Read Ignaciano Apocalipsis 3 Bible Online

Apocalipsis 3 - Ignaciano bible

Apocalipsis 3

¹“Pikajureyare eta juka numetarapiana'i ema tikametarairura'i naye'e ena pichamuriana tikawasana'i te Sardis: ‘Nuti néchawaka'i ena sipikeneana machanewana ema Viya, étapa eta sipikeneana jarairikiana: Nuti nímati eta píchakeneana'i. Nímararaka'i eta pisamure. Nímati'i, tiáne'i eta pínajisiranu eta pé'isiranu'i.

²Pikuneuchawayare apaesa wa'i pikuemitiaka eta pé'isiranu'i. Taicha nímararaka'i nuti wa'i tátupiruwa'ini eta pisamure, eta pikaemataneasira'i ema Tata.

³Péchawayare tamutu eta pímitukasiwana'i. Te wa'i pikuetupirika eta pipanereruana, nútijapaya tíja'uchawayare eta nítekapirayare nukutiyare eta maitekapira ema tiamera'i.

⁴Wá'ineni ámutu'ini éjekapawa'ini eti ekawasana'i te Sardis. Natiari'i'i ena matapirawareana'i, wá'iware náechipejikawa'ini. Ena nani, níjarakawakainapa eta namuiri'ayare tijapu. Taicha tatuparaka'i eta návi'airayare eta nuye'e.

⁵Emutu eti ekamichana'i, ímiyanawa'iware eta é'isiranu'i, níjaraka'eyare ekamuiri'ayare eta tijapu. Wáipa nukaepa'aima'i eta íjareana taye'e eta libro tiama eta íjareana ena náitareruanayare. Nímimaticha'eyare te mamira'u ema Tata, etapa te namira'u ena ángeleana.

⁶Ema Machanewa Viya tímituka'eyare eta juka numetarapiana. Emutu eti nuchanerana'i.

⁷“Pikajureyare eta juka numetarapiana'i ema tikametarairura'i naye'e ena pichamuriana tikawasana'i te awasare Filadelfia: ‘Ani maka'e'i ema yátupikene'i Viya, yátupikene'iware eta masantuwa'i, makarichu'i ema técha'i eta tapajakura eta arairuyare awasare Jerusalén, takuti eta máechapajirisira'i ema náchukaini rey David eta táinapuiruini'i Jerusalén.

⁸Nuti nímati eta píchakeneana'i eta pikaemataneasiranu'i, pima'a, te pimira'u núnaka'i eta tapaja najinasera narata'a naerataka'ini, wa'ichu'ineni pawayuchawa'ini eta pitumewaina'ini, pisuapa'isera eta nechejiriruwa wa'iware peñaucha'ini eta nijare.

⁹Nuti níta'akawakayare ena israelítana tépiyakawana'i machanerana ema Tata, machanerana'isera ema Wínaraji. Nukaepuyukawakayare te emira'u, apaesa náimati eta némunasira'e'i.

¹⁰Piti, pítaucha'i eta nuwanairipi eta pikamichiraya tamutu, eta taka'e, nujaneakaviya nuti apaesa wa'i takuimive'avi te táitekapapa eta natajiwanayare namutu ena achaneana táwapa'iana'i te juka apake'e.

¹¹Tiáne'ipa eta nuchaviraya. Petumechawaya eta pé'isira'i, machu pémepurureka pijakapirayare eta píkuchi'i.

¹²Emutu eti ekamichana'i, ímiyanawa'iware eta é'isiranu'i; nítsirijikawayare eye'e. Máichekuarakireyare eta ekachaneraya ema Tata te máwasa. Iámayare eta máijare, étapa eta níjare arairu. Iámayareware eta táijare eta arairu Jerusalén, taicha tachicha'ewakaya.

¹³¡Ema tikakiña masamayare eta makayemakeneana ema Machanewa Viya, étapa eta mametaruanayare neye'e ema pichamuriana!’

¹⁴“Pikajureyare eta juka numetarapiana'i ema tikametarairura'i naye'e ena pichamuriana tikawasana'i te awasare Laodicea: ‘Ani taka'e eta Amén, taicha maye'e ema tamutu titauchawa eta maechejiriruwa ema Viya naye'e ena nachanerana, ema titametakara'i matupiruwa eta maitauraiwa, ema taepaninewa eta maepiyaruana vima'akeneana'i puiti.

¹⁵Nuti nimati'i eta pichakeneana'i. Necha'iware eta apaesasajiruvichu'i, wa'i yátupina'ini pisuapanu'ini. ¡Tiuripana'ini yátupina'ini pisuapanu, te wa'ipukasera yátupina'iseraini wa'i pikusuapanu'ini!

¹⁶Étasera eta apaesasajiruichu'i eta é'isiranu'i, tási'a wa'i yátupina'ini, eta taka'e nukaerajika'enapa te numira'u.

¹⁷Taicha piti pimijachawa'i pikaima'akene'i tájina pichirawaina'ini, tájinaware pákamunu'ini. Wá'isera pipanerechawa'ini ichapemuri'i eta pijapanurawa'i, tajina'ineni pima'akenena'ini, piti'ineni pikaijare páurevi, púchukivi'i, mamuriarevi'i.

¹⁸Eta taka'e nuwara'a nechejirikavi piwachareka nuye'e eta uru tiurinakene takaijukenepa yuku, apaesa yátupina pikaima'akene. Piwacharena nuye'e eta pimuiri'aina tijapu eta pikamuiri'a apaesa taepakucha eta pitsirira eta mamuriarevira, étapa eta pipurujina te piuki'a apaesa pimairirika.

¹⁹Nuti netupirikaya eta napanereruana namutu ena némunaruana te náejekapawa. Éñauchawaware, apaesa takuija ekuichirawaina.

²⁰Nuwara'a tachawa eta vikachanerakaka'i. Waipa ekuevuisi'a eta nuye'e. Íchu'anuware. Viápechawa viwapinawa eta véchejirisirawaparakayare.

²¹Emutu eti ekamichana'i, ímiyanawa'iware eta é'isiranu'i, nuti nukaejaka'ewakayare te néjasi'ayare, takutiyare eta néjasira'i maye'e ema Tata, taicha eta nétumechirawa'i nukamichira'i tamutu.

²²Ema Machanewa Viya tímituka'eyare eta juka numetarapiana. Emutu eti nuchanerana'i’ ”