Read Bibliya Yera 1951 Itanguriro 1 Bible Online

Itanguriro 1 - Bibliya Yera 1951 bible

Itanguriro 1

¹Ubga mbere na mbere Imana yaremye ijuru n’isi.

²Isi yar’ ikir’ i buziba, yarik’ ubusa gusa, kand’ umwiza war’ upfutse idamba: kandi Mpwemu w’Imana yatambatamba hejuru y’amazi.

³Imana iravuga, iti Ni habeh’ umuco: umuco ubaho.

⁴Imana ibona umuco kw ari mwiza: iraheza itandukanya umuco n’umwiza.

⁵Imana yita umuco umurango, umwiza iwita ijoro. Buragoroba, buraca: uwo n’umusi wa mbere.

⁶Imana iravuga, iti Ni habeh’ itāzānure hagati y’amazi, ritandukanye amazi n’ayandi.

⁷Imana iraritāzānura, itandukanya amazi yo musi y’itāzānure n’ayo hejuru yaryo: biba kuno.

⁸Maz’ iryo tāzānure Imana iryita Ijuru. Buragoroba, buraca: uwo n’umusi ugira kabiri.

⁹Imana iravuga, it’ Amazi yo musi y’ijuru n’akoranire hamwe, i musozi na ho ni haboneke: biba kuno.

¹⁰Maz’ i musozi Imana ihita Isi, ikoraniro ry’amazi na ryo iryita Ibiyaga: Imana ibona kw ari vyiza.

¹¹Imana iravuga, it’ Isi n’imere ivyatsi, n’ibimera vyose vyama utubuto, n’ibiti vyama ivyamwa vyavyo ukw amoko yavyo ari, birimw’ imbuto zavyo, kw isi nyene: biba kuno.

¹²Nukw isi imera ivyatsi n’ibimera vyose vyama utubuto ukw amoko yavyo ari, n’ibiti vyama ivyamwa birimw’ imbuto zavyo, ukw amoko yavyo ari: nukw Imana ibona kw ari vyiza.

¹³Buragoroba, buraca: uwo n’umusi ugira gatatu.

¹⁴Imana iravuga, iti Mw itāzānure ry’ijuru ni habeh’ ivyāka vyo gutandukanya umurango n’ijoro; bibēreho kuba ibimenyetso, no kwerekana ibihe, n’imisi n’imyaka:

¹⁵kandi bibe ivyāka vyo mw itāzānure ry’ ijuru vyo kwākira isi: biba kuno.

¹⁶Imana irema ivyāka bibiri binini, icaka kinini co kuganza umurango, n’icaka gitoya co kuganza ijoro, bo n’inyenyeri.

¹⁷Imana ibishira mw itāzānure ry’ijuru kugira ngo vyākire isi,

¹⁸biganze umurango n’ijoro, bitandukanye umuco n’umwiza; Imana ibona kw ari vyiza.

¹⁹Buragoroba, buraca: uwo n’umusi ugira kane.

²⁰Imana iravuga, iti Mu mazi ni hasegenyuke isegenya ry’ibifise ubugingo, kand’ ibiguruka ni biguruke hejuru y’isi mu kirere c’ijuru.

²¹Imana irema ibifi binini‐binini, n’ibifise ubugingo vyose bigendagenda, ivyasegenyutse mu mazi, nk’ukw amoko yavyo ari, n’ibiguruka vyose bifise ivyubi, ukw amoko yavyo ari: Imana ibona kw ari vyiza.

²²Imana irabihezagira, iti Ni murondoke, mugwire, mwuzure mu mazi yo mu biyaga, n’ ibiguruka ni bigwire mw isi.

²³Buragoroba, buraca: uwo n’ umusi ugira gatanu.

²⁴Imana iravuga, it’Isi n’izane ibiri n’ubugingo, nk’ukw amoko yavyo ari, vy’ ibitungano n’ivyikwega hasi n’ibikōko vyo mw isi, nk’ukw amoko yavyo ari: biba kuno.

²⁵Nukw Imana irema ibikōko vyo mw isi, nk’ukw amoko yavyo ari, n’ibitungano, nk’ukw amoko yavyo ari, n’ivyikwega hasi vyose, nk’ukw amoko yavyo ari: Imana ibona kw ari vyiza.

²⁶Imana iravuga, iti Tureme umuntu mw ishusho yacu, ase natwe: aganze amafi yo mu kiyaga, n’ibiguruka mu kirere, n’ ibitungano, n’isi yose, n’ivyikwega vyose, bigenda bikwega inda hasi.

²⁷Nukw Imana irema umuntu mw ishusho yayo, mw ishusho y’Imana ni ho yamuremye; irema abantu bar’ uburyo bubiri.

²⁸Maz’ Imana irabahezagira, iti Ni murondoke, mugwire, mwuzure isi muyiganze; mugabe amafi yo mu kiyaga, n’ibiguruka mu kirere, n’ibifise ubugingo vyose bigendagenda kw isi.

²⁹Imana irababgira, it’Ehe ndabahaye ivyatsi vyose vyama utubuto biri kw isi yose, n’igiti cose cama ivyamwa birimw’ imbuto zavyo: bibabere ivyo kurya vyanyu.

³⁰Kand’ ibikōko vyose vyo kw isi, n’ibiguruka mu kirere vyose, n’ivyikwega hasi vyose birimw’ ubugingo, mbihaye ivyatsi bitotahaye vyose, ngo bibe ivyo kurya vyavyo: biba kuno.

³¹Nukw Imana yihweza ivyo yaremye vyose, kandi vyari vyiza cane. Buragoroba, buraca: uwo n’umusi ugira gatandatu.