Read Ignaciano Apocalipsis 8 Bible Online

Apocalipsis 8 - Ignaciano bible

Apocalipsis 8

¹Te, mavepistakapa ema Cordero eta tékene'a sello taye'e eta Ajureka. Tamutuine'i timatina te anuma. Media urapuka eta tamatinaira.

²Tási'a, níma'apa ena siéteana ángeleana, titupi'ana'i te mamira'u ema Viya. Tikaijarakasianapa eta siete chujareana nachujanayare'i.

³Tási'a, títekapawarepa ema émana ángele, mámapa'i eta censario, amairi'a uru. Ema ángele titupi'apa te tamira'u eta námawa'u, tási'a náijarakapa eta incienso tisimuri. Taka'e, makaratakapa eta censario, makapusisiakapa, takachanepaipa eta nayujarasirana namutu ena machanerana ema Viya.

⁴Eta takijarera étapa eta mayujarasirana tiápanapa maye'e ema Viya, tási'akene'i te mawa'uana ema ángele.

⁵Taka'e, ema ángele mave'awarepa eta apamuri emaniki eta te mayukuneasa. Mainikachapa eta censario eta mámawa'u. Tási'a, máepuraikapa te apake'e. Tíja'uchawapa térameka, tirurekapa, tiyayakarepa eta apake'e.

⁶Taka'e, ena siétekeneana ángeleana titsekawanaipa eta nakachujairayare.

⁷Te tikachujapa ema tínapuka ángele, témirikapa te apake'e eta uvereki, étapa eta tikiwa ítiama. Témirikaware eta yuku, taijuchapa eta tercera parte eta apake'e. Támairiakapa eta yukukiana, eta muiji, étapa eta sukurekana.

⁸Te tikachujawarepa ema apana ángele, témirikawarepa eta ichape mari. Timurupa'i eta táemirisira taye'e eta ichapeama une. Ítiamapa táicha eta une, tercera parte'iware.

⁹Támairiakapa takapapajikawaka eta sárareana tiávi'ana te ichapeama une. Étapa eta pakureana tachimararuana'i, técharikawanapa, téririjikanapa tamutu.

¹⁰Te tikachujapa ema apana ángele, témirikapa eta ichape jarairiki tási'a'i te anuma, tétiraraikapaine eta táemirisira'i. Tajararekapa eta une taye'e eta tercera parte eta kajakureana.

¹¹Venenuamapa taicha eta jarairiki. Ichapemurianaware ena achaneana tépenarakana'i taicha eta náerira'i eta une tisukareama. Eta taka'e, ena takaitiruana'i tímijarechana'i eta ekuñaraki.

¹²Te tikachujapa ema apana ángele, tiúchujikapa eta tépakucha'i eta sache, eta kaje étapa eta jarairikiana. Úchukene ura eta táetaviuchira'i eta tamapikuwa. Taka'e, úchuware ura eta takaecheraira'i eta sache. Uchu uraware eta takaecheraira'i eta kaje étapa eta jarairikiana.

¹³Taka'e, nésenikapa te anuke'e. Níma'awarepa ema émana ángele tiáraraika'i. Nusamapa tipiarakapa'i muraka, tási'a ánipa maka'e: Páureanasami ena tiávi'ana'i te apake'e, tétavikawaya eta nakatajiwairayare, puiti te táitauchawapa eta nakachujairaya ena mapanakeneana ángeleana.