina makarichu ema tijachapayare maimatiyare eta taijare.

¹⁸“Pikajureyare eta juka numetarapiana'i ema tikametarairura'i naye'e ena pichamuriana tikawasana'i te awasare Tiatira: ‘Nuti Machichanu'i ema Tata Vikaiyakene. Nuti nímati'i tamutu, taicha tijara'iwaka eta núki'ana, tétavikawa'i eta tawayu'aukiraiwa'i. Eta níwapeana tijanunukawakawa takuti eta bronce eta tajanunusira'i:

¹⁹Nuti nímati eta píchakeneana. Nímatiware eta pémunasiranu'i, eta pikasiñawaira'i nuye'e, yátupi, eta échapajirisira'i ena achaneana, étapa eta ekamichira'i, nímatiware murakapanaipa'i eta ekaemataneasiranu'i, tiápajukawaipa'i puiti taye'e te épanawainapa.

²⁰Jukari'isera eta juka piviurewa'i nuye'e: pisapa'i tisiapamuri'a'e esu esenatataji. Esu, wa'i táetupikawa'ini eta suye'erepiana, sukuti'i esu Jezabel eta akane. Tímijachawa'i mawanara ema Tata, suémejekapawacha'isera ena nuchanerana. Suímitukawaka'i nayujarauchawa suye'e, tási'a supamikawa nanika eta tinikakareana nayujaraureana'i te tamira'u eta nasiñarajiana, suímitukawakaware eta natu'usiwayare.

²¹Nuti íchapemuri'i eta nukuchapira'i esu, eta suéñauchawa'ini me Viya. Wa'ikenesera suwara'a suínajika eta suye'erepi.

²²Puiti níjarakayare eta suíkuñayare, tikajumayare apaesa suíveka te sukamane. Ichape eta sukatajiwairaya, éneichuware ena suíturewana'i, níkuñakawakayarewa muraka, te wa'i nakuínajika eta suíchakeneasana'i esu.

²³Énerichuware ena suchichanaveana níjarakayare eta najumayare, nímikapasirawakayare, tási'a, échainapa eti nuchanerana'i eta nímatira'i tamutu eta epanereruana, eta te esamureana eti, níma'ainepasera nuti eta nícharakawakayare ena téjekapawana'i, étapa tiámayare eta náichakeneana.

²⁴Etisera eti ekawasana'i te awasare Tiatira, etisera wa'i e'ika'ini eta naimiturapi wa'iware ímatiekene'ai'ini eta naeñaure'i maye'erepi ema Wínaraji, etisera tajina etapirawaina'ini wa'i nikuñaka'ema'i.

²⁵Ísmiyanawachuchasera eta esuapira eta ímatikenepa'i, tiamainukawa te nuchawa.

²⁶Emutu eti ekamichana'i, ímiyanawa'iware eta é'isiranu'i, wá'iware ínajika'ini eta ekaemataneasiranu'i, nuti níjaraka'enapa eta tuparairukaira'énapa taye'e eta awasareana.

²⁷Ekutinuyare nuti eta máijarasiranu'i ema Tata Tikachichanu eta tamurakawa'i akenukairanu'i, ene eka'eyare eti, murakayare eta akenukaira'eyare, ekaratakayare eta etsukurupayare fiérroki, esuapakareyare muraka.

²⁸Tétavikawayare eta ejaraiwayare ekutiyare eta jarairiki te tiane'ipa tijara'i.

²⁹¡Ema tikakiña masamayare eta makayemakene ema Machanewa Viya naye'e ena pichamuriana!’