Read Bibliya Yera 1951 Itanguriro 12 Bible Online

Itanguriro 12 - Bibliya Yera 1951 bible

Itanguriro 12

¹Uhoraho abarira Aburamu, ati Va mu gihugu canyu, no mu muryango wanyu, no mu nzu ya so, uje mu gihugu nzokwereka.

²Nanje nzoguhindura ubgoko bukomeye, nzoguha umugisha, izina ryawe ndarigire rurangiranwa; n’abandi baze bagire umugisha kubgawe.

³Abazoguhezagira nzobahezagira, kand’ ūzokuvuma nzomuvuma: kandi muri wewe ni ho imiryango yose yo mw isi izohērwa umugisha.

⁴Nuko Aburamu aragenda, nk’ uk’ Uhoraho amubariye; Loti ajana na we. Aburamu yar’ amaze imyaka mirongwirindwi n’itanu igihe yava i Harani.

⁵Aburamu ajana Sarayi umugore wiwe na Loti umuhungwabo, n’itunga ryabo ryose bari batungiye i Harani, bo n’abantu bāronkeyeyo; bavaho ngo baje mu gihugu c’i Kanani; nuko bashika i Kanani nyene.

⁶Aburamu adwēbēra ico gihugu, ashika ahantu hitwa i Shekemu, ku giti c’umweloni ca More. Ico gihe Abanyakanani ni bo bāba mur’ ico gihugu.

⁷Uhoraho yiyereka Aburamu, aramubarira, at’ Uruvyaro rwawe nzoruha iki gihugu. Aca ahubaka igicaniro, yubakiye Uhoraho amwiyeretse.

⁸Arikora avayo, aja ku musozi wo ku ruhande rw’i burasirazuba rw’i Beteli, ahashinga amahema; i Beteli hasigara i burengerazuba bgiwe, i Hayi hakaba i burasirazuba bgiwe: na ho nyene ahubakira Uhoraho igicaniro, yambaza izina ryiwe.

⁹Nuko Aburamu akomeza kugenda aratāhīra, yerekeye i Negebu.[8]

¹⁰Maz’ inzara itera mur’ ico gihugu: nuko Aburamu aramanuka, aja muri Egiputa, ngw asuhukireyo, kukw inzara yari nyinshi mur’ ico gihugu.

¹¹Ari hafi gushika muri Egiputa, abarira Sarayi umugore wiwe, at’ Umve ndazi k’ur’ umugore w’igikundiro:

¹²nukw Abanyegiputa ni bakubona, bazovuga, bat’ Uyo n’umugore wiwe, baheze banyice, nawe bakureke.

¹³Ndakwinginze, uz’ uvuge k’uri mushikanje, kugira ngo ndābge neza kubgawe, ubugingo bganje ubukirishe ivy’ uvuze.

¹⁴Nuko Aburamu ashitse muri Egiputa, Abanyegiputa babona yuk’ uwo mugore ari mwiza cane.

¹⁵Abamenyekana ba Farawo bamubonye, bamushimira Farawo: nuk’ uwo mugore ajanwa kwa Farawo.

¹⁶Farawo agirira Aburamu neza kubg’ uwo, aharonkera intama n’ inka n’indogoba z’amapfizi n’abagurano b’abahungu n’abakobga n’indogoba zivyara n’ingamiya.

¹⁷Uhoraho ateza Farawo ivyago bihambaye, bo n’urugo rwiwe, amuhōra Sarayi muka Aburamu.

¹⁸Maze Farawo ahamagaza Aburamu, aramubaza, at’ Ico wankoreye ico n’iki? k’utāmbariye kw ar’umugore wawe?

¹⁹N’iki catumye uvuga kw ari mushikawe? nanje nkamujana nkamugira umugore wanje: nuko nguyo umugore wawe, mujane wīgīre.

²⁰Farawo abarira abantu kumuherekeza, bamuherekezanya n’umugore wiwe n’ivyo yar’ afise vyose.