Read Bibliya Yera 1951 Itanguriro 11 Bible Online

Itanguriro 11 - Bibliya Yera 1951 bible

Itanguriro 11

¹Abo mw isi yose bari bafise ururimi rumwe n’ukuvuga kumwe.

²Nuko bariko baragenda berekeye i burasirazuba, babona ikiyaya mu gihugu c’i Shinari; bagerēraho.

³Baravugana, bati Ngo tubumbe amatafari, tuyaturire neza. Nuko bakoresha amatafari mu gishingo c’amabuye, na kaburimbi mu gishingo c’ubudongo.

⁴Baravuga, bati Ngo twiyubakire igisagara, n’umunara uz’ ushikīre ijuru, kugira ngo twironkere izina rya rurangiranwa, twoye gusābagira mw isi yose.

⁵Maz’ Uhoraho amanukanwa no kurāba ico gisagara n’uwo munara, abana b’abantu bubatse.

⁶Uhoraho aravuga, ati Rāba n’ihanga rimwe, kandi bose basangiye ururimi rumwe; non’ iki ni co batanguye gukora: erega nta kizobananira noneho ku co bazogabira gukora cose.

⁷Nuko ngo tumanuke tuyoberanye ururimi rwabo, boye kwumvikana mu kuvuga kwabo.

⁸Nuk’ Uhoraho abasābagiriza mw isi yose: baca baheba kwubaka ca gisagara.

⁹Ni co catumye izina ryaco citwa Babeli; kukw ari h’Uhoraho yayoberanirije ururimi rw’abo mw isi yose; kand’ ari h’Uhoraho yabasābagirije mw isi yose.

¹⁰Uru ni rwo ruvyaro rwa Shemu. Shemu amaze imyaka ijana avyara Arupakisadi, wa mwuzure umaze imyaka ibiri uhavuye.

¹¹Shemu amaze kuvyara Arupakisadi, amara imyaka amajana atanu, ayivyaramw’ abahungu n’ abakobga.

¹²Arupakisadi amaze imyaka mirongwitatu n’itanu avyara Shela:

¹³Arupakisadi amaze kuvyara Shela, amara imyaka amajana ane n’iyindi itatu, ayivyaramw’ abahungu n’abakobga.

¹⁴Shela amaze imyaka mirongwitatu avyara Eberi.

¹⁵Shela amaze kuvyara Eberi, amara imyaka amajana ane n’iyindi itatu, ayivyaramw’ abahungu n’abakobga.

¹⁶Eberi amaze imyaka mirongwitatu n’ine avyara Pelegi.

¹⁷Eberi amaze kuvyara Pelegi, amara imyaka amajana ane na mirongwitatu, ayivyaramw’ abahungu n’abakobga.

¹⁸Pelegi amaze imyaka mirongwitatu avyara Reyu.

¹⁹Pelegi amaze kuvyara Reyu, amara imyaka amajana abiri n’icenda, ayivyaramw’ abahungu n’abakobga.

²⁰Reyu amaze imyaka mirongwitatu n’ibiri avyara Serugi.

²¹Reyu amaze kuvyara Serugi, amara imyaka amajana abiri n’ indwi, ayivyaramw’ abahungu n’ abakobga.

²²Serugi amaze imyaka mirongwitatu avyara Nahori.

²³Serugi amaze kuvyara Nahori, amara imyaka amajana abiri, ayivyaramw’ abahungu n’abakobga.

²⁴Nahori amaze imyaka mirongwibiri n’icenda avyara Tera.

²⁵Nahori amaze kuvyara Tera, amara imyaka ijana n’icumi n’ icenda, ayivyaramw’ abahungu n’ abakobga.

²⁶Tera amaze imyaka mirongwirindwi avyara Aburamu na Nahori na Harani.

²⁷Uru ni rwo ruvyaro rwa Tera: Tera yavyaye Aburamu na Nahori na Harani; Harani yavyaye Loti.

²⁸Harani apfira mu gihugu yavukiyemwo, ahitwa Uri i Bukaludaya, se Tera akiriho.

²⁹Aburamu na Nahori bararongora: muka Aburamu yitwa Sarayi, muka Nahori yitwa Miluka, mwene Harani, Harani se wa Miluka na Yisika.

³⁰Sarayi yar’ intavyara, ntiyagira umwana.

³¹Tera ajana Aburamu umwana wiwe, na Loti mwene Harani umwuzukuru wiwe, na Sarayi umukazana wiwe, muka Aburamu umwana wiwe; bava muri Uri i Bukaludaya ngo baje mu gihugu c’i Kanani; bashika i Harani, bagerēraho.

³²Imisi Tera yamaze yabaye imyaka amajana abiri n’iyindi itanu: Tera araheza apfira i Harani.